Isaiah 60:1 tell, “Da One In Charge tell: “You Jerusalem peopo, Stan up! Shine jalike one light! Cuz now, you get awesome light from me, Da One In Charge. I stay awesome, An I jalike da bright light dat make you peopo come awesome too, Jalike wen da sun come up an shine light fo you.” Da verses aroun um show dat dis wuz Zion, or da capital of Judah, Jerusalem. (Isa 60:14; 62:1, 2) Dat city wen rep da whole Israel nation. Get two questions we goin ansa about dis scripcha. Numba one, wen an how Jerusalem wen “stan up” an shine spiritual light? Numba two, Isaiah’s words happening in one moa bigga way oua time?

Wen an how Jerusalem wen “stan up” an shine spiritual light? Wen da Jews wuz taken away to Babylon fo 70 years, Jerusalem an its tempo wuz all bus. Wen da Medes an Persians wen take ova Babylon, da Israel peopo from all ova Babylon wuz free fo go back home an worship Jehovah ova dea. (Ezra 1:1-4) Starting 537 B.C.E., one small group of faitful guys from all 12 tribes wen go do dat. (Isa 60:4) Dey wen start fo make sacrifices to Jehovah, build da tempo again, an celebrate da spesho kine ceremonies. (Ezra 3:1-4, 7-11; 6:16-22) One moa time, Jehovah’s light wen start fo shine on top his peopo. An den, Jehovah’s peopo wen shine spiritual light on da peopo dat neva know Him.

But, ony paht of Isaiah’s prophecies wen happen dat time. Mos of da Israel peopo neva lissen to God. (Neh 13:27; Mal 1:6-8; 2:13, 14; Mat 15:7-9) Layta on, dey wen even rejeck da Messiah, Jesus Christ. (Mat 27:1, 2) In 70 C.E., Jerusalem an its tempo wen get wipe out again.

Jehovah wen say dat all dis wuz goin happen (Dan 9:24-27) Wuz clear dat it wuzn’t Jehovah’s goal fo Jerusalem on eart fo make eryting happen in da prophecies in Isaiah chapta 60.

Isaiah’s words happening in one moa bigga way oua time? Yessah, but dis stay happening to “Jerusalem inside da sky.” Da aposal Paul wen write, “Az jalike oua muddah.” (Gal 4:26) Jerusalem inside da sky iz all of Jehovah’s loyal spirit creatures, da heavenly paht of his hui. His “kids” iz Jesus an da 144,000 who jalike Paul, wen get pick fo go heaven. Da anointed Christians stay “peopo dat stay spesho fo God,” “da real Israel peopo”​—1 Pet 2:9; Gal 6:16.

How Jerusalem inside da sky wen “stan up” an “shine jalike one light”? Wuz tru da anointed on eart. Try see how wat dey wen go tru match up wit da prophecies in Isaiah chapta 60.

Da anointed Christians had fo “stan up” cuz dey had go tru spiritual darkness wen da aposals wen mahke an apostasy wen spread in da secon century C.E. (Mat 13:37-43) Dat time dey wen come unda da control of Babylon da Great, which rep all da bulai kine religions. Da anointed wuz stuck in Babylon da Great till “da time wen da world goin come pau,” dat wen start in 1914. (Mat 13:39, 40) Litto while afta in 1919, dey wuz let go an fas wen  start fo shine spiritual light by goin all out fo preach. a Ova da years, peopo from all da nations wen come into dat spiritual light, even da lef ova ones from “da real Israel peopo,” da “King guys” dat Isaiah 60:3 wen talk about.​—Jesus Show 5:9, 10.

In da future, anointed Christians goin spread da light from Jehovah in one big way. How dey goin do dat? Wen dey mahke on top da eart, dey goin come paht of “New Jerusalem,” or Christ’s bride of 144,000 kings an prieses.​—Jesus Show 14:1; 21:1, 2, 24; 22:3-5.

New Jerusalem goin play one mayjah paht in making wat it tell in Isaiah 60:1 happen. (Go check Isaiah 60:1, 3, 5, 11, 19, 20 wit Jesus Show 21:2, 9-11, 22-26.) Jus like Jerusalem on eart wuz da main place wea da govament in Israel befoa wuz, New Jerusalem an Jesus, goin be da govament of da new world. How New Jerusalem come “down from God in da sky”? By doin tings dat goin affeck da eart. Da peopo dat love God from all ova “goin walk aroun inside da light.” Dey not goin do bad tings or mahke anymoa. (Jesus Show 21:3, 4, 24, NWT) Wen dat happen, “God goin make eryting come new,” jalike how Isaiah an da odda prophets wen say. (Jesus Guys 3:21) Dat wen start wen Christ wen come King an goin pau afta his Tousand Year Rule.