Fo make Jehovah happy, we gotta have faith. But da Bible say dat not erybody get faith, an “get peopo dat no like trus da stuff we stay tell um.” (2 Tess 3:2) Wen da aposal Paul wen say dis, he was talking about da guys who wen make um hard fo him, da “peopo dat do bad stuff.” But dey not da ony ones dat no moa faith. Get some peopo dat no believe in God an dat he wen make eryting. (Rome 1:20) Odda peopo believe dat get somebody o someting dat moa powaful den us. But dat kine faith is not nuff fo make Jehovah happy.

We gotta full on believe dat Jehovah is real an dat he take kea da guys dat get solid faith in him. (Heb 11:6) Fo get dis kine faith, we gotta have God’s spesho spirit. An we can pray to Jehovah fo give us his spesho spirit. (Luk 11:9, 10, 13) One main way fo get dat spirit is by reading da Bible. Afta dat we can tink hard about da stuff we read an den try fo do um. Den Jehovah’s spirit can affeck oua life an help us fo get da kine faith dat make him happy.