In Songs Fo God 12:7, wat Jehovah “goin take kea”? Is dat talking about “da peopo dat no mo notting” (verse 5) o da tings dat “he tell” (verse 6)?

Da odda verses aroun um show dat is talking about da peopo.

At Songs Fo God 12:1-4, it tell dat “No mo nobody I can trus. I no can find nobody dat stay tight wit me!” Try look Songs Fo God 12:5-7, da verses we stay talking about now.

Verse 5 stay about wat God going do fo da peopo dat no moa notting. He going save dem.

Verse 6 say dat “Eryting he tell, stay right on, jalike da kine silva dey melt seven time fo take out all da junks.” Dis show how Christians feel about da Bible.​—Songs 18:30; 119:140.

Nex we go look Songs Fo God 12:7: “Eh! You Da One In Charge! You goin take kea da peopo dat no mo notting, so dat da bad peopo dat get nowdays no can hurt um, eva.” Who “da peopo” dis talking about?

Cuz verse 6 talk about “Eryting [Jehovah] tell,” some peopo might tink dat da tings Jehovah “goin take kea” in verse 7, dass talking about da tings Jehovah say an promise. An we know dat Jehovah wen always take kea an proteck da Bible even tho plenny guys wen try get rid of um.​—Isa 40:8; 1 Pet 1:25.

But wat verse 5 tell stay true too. Jehovah wen always take kea da guys “dat no mo notting” an he always going “get dem outa trouble.”​—Job 36:15; Songs 6:4; 31:1, 2; 54:7; 145:20.

So den, wat Jehovah going “take kea” in verse 7?

Wen we look real close at dis song, is talking about peopo.

Songs Fo God 12:1, 2 talk about wat wen happen to da peopo dat “trus” Jehovah an how dey wen get lied to. In verse 3 it tell dat Jehovah going wipe out all da peopo dat bulai an talk big. Da song help us know dat we can trus God fo take kea his peopo cuz eryting he tell stay right on.

So in verse 7, Jehovah saying he going take kea an proteck “da peopo” dat wen get hurt by da bad peopo.

Old copies of da Hebrew Scripchas dat plenny peopo trus an da Greek Septuagint use one word fo peopo in dis verse. Da end of verse 7 tell dat Jehovah “goin take kea da peopo . . . so dat da bad peopo dat get nowdays no can hurt um, eva.” (Songs 12:7, 8) In one translation of da Hebrew Scripchas in da Aramaic language, verse 7 say, “You, O LORD, going proteck da righteous, you going guard dem from dis evil generation foeva. On ery side da wicked go about, like one leech dat drains da blood of da sons of men.” Dis is moa proof dat Songs Fo God 12:7 is not talking about da promises God make.

So, fo da peopo dat trus Jehovah, dis verse give dem hope dat he going take kea dem.