1. Wat we wen learn at da 2023 annual meeting?

 AT DA 2023 annual meeting, a we was excited fo hear some new changes wen come to oua preaching an some of da tings we believe. We wen learn dat some peopo might get chance fo come on Jehovah’s side even afta Babylon da Great get wipe out. Anodda ting we wen learn is dat starting Novemba 2023, we no need report all da stuff we do in field service anymoa. You tink all dese changes make oua preaching not az importan? No ways!

2. Eryday dat go by, how come oua preaching stay moa importan? (Mark 13:10)

² Eryday dat go by, oua preaching come moa importan. How come? Cuz time stay running out. Try look wat Jesus wen say about da preaching work befoa da world pau. (Read um Mark 13:10.) In wat Matthew wen write, Jesus wen say dat peopo going tell da good kine stuff all ova da earth befoa “eryting goin come pau.” (Mat 24:14) Dose words talk about wen Satan’s pilau world going get wipe out. Jehovah wen awready pick da “day [an] time” wen all dis going happen. (Mat 24:36; 25:13; Jesus Guys 1:7) Eryday we come moa closa to dat time. (Rome 13:11) Till den, we gotta keep preaching.

3. Wat move us fo go preach?

 ³ Wen come to preaching, is importan fo tink about how come we do um. Love move us fo go preach. Wen we preach, we show oua love fo da good tings in da Bible, oua love fo peopo an, moa den anyting else, oua love fo Jehovah an his name. We go check um out one at a time.

WE PREACH CUZ WE LOVE DA TRUT

4. Wat we do wen we hear someting good?

⁴ You rememba how you wen feel wen you wen hear someting good? Maybe somebody wen offer you one job you wen really need, o somebody in yoa ohana wen have one bebe? Garans you wanted fo tell erybody about da good tings you wen find out. Wat about wen come to da bestes news eva, da good tings about God’s Govament, you wen go tell erybody about um?

5. How you wen feel wen you firs had learn da trut in da Bible? (Go look da pichas.)

⁵ Try tink back how you wen feel wen you firs had learn da trut in da Bible. You wen find out yoa heavenly Faddah love you, he like you be part of his ohana, he wen promise fo end suffaring, you get chance fo see da guys you love dat wen mahke come back alive again, an plenny moa stuff. (Mar 10:29, 30; John 5:28, 29, NWT; Rome 8:38, 39; Jesus Show 21:3, 4, NWT) All dose truts wen touch yoa heart. (Luk 24:32) You wen love all da stuff you wen learn, an you wanted fo tell erybody about um!​—Go check Jeremiah 20:9.

6. Wat you learn from wat wen happen to Ernest an Rose?

⁶ Try look wat wen happen to one braddah name Ernest. b Wen he was  about ten years old, his faddah wen mahke. Ernest wen say, “I wanted fo know if my faddah wen go heaven, o if he was gone foeva. I was jealous of da odda kids who still had one faddah.” Ernest would go to his faddah’s grave all da time an pray, “Please God, I jus like know wea my daddy stay.” About 17 years afta his faddah wen mahke, Ernest wen start fo study da Bible. He was so happy fo learn dat da guys dat wen mahke, az like dey stay sleeping, dey donno notting, an dat da Bible promise dey going come alive again. (Teacha 9:5, 10; Jesus Guys 24:15) He finally wen get da ansas to da questions dat wen bodda him long time. Ernest was supa excited about all da Bible truts he wen learn. His wife, Rose, wen start fo study da Bible too an wen love wat she wen learn. In 1978 dey both wen get baptize. Dey wen share all da stuff dey was learning wit dea family, frenz, an anybody dat wen lissen. An cuz a dat, dey wen help moa den 70 guys fo get baptize.

7. Wat happen wen we love wat we learn in da Bible? (Luke 6:45)

⁷ Wen we love wat we learn from da Bible, we no can keep um to ouaself. (Read um Luke 6:45.) We feel like da firs Christians who wen say, “No way us can no talk bout da tings we wen see an hear.” (Jesus Guys 4:20) We love da trut so much dat we like share um wit az much peopo az can.

WE PREACH CUZ WE LOVE PEOPO

8. Why we like show oddas wat stay in da Bible? (Go look da box “ Love Peopo​—Make Followas.”) (Go look da picha.)

⁸ Jalike Jehovah an his Boy, we love peopo. (Smart Guys 8:31; John 3:16) We feel fo da guys dat no moa hope an dey donno God. (Efe 2:12) Dey stay drowning in dea problems, an da good tings in da Bible about God’s Govament is jalike da life vest dey need. Cuz we love dem an we feel fo dem we like do eryting we can fo show dem wat stay in da Bible. Wen dey learn um, it can help dem fo have da bes life now, an da hope fo “get da kine life dass fo real,” living foeva in da new world dat God promise.​—1 Tim 6:19.

9. Wat we like warn peopo about, an how come? (Ezekiel 33:7, 8)

⁹ Da love we get fo peopo make us like warn dem dat dis pilau world going pau pretty soon. (Read um Ezekiel 33:7, 8.) We get pity fo oua neighbahs  an da guys in oua ohana dat no serve Jehovah. Plenny peopo jus living life an dey donno dat da big trouble wea “erybody goin suffa to da max” stay coming. “Neva have notting lidat eva happen befo time, not even from wen God make da world till now, an no goin get notting lidat eva goin happen one mo time.” (Mat 24:21) We like dem know wat going happen wen dat time fo judge come. Bulai religion going get smash an dis whole pilau world going get wipe out at Armageddon. (Jesus Show 16:14, 16; 17:16, 17; 19:11, 19, 20) We hope plenny peopo lissen an serve Jehovah wit us. But wat about da guys dat no like lissen right now, even da guys in oua family?

10. Why az importan fo keep warning peopo about wat going happen pretty soon?

¹⁰ Like how da las lesson wen explain um, maybe Jehovah going save da guys dat put faith in him wen dey see Babylon da Great get smash. If dass da case, den even moa importan fo us keep warning erybody about dat now. Try tink about dis. Wat we tell dem now can give dem someting fo rememba layta on. (Check out Ezekiel 33:33.) Maybe dey going tink back to da warning we wen give dem, an dat going make dem like serve Jehovah befoa too late. Dass how was fo da jaila guy in Philippi dat wen start fo lissen ony afta “da groun shake real hard.” Some going lissen ony afta dat mayjah ting happen, wen Babylon da Great get smash.​—Jesus Guys 16:25-34.

WE PREACH CUZ WE LOVE JEHOVAH AN HIS NAME

11. How we show Jehovah stay awesome, show respeck fo him, an let him take charge a oua powa? (Jesus Show 4:11) (Go look da pichas.)

¹¹ Da mos importan reason why we like preach an tell oddas da good tings in da Bible is cuz we love Jehovah an his name. We look at preaching az one way fo show we love God an tell how awesome him. (Read um Jesus Show 4:11.) We full on agree wit dese words about Jehovah, “You Da One in Charge a us guys, an you oua God! You stay spesho fo get da right fo erybody tell dat you stay awesome an show respeck fo you, an let you take charge a dea powa.” We show dat Jehovah stay awesome an we get respeck fo him wen we share wit peopo proof dat  he “wen make eryting,” an is ony cuz a him dat we stay alive. We let Jehovah take charge a oua powa wen we use oua time, energy, an da stuff we get fo preach az much az can. (Mat 6:33, NWT; Luk 13:24; Col 3:23) Is simpo, we love fo talk about da God we love. An we like tell oddas about his name an da kine God he is. How come?

12. How we show we get plenny respeck fo Jehovah’s name wen we go preach?

¹² Cuz we love Jehovah, we show plenny respeck fo his name. (Mat 6:9, NWT) We like help clear his name from all da pilau lies Satan wen tell about him. (Start 3:1-5; Job 2:4; John 8:44) Wen we preach, we no can wait fo stan up fo Jehovah an tell da trut about him. We like erybody know dat his numba one quality is love, da way he rule is fair, an dat pretty soon his govament going wipe out suffaring an erybody going be happy. (Songs 37:10, 11, 29; 1 John 4:8) Wen we tell peopo dese tings about Jehovah, we show we get plenny respeck fo his name. An we happy cuz we stay living up to oua name. How come we say dat?

13. Why we proud fo be called Witnesses Fo Jehovah? (Isaiah 43:10-12, NWT)

¹³ Jehovah wen pick us fo be his “witnesses.” (Read um Isaiah 43:10-12, NWT.) One letta from Jesus Luna Guys wen say, “Da mos unrealest ting fo us is fo be called one Witness Fo Jehovah.” c How come? Try tink about dis. If you had fo go court an you wen need somebody fo be one witness fo you, garans you would pick somebody you know  good an trus, somebody who get one good rep dat peopo would believe. By picking us fo be his Witnesses, Jehovah show dat he know us an dat he trus us. We so proud fo be one Witness fo him dat ery chance we get we tell wat we know about his name an shut down da lies dat peopo tell about him. Wen we do dat, we do wat oua name say we should do, we Witness Fo Jehovah!​—Songs 83:18; Rome 10:13-15.

WE GOING KEEP PREACHING TILL DA END

14. Wat we excited fo see pretty soon?

¹⁴ We excited fo see wat might happen pretty soon! Wit Jehovah’s blessing we hope fo see plenny moa peopo come into da trut befoa da big trouble start. An we excited fo da chance dat even afta da big trouble start, plenny moa peopo going come outa Satan’s world an start fo serve Jehovah wit us!​—Jesus Guys 13:48, NWT.

15-16. Wat we going keep doing, an till wen?

¹⁵ Till den, we get work fo do. We get da awesome chance fo preach about da good tings in da Bible all ova da earth, someting dat we neva going do again. Same time, we gotta keep warning peopo about wass going happen pretty soon. Erybody gotta know dat da end of dis pilau world going come fas. Wen dat time come, dey going know dat wat we wen preach wen come from Jehovah.​—Eze 38:23.

¹⁶ So wat we like do den? Love fo da good tings in da Bible, love fo peopo, an mos of all, love fo Jehovah an his name going make us go all out fo preach till Jehovah say, “Pau awready!”