1-2. Wat da “good kine work” eldas do?

 IF YOU one helpa guy, you probly wen work hard fo get some of da qualities you need fo come one elda. You like help yoa braddahs an sistahs moa by doin dat “good kine work”?​—1 Tim 3:1, NWT.

² Wat kine work one elda do? He set one good exampo in field service, work hard fo shepherd an teach, an build up da local hui by wat he say an do. Dass how come da Bible call da eldas “guys dass gifs.”​—Efe 4:8, NWT.

3. How one braddah can qualify fo be one elda? (1 Fo Timoty 3:1-7; Titus 1:5-9)

³ How one braddah can come one elda? Qualifying az one elda iz not jus about da skills you get. In da world, mos times fo get one job all you need iz da skills da boss stay looking fo. On da odda hand, fo come one elda you gotta do moa den jus preach an teach good. You gotta meet da qualifications da Bible tell fo eldas in 1 Fo Timoty 3:1-7, NWT an Fo Titus 1:5-9. (Read um.) In dis lesson we goin go ova three tings eldas gotta do, get one good rep inside an outside da local hui, be one good exampo az head of da family, an be ready fo help da braddahs an sistahs in da local hui.

 GET ONE GOOD REP

4. Wat mean fo “do eryting da right way”?

⁴ Fo come one elda you gotta “do eryting da right way,” dat mean you get one good rep in da congregation an nobody can say dat you do anyting real bad. On top of dat, you goin have “one good rep wit da peopo” dat no stay in da congregation. Peopo who no worship Jehovah might talk stink about wat you believe. But dey no should be able fo say dat you not honest an dat you not one good person. (Dan 6:4, 5) Can ask yoaself, “I get one good rep inside an outside da local hui?”

5. How you can show you “feel good inside wen good tings happen”?

⁵ If you “feel good inside wen . . . good tings happen,” you look fo da good kine qualities in oddas an tell dem mahalo fo wat dey do. You goin be happy fo do good tings fo oddas, even stuff dey no expeck you fo do. (1 Tess 2:8) How come dis iz so importan fo eldas? Cuz dey goin be happy fo use plenny of dea time fo take kea da braddahs an sistahs. (1 Pet 5:1-3) Even tho dis iz plenny work fo dem, dey goin be supa happy fo help oddas.​—Jesus Guys 20:35.

6. How you can show aloha to all kine peopo? (Fo Da Hebrew Peopo 13:2, 16; go look da picha.)

⁶ “Wen peopo . . . come stay his place, he show dem aloha” an he do dat fo erybody, not jus da guys who stay his close frenz. (1 Pet 4:9) One Bible dictionary say dat one guy lidis iz nice even to peopo he donno an he happy fo invite dem to his house. Try ask yoaself, “Wat kine rep I get? Peopo kno me fo be somebody who stay nice to guys who come visit my local hui?” (Read um Fo Da Hebrew Peopo 13:2, 16.) One braddah who show aloha goin be nice wit all kine peopo who visit, like da guys who no moa money, braddahs who come fo give talks, an da guys who work hard fo da hui, like circuit ovaseahs.​—Start 18:2-8; Smart Guys 3:27; Luk 14:13, 14; Jesus Guys 16:15; Rome 12:13.

7. How one elda show he no love money?

 ⁷ “No love money.” Dis mean dat money an stuff no stay da mos importan tings to you. Wedda you get plenny money or ony litto bit, serving Jehovah stay da mos importan ting in yoa life. (Mat 6:33, NWT) You goin use yoa time, energy, an odda stuff you get fo worship Jehovah, take kea yoa family, an help da congregation. (Mat 6:24, NWT; 1 John 2:15-17) Try ask yoaself, “How I feel about money? I good wit jus having da tings I need fo live? Or I always trying fo get moa money an moa stuff?”​—1 Tim 6:6, 17-19.

8. How you can show you kno how fo hold back wen you gotta hold back, an you in charge of how you ack?

⁸ If one braddah “know how fo hold back wen he gotta hold back,” an “he in charge a how he ack,” eryting in his life goin be balance. Dis mean you not goin eat or drink too much, how you dress an make yoa hair goin show respeck, an you goin make good choices in da fun tings you do. You not goin copy how erybody in da world stay. (Luk 21:34; Jam 4:4) You keep one cool head even wen peopo ack up to you. You “no get piloot,” an you no moa one rep fo suck um up plenny. Try ask yoaself, “I kno how fo hold back wen I gotta hold back an I stay in charge of how I ack?”

9. Wat mean fo “know how fo ack erytime” an “get one good rep fo do da right tings”?

⁹ If you “know how fo ack erytime,” you goin tink about wat da Bible tell befoa you do someting. Wen you tink plenny about wat da Bible tell about tings, dat goin help you make akamai choices. You no ack fas, but you make shua you get all da facts firs. (Smart Guys 18:13) Wen you do dat, you goin get Jehovah’s tinking on stuff an make smart choices. If you “get one good rep fo do da right tings,” you goin be organize an on time. Erybody goin kno dat dey can count on you an dat you goin do um da right way. Wen you get all dese qualities, you goin get one good rep. Now we goin talk about da qualities one elda gotta have fo set one good exampo az head of da ohana.

TAKE KEA YOA OHANA REAL GOOD

10. How one braddah can “handle his ohana real good”?

¹⁰ If you one husban an like be one elda, yoa ohana gotta have one good rep too. You gotta “handle [yoa] ohana real good.” Peopo can see dat you show love to yoa family an you make good choices fo dem. You do ohana worship, you make shua dey go meetings, an you help dem fo do dea bes in field service. How come dass so importan? Da aposal Paul wen help dem undastan, “if get one guy dat donno how fo handle his ohana, how he goin take kea” God’s hui?​—1 Tim 3:5.

11-12. How one braddah’s family can affeck if he qualify? (Go look da picha.)

¹¹ If you one faddah, yoa kids dass unda 18 gotta “lissen an show respeck” fo you. You gotta teach an train um wit love. But rememba, you like dem be happy, laugh, an play, cuz dey kids. But you still gotta teach dem fo lissen, respeck oddas, an kno how fo ack. An do yoa bes fo help yoa kids come frenz wit Jehovah, do wat da Bible tell, an work on getting baptize.

 ¹² “His kids gotta trus God fo nobody tell, “Dose kids, dey party all da time an dey no lissen.”” If one kid dat stay in da trut an live at home sin mayjah kine, an his faddah one elda, how dat goin affeck da faddah? If da faddah neva train an discipline his kid, pretty much garanz da faddah no qualify fo be one elda.​—Go look da Octoba 15, 1996, magazine of The Watchtower, p. 21, pars. 6-7.

TAKING KEA DA LOCAL HUI

13. How you can show you not “hard head” an “know how fo make nice to peopo”?

¹³ Braddahs who get dese good kine qualities iz one big help to da local hui. One braddah dat “know how fo make nice to peopo” work hard fo keep peace wit oddas. If you like odda peopo look at you lidat, you gotta be able fo lissen an undastan how dey tink an feel. In one meeting, if mos of da eldas make one decision dat match up wit wat da Bible tell, you goin go wit wat dey like even tho you like someting else? If you not “hard head” an you “lissen da odda guy,” dat mean you not goin always try get yoa own way. You like fo hea wat odda peopo get fo say. (Start 13:8, 9; Smart Guys 15:22) You “no like make argue wit nobody” or “get mad fas.” You no fight wit oddas, but you show respeck an stay nice to dem. You work hard fo make peace wit oddas even wen times iz stressful. (Jam 3:17, 18) You can help guys fo stay calm wen you talk nice to dem, even da guys who no agree wit wat we believe.​—Leadas 8:1-3; Smart Guys 20:3; 25:15; Mat 5:23, 24, NWT.

14. Wat mean fo “trus God long time” an be “good an spesho fo God all da time”?

¹⁴ One braddah who qualify fo be one elda “trus God long time.” Iz not dat you gotta be baptize fo real long, but you need time fo come one solid Christian. Befoa you come one elda, like  Jesus, you gotta be humbo an willing fo wait on Jehovah fo give you moa work in da local hui. (Mat 20:23; Php 2:5-8, NWT.) You can show dat you “good an spesho fo God all da time” by sticking to Jehovah an living da way he like you live, an by lissening to wat he tell tru his hui.​—1 Tim 4:15.

15. One elda gotta be one real good speaka o wat? Explain um.

¹⁵ Da Bible say dat eldas gotta “know how fo teach peopo stuff.” Dis mean you gotta give unreal talks? No. Plenny eldas not da bes at giving talks, but dey teach real good in field service an on shepherding calls. (1 Fo Timoty 3:2; go check 1 Fo Da Corint Peopo 12:28, 29 an 1 Fo Da Efesus Peopo 4:11.) Still yet, you gotta work hard at coming one betta teacha. How you can do dat?

16. How you can come one betta teacha? (Go look da picha.)

¹⁶ “He gotta stick wit da kine stuff us guys teach . . . da kine stuff you can trus.” Fo be one good teacha, make shua dat da stuff you teach an da advice you give come from da Bible. Fo do dis, you gotta study da Bible an oua publications real good. (Smart Guys 15:28; 16:23) Wen you study, try see how da publications explain da Scripchas so dat you undastan um da right way. An wen you teach, try hard fo reach da heart of yoa lissenas. Talk to eldas dat get plenny experience fo come one betta teacha. (1 Tim 5:17) Eldas gotta kno how fo “give . . . good kine words” to dea braddahs an sistahs. But dey gotta “know how fo make dem see dat dey wrong” sometimes too. Eidda way, eldas gotta be nice. If you gentle an show love an wat you teach come from da Bible, you goin be one good teacha cuz you stay copy Jesus, da Bestes Teacha eva.​—Mat 11:28-30; 2 Tim 2:24.

 KEEP TRYING FO DO MOA

17. (a) Wat can help one servant keep trying fo do moa? (b) Wat eldas gotta rememba wen seeing if one braddah qualify fo be one elda? (Go look da box “ Wen Seeing If Somebody Qualify Fo Be One Elda, No Expeck Dem Fo Be Perfeck.”)

¹⁷ Afta looking at all da qualities one elda need, some servants might feel dat dey neva goin qualify. But no foget dat Jehovah an his hui no expeck you fo do all dese tings perfeck. (1 Pet 2:21) An iz Jehovah’s powaful spirit dat goin help you fo get dese qualities. (Php 2:13) Get one quality dat you like be betta in? Pray to Jehovah about um. Do research on um an ask one elda how he tink you can get betta at um.

18. Wat all helpa guys should keep trying fo do?

¹⁸ All of us, even da guys who stay eldas awready, gotta keep trying fo get da qualities we wen talk about in dis lesson. (Php 3:16) You one helpa guy? Keep trying fo do moa! Ask Jehovah fo teach you fo do moa fo him an da hui. (Isa 64:8) Garanz Jehovah goin bless you fo eryting you do fo qualify fo come one elda.