1. How da aposal Paul wen feel about da helpa guys?

 HELPA guys, or servants, do importan work in da hui. Da aposal Paul wuz tankful fo dese solid braddahs. Dass how come wen he had write to da braddahs in Philippi, he wen make shua fo tell aloha to da helpa guys an not jus da eldas.​—Php 1:1.

2. How braddah Luis feel about bein one helpa guy?

² No matta da age, plenny baptize braddahs stay real happy fo be helpa guys. Like Devan, who wuz 18 wen he had come one helpa guy. On da odda hand, one braddah name Luis wuz in his 50’s wen he came one helpa guy. He wen say “I so happy fo help my braddahs an sistahs in da local hui. Dey wen show me so much love an now I can show my love fo dem!” Plenny helpa guys feel da same way.

3. Wat questions we goin talk about?

³ If you one baptize braddah, but you no stay one servant yet, you can make dat one goal? Wat can make you like do dat? An wat da scripchas tell you gotta do fo qualify fo come one servant? In dis lesson, we goin ansa dose questions. But firs, we go talk about wat one servant do.

 HOW DA SERVANTS HELP DA HUI?

4. Wat da helpa guys do? (Go look da picha.)

⁴ One helpa guy iz one baptize braddah dat Jehovah wen pick wit his spesho spirit fo help da eldas take kea of plenny stuff in da local hui. Some helpa guys make shua dat erybody get enuff territory an stuff dey need fo go preach. Oddas help clean an take kea da Kingdom Hall. Helpa guys work az attendants an run da soun an video fo da meetings wit da local hui. Plenny of da work da servants do iz one big help fo erybody. But da mos importan ting iz da helpa guys love Jehovah an live da way He like. An dey get real kine love fo dea braddahs an sistahs. (Mat 22:37-39) How one baptize braddah can do moa fo be one helpa guy?

5. If you like come one helpa guy, wat you gotta do?

⁵ Da Bible tell us da qualities one braddah need fo come one helpa guy. (1 Tim 3:8-10, 12, 13) If you like come one helpa guy an kokua oddas, look real hard wat da Bible tell you gotta do fo qualify an den work hard fo do um. But firs, try ask yoaself how come you like be one helpa guy.

WHY YOU LIKE COME ONE HELPA GUY?

6. Wat should make you like work hard fo yoa braddahs an sistas? (Matthew 20:28; go look da picha.)

⁶ Tink about da bes exampo Jesus, eryting he did wuz cuz he love his Faddah an peopo. His love had make him like work hard fo oddas an do work dat odda peopo neva like do. (Read um Matthew 20:28; John 13:5, 14, 15) If love make you like do moa, den Jehovah goin bless you an help you fo come one servant.​—1 Cor 16:14; 1 Pet 5:5.

7. How come one braddah no should do stuff jus fo look importan?

⁷ In da world peopo look up to da guys dat make demselfs look importan. But dass not how stay in Jehovah’s hui. One braddah who love oddas like Jesus did, no goin like be da boss ova erybody, an he no like oddas tink  he importan. If somebody who high makamaka wuz fo come one helpa guy in da hui, he probly no goin like do some of da work dat no look importan fo take kea Jehovah’s peopo. He might tink he too good fo do dose kine jobs. (John 10:12) Jehovah not goin bless da guys who ony do stuff fo look importan.​—1 Cor 10:24, 33; 13:4, 5.

8. Wat Jesus wen tell his aposals fo help dem?

⁸ Had times even Jesus close frenz wen do stuff fo da wrong reasons. Tink about wat two of da aposals, James an John, wen do. Dey wen ask Jesus fo give dem one spesho kuleana in his govament. Jesus neva like dat dey wen ask dis. He wen tell da 12 aposals, “whoeva like be da leada guy, he gotta be da helpa guy firs . . . whoeva like be da numba one guy, he gotta do wat you guys tell him fo do.” (Mar 10:35-37, 43, 44) Braddahs who like do moa an help oddas fo da right reason goin be one blessing to da hui.​—1 Tess 2:8.

WAT CAN MAKE YOU LIKE WORK HARD FO YOA BRADDAHS?

9. Wat can make you like work hard fo yoa braddahs?

⁹ Fo shua you love Jehovah an you like help oddas. But maybe you no like do da extra work dat helpa guys gotta do. Wat can make you like do dis work? Try tink how happy you goin be wen you do tings fo yoa braddahs an sistas. Jesus tell, “Da guy dat give, he stay mo betta inside den da guy dat get.” (Jesus Guys 20:35) Jesus neva ony say dis but he wen do um too. He wuz real happy fo help oddas, an you can be too.

10. How Jesus wen show dat he wuz happy fo help oddas? (Mark 6:31-34)

¹⁰ Try look how Jesus wen show he wuz happy fo help oddas. (Read um Mark 6:31-34.) One time Jesus an his aposals wuz real tired. Dey wuz goin someplace wea nobody wuz aroun fo get some res. But choke peopo wen get dea befoa dem cuz dey wanted fo learn from Jesus. He coulda told dem not now cuz dey “neva have chance fo eat.” Or he coulda teach dem ony coupo stuff an tell um fo go. But cuz he get plenny love, he “start fo teach um plenny stuff.” An he wen teach dem till “da sun go down.” (Mar 6:35) He neva do um cuz he had fo do um. He wen do um cuz “he get pity fo dem.” Cuz he wen love dem he wanted fo teach dem. Helping oddas wen make Jesus real happy.

11. Wat odda way Jesus wen help his lissenas? (Go look da picha.)

¹¹ Wen Jesus wen help da peopo by teaching dem about God, he wen help dem in odda ways too. He wen get enuff food fo erybody an wen ask his guys fo give um to da peopo. (Mar 6:41) By doin dis he wen teach his guys how fo take kea oddas. An he wen show dem dis kine work iz importan, da same kine work helpa guys do. Tink how happy da aposals wuz fo work wit Jesus wit dis miracle fo give erybody food till “dey all eat an come full.” (Mar 6:42) Dis no wuz da ony time Jesus wen put oddas befoa himself. Da whole time he wuz on eart he wen help peopo. (Mat 4:23; 8:16) Had make Jesus come real happy fo help oddas an take kea da tings he  need. Garanz you goin be happy wen you work hard fo be one helpa guy an kokua oddas.

12. Why we no need tink dat we no moa notting fo offer da hui?

¹² If you feel like you no moa notting good fo offer, no get bum out. Garantee you get good qualities dat can help da local hui. Might be good fo you pray an read wat Paul tell in 1 Fo Da Corint Peopo 12:12-30. Paul wen make um clear dat erybody get one importan paht in da local hui. If you no qualify fo be one helpa guy yet, no kill fight. Instead, try do wateva you can fo serve Jehovah an help yoa braddahs. Kno dat da eldas tinking about you an goin give you work you can hando.​—Rome 12:4-8.

13. How come we no like tink iz too hard fo come one helpa guy?

¹³ Try tink about anodda reason you should try work hard fo come one helpa guy. Wat you need fo qualify fo be one helpa guy iz stuffs dat all Christians should be doin. All Christians gotta try get close to Jehovah, stay happy fo help oddas, an live in one way dat make God happy. You probly get mos of da qualities you need fo be one helpa guy already. Wat odda tings braddahs gotta do fo come one helpa guy?

WAT WORK YOU GOTTA DO FO COME ONE HELPA GUY

14. Wat mean fo be “solid”? (1 Fo Timoty 3:8-10, 12)

¹⁴ We go look at wat 1 Fo Timoty 3:8-10, 12 (Read um) tell fo qualify. One helpa guy gotta be “solid,” dat can be translated “serious,” somebody “peopo get respeck fo.” Dat no mean you no can laugh or have fun. (Teacha 3:1, 4) But dat mean you work hard fo take kea yoa kuleana. If you always finish yoa work an you do um good, den da braddahs an sistahs in da hui kno dat dey can trus you an dey goin respeck you fo dat.

15. “Dey gotta mean wat dey tell” an “dey not greedy”, wat iz dat?

¹⁵ “Dey gotta mean wat dey tell.” Dat mean you no stay two face, you tell da trut, an peopo can trus you. You do  wat you say you goin do an you no lie to oddas. (Smart Guys 3:32) “Dey not greedy” mean you not shady wen you do bizness an you honest in da way you hando money. Inside da hui you no use yoa frenz an take advantage of dem jus fo make money.

16. (a) “Betta not drink plenny”, wat dat mean? (b) Wat mean fo “do wass right in front God”?

¹⁶ “Betta not drink plenny” mean you no drink too much alcohol or you get da rep fo be one heavy drinker. An fo “do wass right in front God” mean dat you follow da rules Jehovah tell. Even tho you no stay perfeck, you feel good inside cuz you kno you stay tight wit God.

17. How one braddah can show he can be trusted fo hando kuleana? (1 Fo Timoty 3:10; go look da picha.)

¹⁷ “Check um out real good firs fo know” if dey can hando dea kuleana. Dat mean da eldas wen see dat dey can trus you wit yoa kuleana. So wen da eldas give you someting fo do, make shua you do wat dey tell you an follow da instrucktions from da hui. Make shua dat you kno wat you gotta do an wen you gotta be pau wit um. Wen you do yoa work real good, da braddahs an sistahs in da hui goin see dat you stay coming one solid braddah. Eldas, look fo da baptize braddahs fo train. (Read um 1 Fo Timoty 3:10.) Get any baptize braddahs in yoa hui dat stay teenagers or younga? Dey do one good job studying on dea own an making ready fo da meetings? Dey ansa at da meetings an go field service? If dey doin all dat, give dem tings fo do dat dey can hando at dea age. Den dese young braddahs can show dat dey can hando kuleana real good. Den by da time dey come olda teenagers, dey get chance fo qualify fo come helpa guys.

18. Wat mean fo “do da right ting”?

¹⁸ “Dey do da right ting” mean dat no one can really say dat you do anyting real bad. Az tru, peopo can tell bulais about you. Peopo wen tell bulais about Jesus, an he tell dat peopo would do da same to his followas. (John 15:20) But, if you keep doin wass good, like  Jesus, you goin get one good rep in da hui.​—Mat 11:19.

19. Wat mean fo “stay tight wit dea one wife”?

¹⁹ “Stay tight wit dea one wife.” If you stay married, you gotta follow how Jehovah wen make da firs marriage, between one guy an one wahine. (Mat 19:3-9) One Christian neva should fool aroun wit anybody dey no stay married to. (Heb 13:4) But get moa den dat. You gotta stick wit yoa wife, an neva give odda wahines romantic kine attention.​—Job 31:1.

20. How one braddah hando his “ohana da right way”?

²⁰ “Dey gotta handle dea kids an dea ohana da right way.” If you one head of da ohana, you gotta take kea yoa kuleana real good. Do ohana worship ery week. Preach wit yoa wife an yoa kids az much az can. Help yoa kids get dea own relationship wit Jehovah. (Efe 6:4) One braddah who take kea his family show dat he can take kea da local hui.​—Go check 1 Fo Timoty 3:5.

21. Wat you can do if you not one helpa guy yet?

²¹ Braddahs, if you not one helpa guy yet, read dis lesson an pray about um. Look real good wat you gotta do fo come one helpa guy an work hard fo qualify. Tink about how much you love Jehovah an yoa braddahs an sistahs. Tink about why you like help dem, an make dat feeling moa strong. (1 Pet 4:8, 10) You goin be real happy wen you work hard fo yoa spiritual ohana. Jehovah goin full on bless wat you do fo come one helpa guy!​—Php 2:13.