1. Wat one angel wen say, an wat dat mean fo us?

 IF ONE angel wen talk to you, you would lissen to wat he tell? Today, one angel stay talking to “all da diffren countries, an ohanas, an diffren language, an peopos.” Wat he saying? “Show respeck fo God an tell how awesome he stay . . . show love an respeck to da One dat wen make da sky, [an] da earth.” (Jesus Show 14:6, 7) Jehovah da ony God dass fo real, an erybody should worship him. We can be supa tankful dat he wen give us da spesho chance fo worship him in his awesome spiritual temple!

2. Wat is Jehovah’s spiritual temple? (Go look da box “ Wat Not.”)

² Wat is da spiritual temple, an wea we can find out moa about um? Da spiritual temple, az not one building. Az wat Jehovah wen set up fo worship him da right way, thru Jesus sacrifice. Da aposal Paul wen tell about wat Jehovah wen set up in his letta he wen write to da Hebrew Christians who wen live Judea. b

3-4. How come Paul was worried about da Hebrew Christians who live Judea, an how he wen kokua dem?

³ How come Paul wen write his letta to da Hebrew Christians who wen live Judea? Probly fo two reasons. Numba one, fo tell dem good kine tings. Mos of dem wen get raise in da Jew religion. Da Jew leada guys maybe  wen tease um cuz dey wen come Christians. How come? Cuz da Christians neva have one fancy temple fo worship, neva have one altar fo make sacrifice to God, an neva have pries fo serve dem. Dat coulda wen bum out Jesus followas an make dea faith come all weak. (Heb 2:1; 3:12, 14) Some of dem maybe even wen tink about going back to da Jew religion.

⁴ Numba two, Paul wen go tell dose Hebrew Christians dat dey no was trying hard enuff fo undastan da deepa spiritual tings, da “solid stuff” dat stay inside da Bible. (Heb 5:11-14) Some of dem still was following da Rules From Moses. Paul wen say dat da sacrifices da Rules wen tell dem fo make, no could full on wipe out dea sin. Dass how come “God wen throw out da ol rules.” Paul wen go teach dem da deepa tings inside da Bible. He wen tell dose Christians dat “God give us someting mo betta,” so dat dey could “stay tight wit him,” an dass ony cuz Jesus wen mahke.”​—Heb 7:18, 19.

5. Wat we gotta undastan inside Fo Da Hebrew Peopo, an how come?

⁵ Paul wen show his Hebrew braddahs why dea worship to Jehovah now was way moa betta den befoa. Da way da Rules wen tell da Jews fo worship, az “one shadow ony fo show wat goin happen bumbye, but Christ, he da One dass fo real!” (Col 2:17) One shadow, az ony one shape of someting, az not da real ting. So da way da Jew religion wen worship was ony one shadow of one betta way fo worship dat was going come layta on. We gotta undastan wat Jehovah wen set up so dat oua sins can get let go an we can worship him da way he like. We go look in Fo Da Hebrew Peopo an see how da “shadow” (da way da Jew religion wen worship) match up wit wass “fo real” (da Christian way fo worship). If we do dat, we going undastan da spiritual temple moa betta, an wat dat mean fo us.

6. How dey wen use da tent?

⁶ Da shadow. Paul wen use da tent Moses wen set up in 1512 B.C.E fo talk to da Hebrew peopo. (Go look da chart “Da  Shadow, Fo Real.”) Da place da Israel peopo wen go fo worship God an give him sacrifice, dey wen call um Da Tent Fo Come Togedda Wit God. (Egypt 29:43-46) Da Israel peopo wen carry um wit dem wen dey was moving aroun inside da boonies. (Egypt 25:8, 9; Cens 9:22) Dey wen use um fo almos 500 years until dey wen build da temple in Jerusalem. But Da Tent Fo Come Togedda Wit God wen picha someting way moa betta dat was going happen fo da Christians bumbye.

7. Wen da spiritual temple wen come fo real?

⁷ Wass fo real. Da tent from long time ago was “one copy a da real place dat stay wit God inside da sky,” an wen picha Jehovah’s awesome spiritual temple. Paul wen say dat dis tent was “jalike one picha fo teach us guys nowdays.” (Heb 8:5; 9:9) By da time he wen write to da Hebrew peopo, awready had da spiritual temple. Wen start in 29 C.E. Dat year, Jesus wen get baptize, was anointed wit spesho spirit, an started fo serve az Jehovah’s “bestes Main Pries Guy” in da spiritual temple. c​—Heb 4:14; Jesus Guys 10:37, 38.

8-9. In Fo Da Hebrew Peopo 7:23-27, wat mayjah diffrence get between all da main pries fo Israel an da bestes Main Pries, Jesus Christ?

⁸ Da shadow. Da main pries wen rep da peopo in front God. Jehovah wen pick Aaron fo be da firs main pries in Israel wen dey started fo use da tent fo worship. But Paul wen tell, “Befo time had plenny guys dat come pries. Dass cuz dey no can stay one pries long time. Dey all mahke, dass why.” d (Read um Fo Da Hebrew Peopo 7:23-27.) Cuz dey no was perfeck, dose main pries had fo make sacrifice fo dea own sins. Dat was da mayjah diffrence between all da main pries fo da Israel peopo, an da bestes Main Pries Guy, Jesus Christ.

⁹ Wass fo real. Oua Main Pries, Jesus “stay work inside da place . . . da real place wea God stay . . . not jalike da kine tent da peopo wen make.” (Heb 8:1, 2) Paul wen explain dat “Jesus, he da One dat stay live foeva, an he da kine pries dat stay foeva. Dass why no need anodda pries guy.” An Paul wen tell dat Jesus, “stay clean inside. He stay diffren den all da peopo dat stay do bad kine stuff.” An not like da main pries guys of da Israel peopo, “He no need make one sacrifice ery day” fo his own sins. Now check out da stuff dat stay diffren between da altars an sacrifices in da shadow an in wass fo real.

10. Wat da sacrifices on da bronze metal altar wen show da peopo?

¹⁰ Da shadow. In front da door fo da tent had da altar made of bronze metal wea dey wen sacrifice da animals to Jehovah. (Egypt 27:1, 2; 40:29) But dose sacrifices no could full on hemo da sins of da peopo. (Heb 10:1-4) Da sacrifice dey wen make erytime wit da animals at da tent wen show da peopo dat dey wen need one sacrifice dat would cut um loose from dea sins fo good.

11. Wat kine altar Jesus wen mahke on fo sacrifice his life? (Fo Da Hebrew Peopo 10:5-7, 10)

 ¹¹ Wass fo real. Jesus wen know dat Jehovah wen send him down to da earth fo mahke fo erybody. (Mat 20:28) Dass how come wen he wen get baptize, he wen give himself to Jehovah fo do wat God wanted him fo do. (John 6:38; Gal 1:4) Jesus neva mahke on one altar dat man wen make. Da altar he wen mahke on wen rep “wat God like him fo do.” God wanted him fo sacrifice his perfeck human life. Jesus wen mahke “dat one time” fo cova an full on hemo da sin of erybody who get faith in him. (Read um Fo Da Hebrew Peopo 10:5-7, 10.) Now we going look at wat da tings inside da tent mean.

12. Who could go inside da rooms dat stay in da tent?

¹² Da shadow. Da tent an da temple dey wen build layta on in Jerusalem was almos da same inside. Had two rooms, da Spesho Place an da Real, Real Spesho Place, an had one curtain in da middo of da two. (Heb 9:2-5; Egypt 26:31-33) Inside da Spesho Place had one stan fo da lamp, one altar fo burn incense, an one table wit da spesho bread fo God. Ony da pries guys dat God wen pick could go inside da Spesho Place fo take kea dea kuleana. (Cens 3:3, 7, 10) Da Real, Real Spesho Place had da box fo no foget  da deal wit God, an dat wen rep wea Jehovah stay. (Egypt 25:21, 22) Ony da main pries guy could go pas da curtain inside da Real, Real Spesho Place once a year on da Ceremony Fo Make Da Peopo Come Pono With Jehovah. (Pries 16:2, 17) Ery year, he wen go inside wit da animal blood fo hemo da sins fo him an fo all da Israel peopo. Afta a while, Jehovah wen use his spesho spirit fo make um clear wat all dese tings inside da tent wen mean.​—Heb 9:6-8.

13. Wat da Spesho Place an da Real, Real Spesho Place of da tent rep?

¹³ Wass fo real. Jehovah wen use his spesho spirit fo pick ony some of Jesus followas fo get one spesho relationship wit Him. Dose 144,000 going be prieses in heaven wit Jesus. (Jesus Show 1:6; 14:1) Da Spesho Place inside da tent rep da way God wen hanai dem spiritual kine az his kids, while dey still on da earth. (Rome 8:15-17) Da Real, Real Spesho Place inside da tent rep da place in heaven wea Jehovah stay. Da “curtain” dat was between da Spesho Place an da Real, Real Spesho Place rep Jesus body. So long he had dat body, he no could go heaven an be da Bestes Main Pries of da spiritual temple. Wen he wen mahke, he wen give up his body an open um up so dat all da guys dat God wen pick, could go heaven. Dem too gotta give up dea body if dey like go heaven. (Heb 10:19, 20; 1 Cor 15:50) Afta Jesus wen come back alive, he wen go inside da Real, Real Spesho Place of da spiritual temple, an all da guys God wen pick fo go heaven going go wit him.

14. In Fo Da Hebrew Peopo 9:12, 24-26, wat make da set up fo Jehovah’s spiritual temple moa betta?

¹⁴ Easy fo see da way Jehovah get um set up fo worship him is moa betta cuz Jesus wen mahke an he da main pries guy. Da main pries fo da Israel peopo wen go inside one Spesho Place dat man wen make wit animal blood, but Jesus wen go heaven “wea God stay” fo go in front Jehovah. Dea he wen hand ova to Jehovah da value of his perfeck human life fo us, “fo be da sacrifice an throw out all da bad kine stuff foeva.” (Read um Fo Da Hebrew Peopo 9:12, 24-26.) Cuz Jesus sacrifice going wipe out sin foeva, no moa notting betta den dat. Now we go learn how all us can worship Jehovah inside his spiritual temple, no matta we going heaven o we going stay on top da earth.

15. Who wen work in da open lanai aroun da tent?

¹⁵ Da shadow. Da tent had one yard, o open lanai, dat had one fence aroun um wea da prieses could take kea dea kuleana. Da big bronze metal altar wea da pries could make dea sacrifice was inside da yard. Da bronze metal watta tank wea da pries would use fo wash befoa dey do dea pries kine work was ova dea too. (Egypt 30:17-20; 40:6-8) Da temples dey wen go build layta on had one outside yard wea da guys who no was prieses could go fo worship God.

16. Who work in da two yards of da spiritual temple?

¹⁶ Wass fo real. Befoa going heaven fo serve az prieses wit Jesus, da anointed braddahs on earth take kea dea kuleana in da inside yard of da spiritual temple.  Da big watta tank was one importan reminda fo erybody fo stay clean in da way dey live an da way dey worship. So den, wea da “uku plenny peopo,” who back up Christ anointed braddahs, serve Jehovah? Da aposal John seen dem “stan in front God throne,” dass da outside yard wea dey “work fo him all da time inside his temple.” (Jesus Show 7:9, 13-15) We supa tankful dat we get one place in wat Jehovah wen set up fo worship him da right way in his spiritual temple!

17. Wat kine sacrifices we get da spesho chance fo give Jehovah?

¹⁷ All Christians today get da spesho chance fo sacrifice to Jehovah wen dey use dea time, powa, an odda tings dey get fo serve him. Da aposal Paul wen go tell da Hebrew Christians dat dey can “make sacrifice fo show dey like tell plenny good tings bout God . . . all da time bout how God stay.” (Heb 13:15) We can show we supa tankful we get da chance fo worship Jehovah if we always do eryting we can fo give him oua bes.

18. In Fo Da Hebrew Peopo 10:22-25, wat we gotta always do an wat we no can foget?

¹⁸ Read um Fo Da Hebrew Peopo 10:22-25. Da ending part of his letta to da Hebrew peopo, Paul wen tell about diffren tings we gotta always do fo worship Jehovah. Tings like praying to Jehovah, preaching to oddas, getting togedda wit da local hui, an telling each odda good kine words “mo plenny.” In da ending part of da book Jesus Show, Jehovah’s angel wen say two times fo show how importan is, fo “Show love an respeck fo God!” (Jesus Show 19:10; 22:9) So neva foget all da deep tings we wen learn about Jehovah’s awesome spiritual temple an da spesho chance we get fo worship oua unreal God!