1. How Jehovah feel about his peopo?

 JEHOVAH see eryting his peopo go tru. He kno wat make us happy an wat make us sad. (Songs 37:18) He stay so happy wit us, wen we do oua bes fo serve him even tho we struggle wit feelings dat hurt us inside. On top of dat, he really like help us fo feel betta.

2. Wat Jehovah do fo dose who stay hurt inside, an wat we gotta do fo benefit from Jehovah’s kea?

² Songs Fo God 147:3 tell dat Jehovah “put one bandage on top da place dat stay hurt” fo dose who stay real soa inside. Dis scripcha show how Jehovah show love an take kea dose who stay hurt inside. Wat we gotta do fo benefit from Jehovah’s kea? Tink about dis word picha. One good docta can do plenny fo help heal one injured person. In orda fo da injured person come betta dey gotta lissen wat da docta tell. In dis lesson, we goin see wat Jehovah tell in da Bible to dose who stay soa inside an we goin go ova how fo use wat he tell.

JEHOVAH REMIND US WE WORT PLENNY TO HIM

3. How come some feel like dey wort notting?

³ We live in one world wea no moa love, an plenny peopo feel like dey wort notting. One sistah name Helen a tell, “I wen grow up in one family dat neva show love. My dad wuz violent, an would tell us eryday how good fo notting we wuz. Maybe jus like Helen, somebody treat you bad, put you down all da time, or make you feel like you wort notting. If dass tru fo you, you probly find um hard fo believe dat anybody really kea fo you.

4. In Songs Fo God 34:18, wat we kno fo shua Jehovah goin do?

 ⁴ Even if oddas wen treat you bad, you can kno fo shua Jehovah love you an dat you wort plenny to him. He “goin stay real nea you” if you feel sad inside. (Read um Songs Fo God 34:18.) If you feel “bus up inside,” rememba dat Jehovah wen bring you to him cuz he saw all da good tings in you. (John 6:44) He always ready fo help you cuz he love you plenny.

5. Wat we can learn from how Jesus wen treat peopo who wen feel like dey wuz wort notting?

⁵ We can learn how Jehovah feel by looking at wat Jesus wen do. Wen Jesus wuz on eart, he wuz real nice to peopo who wen feel like dey wuz wort notting cuz of how oddas wen treat dem bad. (Mat 9:9-12) Wen one wahine who wuz hoping fo come good again from bein sick long time wen touch his clothes, Jesus wen give her good kine words, an tell how awesome her faith wuz. (Mar 5:25-34) Jesus had copy his faddah perfeck. (John 14:9) So you can kno fo shua dat you wort plenny to Jehovah an he see da good in you, like yoa fait an love fo him.

6. Wat you can do if you eva wen feel like you wuz wort notting?

⁶ Wat you can do if you eva wen feel like you wuz wort notting? Read scripchas dat remind you how much you wort to Jehovah an tink about um plenny. b (Songs 94:19) No compare yoaself to oddas an no get stuck tinking about wat you no can do. Jehovah no expeck you fo do moa den you can do. (Songs 103:13, 14) If you wen suffa from abuse in da  pas, no blame yoaself fo wat da guy who wen abuse you wen do. Cuz dass not yoa fault! Rememba dat Jehovah goin judge dose who treat oddas bad, an help da ones who suffa. (1 Pet 3:12) Sandra, who wen get abuse az one kid wen tell, “I ask Jehovah all da time fo help me see myself in one good way, da way he see me.”

7. How we can use wat we wen go tru in life fo help oddas wen we preach?

⁷ No tink Jehovah no can use you fo help oddas. You get fo work togedda wit him in da preaching work an dass real spesho. (1 Cor 3:9) Maybe iz moa easy fo you undastan how dose who suffa feel cuz of wat you wen go tru in life. You can do plenny fo help dese guys. Helen, who we wen talk about befoa, wen get help an now she can help oddas moa betta. She tell, “I wen feel like I wuz notting, but Jehovah wen show me his love an wen use me fo help oddas.” Helen stay stoked fo serve az one full time pionea.

JEHOVAH FOGIVE US FULL ON

8. Wat Jehovah tell us in Isaiah 1:18, NWT?

⁸ Some of Jehovah’s peopo get stuff from dea pas dat still yet bodda dem, wedda az from befoa dey wen get baptize or afta. But no foget, Jehovah wen give us da ransom cuz he love us real plenny. Fo shua he like us accept his gif. Jehovah like us kno fo shua dat wen we “make tings right” c wit him, he fogive us full on. (Read um Isaiah 1:18, NEW WORLD TRANSLATION) We so tankful dat Jehovah love us so plenny dat he choose fo foget da sins we wen do in da pas! An still yet, he always rememba da good stuff we wen do.​—Songs 103:9, 12; Heb 6:10.

9. How come we should keep tinking about wat we do now an in da future radda den tinking about da pas?

⁹ If bad stuff you wen do in da pas bodda you, try tink about wat you stay doin now an wat you can do in da future. Check out da exampo of da aposal Paul. He wish he neva bus up Christians so bad befoa, but he wen kno dat Jehovah had fogive him. (1 Tim 1:12-15) Did he keep tinking about his sins from da pas? Garanz he neva do dat, jus like he neva keep tinking about all da stuff he wen do fo come one Pharisee eidda. (Php 3:4-8, 13-15) But Paul wen keep goin all out fo preach an wen keep tinking about da future. Jus like Paul, you no can change da pas. But you can tell how awesome Jehovah stay an make him happy now. An you can tink about da unreal future he wen promise you.

10. Wat we can do if we wen do someting in da pas dat had hurt oddas?

¹⁰ Maybe you wen do someting in da pas dat wen hurt oddas, an dat bodda you. Wat can help you wit dat? Do wat you can fo make tings betta wit dem, like telling dem an showing dem you fo real kine sorry. (2 Cor 7:11) Ask Jehovah fo help da ones you wen hurt feel betta. He can help you an dem fo hang in dea an fo find peace again.

11. Wat we can learn from da exampo of da prophet Jonah? (Go look da picha.)

¹¹ Learn from yoa mistakes in da pas, an be ready fo let Jehovah use you in  wateva way he like. Try look da exampo of da prophet Jonah. He neva go to Ninevah like Jehovah wen tell him fo do, he wen run da odda way. Jehovah wen discipline Jonah, an he wen learn from his mistake. (Jonah 1:1-4, 15-17; 2:7-10) Jehovah neva give up on Jonah. God wen give him anodda chance fo go to Ninevah, an dis time he wen lissen fas. He neva let bad feelings from his mistake in da pas stop him from doin wat Jehovah wen tell him fo do.​—Jonah 3:1-3.

JEHOVAH HELP US FEEL BETTA WIT HIS SPESHO SPIRIT

12. How Jehovah give us peace wen we go tru someting real bad? (Fo Da Philippi Peopo 4:6, 7)

¹² Wen someting real bad happen to us, Jehovah use his spesho spirit fo help us feel betta. Try look wat wen happen to Ron an Carol. Sad fo say, dea boy wen kill himself. Dey tell, “We had fo go tru some hard times befoa, but dis wuz da hardes time eva. Had plenny nights we no could sleep, so we wen pray to Jehovah, an He wen give us peace like tell in Fo Da Philippi Peopo 4:6, 7.” (Read um.) If you stay real soa inside cuz someting bad wen happen to you, you can tell Jehovah how you feel. (Songs 86:3; 88:1) You can talk to him in praya anytime you like fo az long az you like. Keep asking Jehovah fo his spesho spirit. He always goin help you.​—Luk 11:9-13.

13. How Jehovah’s spesho spirit can help us fo keep worshipping him? (Fo Da Efesus Peopo 3:16)

¹³ You eva wen go tru someting real hard an feel like you no moa powa fo do anyting? Jehovah’s spesho spirit can give you da powa you need fo keep worshipping him. (Read um Fo Da Efesus Peopo 3:16.) Try look wat wen happen to one sistah name Flora. Her an her husban wuz serving togedda az missionaries an her husban wen fool aroun wit somebody else, so dey wen get divorce. She tell, “I no could tink about anyting else cuz I wuz so sad dat he wen betray me. I wen pray to Jehovah fo give me his spesho spirit fo keep goin. Jehovah wen help me feel betta an even tho wen seem like I no could get tru um at firs, he wen make me come strong an I wuz able fo hando wit his help.” Flora feel dat Jehovah wen help her trus him moa an dat he goin help her get thru all her problems. She say dat da words at Songs 119:32 tell how Jehovah wen help her. Da verse tell, “Weneva you tell me fo do someting, I goin run fo go do um, cuz you help me fo undastan stuff mo betta erytime!”

14. How we can let Jehovah’s spesho spirit help us?

¹⁴ Wat you should do afta you ask Jehovah fo give you his spesho spirit? Do tings dat goin give you moa chance fo God’s spirit help you. Some of dese tings can be goin meetings an preaching to oddas. Read da Bible eryday. (Php 4:8, 9) Dis goin help you get Jehovah’s tinking on tings. Wen you read da Bible, try look Bible guys dat wen get hard times an tink about how Jehovah wen help dem fo get tru um. Sandra who we wen talk about befoa, wen suffa from all kine problems. She tell, “Da story of Joseph wen really build me up. He neva let tings dat no wuz fair or any problems affeck his relationship wit Jehovah.”​—Start 39:21-23.

 JEHOVAH USES OUA BRADDAHS AN SISTAHS FO HELP US FEEL BETTA

15. Who can help us fo feel betta, an how dey can help us? (Go look da picha.)

¹⁵ Wen we stay goin tru hard times da braddahs an sistahs can kokua us plenny. (Col 4:11) Oua braddahs an sistahs iz one way dat Jehovah show his love fo us. Dey can help us feel betta wen dey make time fo be wit us an lissen to us vent how we feel. Maybe dey share one scripcha fo kokua us or dey pray wit us. d (Rome 15:4) Sometimes one braddah or sistah might remind us Jehovah’s tinking on tings an dat can help us fo keep oua balance an keep goin. Anodda ting oua braddahs an sistahs can do fo help us iz share food wit us fo make us feel betta.

16. Wat we might have fo do fo get help from oddas?

¹⁶ Sometimes we might have to ask oddas fo help us. Oua braddahs an sistahs love us an like help us. (Smart Guys 17:17) But maybe dey donno how we feel or wat we need. (Smart Guys 14:10) If you feeling junk, can talk to good frenz an tell um how you feel. Tell dem how dey can help you. Maybe you might talk wit one or two eldas dat  you stay close wit. Some sistahs wen feel betta afta dey wen talk to anodda solid sistah.

17. Wat tings can make um hard fo us get help, an wat we can do fo fix dat?

¹⁷ No spen too much time by yoaself. Cuz sometimes you might feel soa inside an you no like be aroun oddas. Sometimes maybe yoa braddahs an sistahs no undastan how you feel, or maybe dey say da wrong ting. (Jam 3:2) But no stay away from yoa braddahs an sistahs. Jehovah can use dem fo give you da help you need. One elda name Gavin who struggle wit depression tell, “Plenny times da las ting I like do iz talk or spen time wit my frenz.” But still yet Gavin try his bes fo be wit his braddahs an plenny times he feel betta wen he do dat. One sistah name Amy tell, “Cuz of my pas I get hard time fo trus peopo. But I stay learning fo love an trus my braddahs an sistahs like Jehovah does. I kno dis makes Jehovah happy an it makes me happy too.”

WE CAN FEEL BETTA CUZ OF JEHOVAH’S PROMISES

18. Wat we no can wait fo see happen in da future, an wat we can do now?

¹⁸ Pretty soon Jehovah goin hemo eryting dat hurt us or make us feel soa inside. (Jesus Show 21:3, 4, NWT.) Wen dat happen, da tings dat wen hurt us befoa, we not “goin even tink bout dat.” (Isa 65:17) Like we wen learn, Jehovah can make us come good even now. So use all da tings dat Jehovah give us fo help make us feel betta. Kno fo shua dat God kea an “get one big heart fo you guys.”​—1 Pet 5:7.