1. Wat iz some of da stuff Jesus wen do fo us?

 NOBODY wen eva do az much az Jesus fo help oddas. Wen he wuz on top da eart, he wen do miracles fo help peopo. (Luk 9:12-17) He gave da bestes gif eva by giving his life fo all us. (John 15:13) Eva since Jesus wen come back alive, he still been helping us. Jus like he wen promise, he wen ask Jehovah fo give his spirit fo teach an comfort us. (John 14:16, 17; 16:13) An tru oua meetings wit da local hui, Jesus give us wat we need fo make followas all ova da eart.​—Mat 28:18-20.

2. In Fo Da Efesus Peopo 4:7, 8, NWT who da “guys dass gifs”?

² Get someting else Jesus wen do fo us. Da aposal Paul wen write dat afta Jesus wen go heaven, “he wen give guys dass gifs.” (Read um Fo Da Efesus Peopo 4:7, 8, NWT.) Paul had explain dat Jesus wen give dese guys fo help da congregation in diffren ways. (Efe 1:22, 23; 4:11-13) Helpa guys, eldas, an circuit ovaseahs stay paht of da “guys dass gifs” today. a Cuz dese guys not perfeck, dey goin make mistakes. (Jam 3:2) But Jesus Christ use dese braddahs fo help us, dey his gifs to us.

3. Wat exampo we can tink about fo see how we can help da “guys dass gifs”?

³ Jesus wen give dese “guys dass gifs” fo build up da hui. (Efe 4:12) But all us can help dem fo take kea dea  importan kuleana. Try tink about dis exampo. Az jus like building one Kingdom Hall. Some guys do da construcktion work. Oddas help dose workas by making food, giving rides, an doin odda stuff. Same lidat, da stuff we say an do can help da helpa guys, eldas, an circuit ovaseahs fo build up da hui. We go check out how dese braddahs help us, an how we can show dem an Jesus we tankful fo dem.

HELPA GUYS DAT KOKUA

4. Wat some of da tings da helpa guys wen do in da firs century?

⁴ In da firs century, some braddahs wen get pick fo be helpa guys, or servants, in da hui. (1 Tim 3:8) Look like dey wuz da ones dat Paul wen talk about dat wen help peopo. (1 Cor 12:28) Da servants wen take kea plenny of da importan work so dat da eldas could focus on teaching an taking kea da hui. Fo exampo, maybe dey wen make copies of da scripchas or buy da stuff dey wen need fo copy um.

5. Wat some of da stuff da helpa guys do today?

⁵ Try tink about some of da tings da helpa guys do in yoa local hui. (1 Pet 4:10) Maybe dey get da kuleana fo take kea some stuff like da accounts or territories, orda literature fo da hui, work da video an soun stuffs, be attendants, or help take kea da Kingdom Hall. All dese tings iz importan fo help da hui fo run smooth. (1 Cor 14:40) Anodda ting dey do iz give talks in da Live, Preach, An Teach Meeting an give da talks fo erybody. He can also get pick fo help out one group ovaseah. An sometimes, some of da helpa guys can go wit da eldas on shepherding calls.

6. Why we tankful fo oua servants in da hui dat work so hard?

⁶ How da work da servants do help da local hui? “Tanks to oua helpa guys, I can full on enjoy da meetings,” one sistah in Bolivia name Beverly b tell. “Cuz of dea hard work, I can sing, give my ansas, lissen to talks, an learn from da videos an pichas. Dey make shua dat all us at da meetings iz safe, an dey help da guys dat no could be at da meetings in person fo tie in to um at home. Afta da meeting, dey help wit da cleaning, accounts, an make shua we get all da literature we need. I real tankful fo dem!” Leslie, who live Columbia, whose husban iz one elda tell, “My husban rely on da helpa guys fo take kea all kine stuff. Witout dem, he would be even moa busy, an I so tankful dat dey like go all out fo help.” Garanz dass how all us feel too.​—1 Tim 3:13.

7. How we can show we tankful fo da helpa guys? (Go look da picha.)

⁷ Even tho we might feel tankful fo da helpa guys, da Bible say, “Tell . . . “Mahalo plenny!”” (Col 3:15) Fo show he tankful, one elda in Finland name Krystofer wen say he do dis, “I sen one card or one text message wea I quote one scripcha an say someting da servant wen do fo encourage me or why I tankful fo his help.” Pascal an Jael who live New Caledonia, pray plenny fo da servants. Pascal wen say, “Lately we been praying plenny fo da helpa guys, tanking Jehovah fo dem, an asking Him fo be wit dem  an help dem.” Jehovah hea dese prayas an da whole hui benefit from um.​—2 Cor 1:11.

ELDAS DAT “WORK REAL HARD FO HELP YOU GUYS”

8. How come Paul wen write dat da eldas in da firs century wen “work real hard”? (1 Fo Da Tessalonika Peopo 5:12, 13)

⁸ Eldas in da firs century wen work hard fo da hui. (Read um 1 Fo Da Tessalonika Peopo 5:12, 13; 1 Tim 5:17) Dey wen take da lead by conducting meetings an by making choices fo da congregation. Anodda ting dey wen do wuz correck da braddahs an sistahs in one loving way so dat dey could stay solid in da fait. (1 Tess 2:11, 12; 2 Tim 4:2) An on top of all dat, dese braddahs also wen work hard fo take kea dea families an fo keep dea fait an dea frenship wit Jehovah strong.​—1 Tim 3:2, 4; Titus 1:6-9.

9. Wat kuleana da eldas get today?

⁹ Eldas today iz busy. Dey preachas. (2 Tim 4:5) Dey set one good exampo by goin all out in field service, dey organize da work inside da local territory, an dey train us fo preach an teach real good. Dey even judges who stay fair. Wen somebody in da local hui sin mayjah, da eldas try help dem fix dea frenship wit Jehovah. But still yet, dey make shua dat da local hui stay clean. (1 Cor 5:12, 13; Gal 6:1) Da mos importan work da eldas get iz fo be sheep guys dat take kea da sheeps. (1 Pet 5:1-3) Dey give Bible talks, try real hard fo get fo kno erybody in da local hui, an make shepherding calls. Some of dem even help out wit building Kingdom Halls an taking kea of um, organizing da big kine meetings, an working wit da Hospital Liaison Committees an Patient Visitation Groups. All dis iz on top of all da odda stuffs dey do. Eldas work supa hard fo us!

10. Wat some reasons why we tankful fo oua eldas?

¹⁰ Jehovah wen promise dat sheep guys would take kea all us an dat we “no goin stay sked no moa.” (Jer 23:4) One sistah in Finland name Joanna wen see dat happen wen her maddah wuz real sick. She wen say, “Az not easy fo talk about how I feel wit peopo. But one elda I neva even kno dat good wuz real patient wit me, he wen pray wit me, an wen let me kno dat Jehovah love me. I no really rememba wat he wen say, but I rememba dat I wen feel safe. I kno fo shua dat Jehovah wen sen him fo help me right wen I needed um.” How da eldas in yoa local hui wen help you?

11. How we can show we tankful fo da eldas? (Go look da picha.)

¹¹ Jehovah like us show dat we tankful from oua heart fo da hard work oua eldas do. (1 Tess 5:12, 13) Anodda sistah from Finland name Henrietta wen say, “Eldas always like help, but it no mean dey get moa time an energy den anybody else, or dat dey no moa dea own problems. Sometimes I jus tell dem, “Eh you kno wat? You one real good elda. I hope you kno dat.”” One sistah in Türkiye c name Sera wen say, “Eldas need encouragement so dat dey can keep goin. So we can write dem one card, ask dem fo go eat, or even fo go wit us in field service.”  Get one elda in yoa congregation dat you supa tankful fo? Show him you stay tankful fo all da hard work he do.​—1 Cor 16:18.

CIRCUIT OVASEAHS FO BUILD UP

12. Who else Jesus wen give fo build up da local huis? (1 Fo Da Tessalonika Peopo 2:7, 8)

¹² Jesus wen give “guys dass gifs” fo help da local huis in anodda way. He wen use da eldas in Jerusalem fo sen out Paul, Barnabas, an oddas az traveling braddahs. (Jesus Guys 11:22) How come? Fo da same reason dat helpa guys an eldas wuz pick, fo build up da local huis. (Jesus Guys 15:40, 41) Dese braddahs wen sacrifice plenny fo do dis work, an wen even risk dea lifes fo teach oddas an build dem up.​—Read um 1 Fo Da Tessalonika Peopo 2:7, 8.

13. Wat iz some stuff da circuit ovaseahs gotta do?

¹³ Circuit ovaseahs gotta travel plenny. Some of dem gotta go real far fo see da congregations. Ery week, one circuit ovaseah give few talks, go on shepherding calls, do da pionea meeting, eldas meeting, an da meetings fo field service. He organize an give talks at da big kine meetings. He teach da pionea skools, organize one spesho meeting wit da pioneas in da circuit, an he take kea odda importan stuff da branch give him.

14. Wat some reasons why we tankful fo oua circuit ovaseahs?

¹⁴ How all da local huis benefit from da hard work of da circuit ovaseahs? One braddah in Türkiye wen say dis about da visits dey wen do, “Erytime dey come visit us, dey make me like do moa fo my  braddahs an sistahs. I wen meet plenny circuit ovaseahs, but none of dem wen eva make me feel like dey wuz too busy or dey neva like talk to me.” Joanna, da sistah we wen talk about earlia, wen work wit one circuit ovaseah in field service but dey neva find nobody at home. “Still yet,” she wen say, “I always goin rememba dat day. Both my sistahs jus wen move an I wen miss dem plenny. Da circuit ovaseah wen help me fo see dat right now maybe we no can live close by each odda, but in da new world we goin get plenny chance fo spen time togedda.” Plenny of us get same kine good memories about oua circuit ovaseahs.​—Jesus Guys 20:37–21:1.

15. (a) From wat 3 From John 5-8 tell, how we can show we tankful to da circuit ovaseah? (Go look da picha.) (b) Why should we show da wifes of da braddahs dass working hard in da hui dat we tankful fo dem? (Go look da box “ Rememba Dea Wifes.”)

¹⁵ Da aposal John wen tell Gaius fo take kea da visiting braddahs an fo “go help dem wit wateva dey need, da way God like.” (Read um 3 From John 5-8.) One way us can do dat iz by inviting da circuit ovaseah fo go grind wit us. Anodda way iz fo show up to da meetings fo field service during da visit. Leslie, from earlia, wen show she wuz tankful in odda ways too. “I pray Jehovah give dem da stuffs dey need,” she tell. “Me an my husban wen write dem lettas fo tell dem how much dea visits wen help us.” Rememba dat circuit ovaseahs get hard time an dey get tired jus like us. Sometimes dey get sick, worry about stuff, an even get bum out. You neva kno, yoa good kine words an gifs  maybe da ansa to yoa circuit ovaseah’s praya fo help!​—Smart Guys 12:25.

WE NEED “GUYS DASS GIFS”

16. From wat Smart Guys 3:27 tell, wat questions braddahs can ask demselfs?

¹⁶ All ova da world, we need moa braddahs fo be “guys dass gifs.” If you one braddah dat stay baptize, “no hold back if you get da powa fo do um.” (Read um Smart Guys 3:27.) You willing fo work so dat you can come one servant in da hui? If you one servant awready, you willing fo work hard fo come one elda? d You can change tings aroun in yoa life so dat you can apply to da Skool Fo Kingdom Evangalizas? Dat skool goin train an help you so dat Jesus can use you even moa. If you feel like all dis iz too hard, pray to Jehovah about um. Ask Jehovah fo give you his spesho spirit fo be able fo do wateva dey ask you fo do.​—Luk 11:13; Jesus Guys 20:28.

17. “Guys dass gifs” prove wat about oua King, Christ Jesus?

¹⁷ Da braddahs Jesus wen pick az “guys dass gifs” iz proof dat he stay leading us in da las days. (Mat 28:20) We so tankful dat we get one loving King dat kno exackly wat we need an give us braddahs fo help us. So look fo ways fo show you tankful fo dese braddahs dat work so hard. An neva foget fo tank Jehovah, cuz he da one dat give us all dese awesome gifs an presents.​—Jam 1:17.