STUDY LESSON 43
SONG 90 Kokua All Oua Braddahs
Wat Can Help Us Wen We Get Doubts
“Go check out eryting.”—1 TESS 5:21.
MAIN TING WE GOIN LEARN
How you can get ova doubts dat can affeck how you serve Jehovah.
1-2. (a) Wat iz some doubts dat Jehovah’s peopo can get? (b) Wat we goin go ova in dis lesson?
ERYBODY get doubts a sometimes. Fo exampo, one young Witness might wonda if he really wort anyting to Jehovah. Cuz of dat, maybe he not shua if he should get baptize. Anodda exampo iz one braddah who wen choose fo put Jehovah firs in his life wen he wuz young radda den choosing fo make plenny money. Now dat he olda an barely get nuff money fo make ends meet, maybe he wonda if he wen make da right choice wen he wuz young. Or get one olda sistah who not strong like she wuz befoa. Maybe she feel down cuz she no can do wat she use to do. You wen eva ask yoaself dese questions? Jehovah really see me? Da sacrifices I wen make fo Jehovah stay wort it? I can still do tings fo Jehovah?
2 If we no try find ansas to dese questions, it can jam up oua worship to Jehovah. In dis lesson, we goin look at how da Bible can help us if we doubt (1) dat we wort anyting to Jehovah, (2) dat we wen make good choices in da pas, or (3) dat Jehovah still can use us.
HOW FO GET OVA OUA DOUBTS
3. Wat iz one way fo get ova oua doubts?
3 One way fo get ova oua doubts iz look fo da ansas in da Bible. Wen we do dat, oua fait in Jehovah an oua frenship wit him goin come moa strong an we goin be able fo “stay solid an trus God!”—1 Cor 16:13.
4. How we can “go check out eryting”? (1 Fo Da Tessalonika Peopo 5:21)
4 Read um 1 Fo Da Tessalonika Peopo 5:21. Da Bible tell us fo “go check out eryting.” How we do dat? Make shua dat wat we believe match up wit wat da Bible say. Try tink about da young guy dat wonda if he wort anyting to Jehovah. He should jus believe dass tru? No, he should “go check out eryting” fo find out how Jehovah really tink about him.
5. How we can find out how Jehovah feel about oua quesions?
5 Wen we read da Bible, az like Jehovah stay talking to us. But if we like find out how Jehovah feel about oua questions, iz goin take work. We can study about um by using da tools dat Jehovah’s hui give us. (Smart Guys 2:3-6) We can pray to Jehovah fo help us find da ansas we stay looking fo. We can look fo Bible truts an odda info dat can help us wit how we feeling. An iz good fo read about faitful guys in da Bible who wen feel da same way az us.
6. How da meetings help us get ova oua doubts?
6 Anodda way Jehovah talk to us iz at oua meetings. If we no miss da meetings, maybe we goin hea someting in one talk or in somebody’s ansa dat goin help us get ova oua doubts. (Smart Guys 27:17) Now we go talk about wat can help us get ova some of da doubts we get.
WEN YOU DOUBT YOU WORT ANYTING TO JEHOVAH
7. Wat question some peopo ask?
7 You eva wen tink to yoaself, “Does Jehovah even see me?” If you feel like you nobody, maybe you tink dat no ways you can come frenz wit da Creator of eryting. Maybe dass how King David wen feel. Wen blow him away dat Jehovah even kea about peopo. He wen say about Jehovah, “I no can tink how come you like take kea peopo, o how come you even tink bout us regula kine peopo.” (Songs 144:3) Wea you can find out da ansa to da question, “Does Jehovah really kea about peopo?”
8. Wat Jehovah see in peopo? (1 Samuel 16:6, 7, 10-12)
8 Da Bible help us fo see dat Jehovah see da guys who odda peopo tink iz one nobody. Like wen Jehovah wen sen Samuel fo go Jesse’s house fo pick one of his boys fo be da King of Israel. Jesse wen have eight boys, but he wen ony call seven fo go meet Samuel. He neva call his younges boy, David. b But David wuz da one Jehovah wen pick. (Read um 1 Samuel 16:6, 7, 10-12.) Jehovah had see who David wuz on da inside, one young guy dat wen really love him.
9. How you kno you wort someting to Jehovah? (Go look da picha.)
9 Tink about how Jehovah wen awready show dat you wort someting to him. He give you da bestes advice fo da exack ting you goin tru. (Songs 32:8) He no can do dat unless he kno you supa good. (Songs 139:1) Wen you follow Jehovah’s advice an see how da ting iz good fo you, den you goin kno garanz he kea about you. (1 Rec 28:9; Jesus Guys 17:26, 27) Jehovah see all dat you do fo work hard fo him. He see all da good qualities you get, an cuz of dat, he like be frenz wit you. (Jer 17:10) He goin be real happy if you like be his fren too.—1 John 4:19.
“If you try know him, you goin find him.” —1 Rec 28:9 (Go look numba 9) c
WEN YOU DOUBT DA CHOICES YOU WEN MAKE IN DA PAS
10. Wen we tink about da choices we wen make, wat we might wonda?
10 Layta on in life, some guys tink back an wonda if da choices dey wen make in da pas wuz da right ones. Maybe dey wen give up one good job or neva start one business so dat dey could do moa fo Jehovah. But dat wuz long time ago. Now maybe dey see guys dey kno dat wen make diffren choices from dem, an look like dey get plenny money an eryting goin good fo dem. An cuz of dat, dey might wonda, “Wuz da sacrifices I wen make fo Jehovah wort it? Or I wen miss out cuz of da choices I wen make?”
11. Wat negative feelings da writa of Songs Fo God 73 wen get?
11 If you wen ask yoaself questions lidat, try go tink about how da writa of Songs Fo God 73 wen feel. He wen see odda peopo who neva serve Jehovah, but dey wuz healthy, rich, an neva have no worries. (Songs 73:3-5, 12) Cuz wen look like eryting wuz goin good fo dem, wen make him feel dat his choice fo serve Jehovah no wuz da right one. He wen feel presha out all da time tinking about dis. (Songs 73:13, 14) How he wen deal wit dese negative feelings?
12. In Songs Fo God 73:16-18, wat wen help da songwrita fo deal wit his negative feelings?
12 Read um Songs Fo God 73:16-18. Da songwrita wen go to da place dat stay spesho fo God. Ova dea, he could tink moa clear. He wen undastan dat even tho wen look like fo some dea life wuz good now, dea future neva look so garanz. Knowing dat wen give him peace an he wen see dat his choice fo put Jehovah firs in his life wuz da bestes one. Cuz of dat, he we make up his mind fo neva stop serving Jehovah.—Songs 73:23-28.
13. Wat you can do if you regret some of da choices you wen make in da pas? (Go look da picha.)
13 You can get da same kine peace az da songwrita wit da help from da Bible. How? Compare da blessings you get from Jehovah wit wat da guys who no serve him get. Fo mos of da guys dat no serve Jehovah, dea good job an all da stuff dey have, dass all dey get, cuz dey no moa one hope fo da future. But fo you, you get all da good stuff from Jehovah right now, an da awesome blessings he promise bumbye. (Songs 145:16) Try tink about dis, you donno wat yoa life would be like if you wen make diffren choices. One ting iz fo shua, wen you make choices cuz you love God an peopo, you neva goin miss out on anyting.
See yoaself in da Paradise (Go look numba 13) d
WEN YOU DOUBT JEHOVAH CAN USE YOU
14. Wat some peopo goin tru, an wat dey might tink?
14 Some of Jehovah’s peopo no can do az much az dey like cuz dey olda, dey sick, or dey get someting wrong wit dem physically or mentally. Dat might make dem feel like dey not good enuff to Jehovah. Dey might tink Jehovah no can use dem.
15. Wat da writa of Songs Fo God 71 wen kno fo shua?
15 Da writa of Songs Fo God 71 wen feel like Jehovah couldn’t use him eidda. He wen pray, “No dump me jus cuz I no stay strong no moa.” (Songs 71:9, 18) Even tho he wen feel weak, da songwrita had kno fo shua dat if he wen serve God faitfully, He would help um. Da songwrita had learn dat Jehovah stay happy wit da guys dat do dea bes fo serve him even tho dey get stuff wrong wit dem.—Songs 37:23-25.
16. How Jehovah can use olda ones? (Songs Fo God 92:12-15)
16 If you one olda one, tink about how Jehovah feel about you. He can help you stay faitful to him no matta you get hard time physically. (Read um Songs Fo God 92:12-15.) No tink about da stuff you no can do anymoa, but tink about da stuff you can do. Like you can help oddas by yoa good exampo an showing dem dat you kea. You can talk about how Jehovah wen help you tru da years an wat Bible promises you no can wait fo. An no foget how much powa yoa prayas fo oddas get. (1 Pet 3:12) No matta wat situation we stay in, all us can do someting fo Jehovah an fo oddas.
17. Why we shouldn’t compare ouaself wit oddas?
17 If you frustrated cuz you no can do moa fo Jehovah, kno dat wateva you can do iz spesho to him. Maybe you like compare yoaself wit oddas. But no do dat. Why not? Cuz Jehovah no compare you wit oddas. (Gal 6:4) Fo exampo, Mary wen give Jesus perfume oil dat wen cost plenny. (John 12:3-5) On da odda hand, da pooa widow wen give to da temple two small coins dat wuz hardly wort anyting. (Luk 21:1-4) But like his Faddah, Jesus neva compare dese two wahines. Radda, he wen see dat both Mary an da pooa widow wen show fait. Kno dat wateva you do fo Jehovah cuz of yoa fait an love fo him, dass someting spesho to him.
18. Wat goin help us get ova oua doubts? (Go look da box “ Da Bible Can Help You Get Ova Yoa Doubts.”)
18 We all get doubts sometimes. But like we wen learn, da Bible can help us get ova dem. So work hard fo find out how Jehovah really feel an den you goin feel good instead of all worried. Jehovah kno who you, he happy wen you put him firs, an he promise fo bless you fo dat. Kno fo shua dat Jehovah love an kea about ery one of us dat love an stick wit him.
SONG 111 Oua Happiness Come From Oua God
a WAT DIS MEAN: In dis lesson, we talking about da kine doubts dat make us wonda if we wort anyting to Jehovah or about da choices we wen make befoa. Dis not da kine doubts da Bible talk about dat show we no moa fait in Jehovah an his promises.
b Even tho da Bible no tell how old David wuz wen Jehovah wen pick him, could be he wuz one teenager.—Check out da Septemba 1, 2011, magazine of The Watchtower, p. 29, par. 2.
