1-2. Wat wen happen az two of Jesus followas had walk to Emmaus?

 ON NISAN 16, 33 C.E. Jesus followas stay sad an sked. Two of dem leave Jerusalem fo go to Emmaus, one small town dat stay 7 miles away from Jerusalem. Dese guys wuz all bum out cuz Jesus, who dey wuz following, wen jus get killed. Look like dey no moa hope cuz da Messiah wuz gone. But tings wuz bout fo change.

² One guy go up to dem an start fo walk wit dem. Jesus followas tell him all da bad tings dat wen happen to Jesus. Den da guy start fo talk about tings dey neva goin foget. He use da scripchas, “da stuff Moses wen write down . . . an all da odda guys dat wen talk fo God” fo tell how come da Messiah had fo die. Wen da three guys get to Emmaus, dey come fo find out who dat guy really stay, iz Jesus who God wen bring back to life! Dey musta been so stoked fo find out da Messiah wuz alive!​—Luk 24:13-35.

3-4. Wat wen happen to Jesus followas, an wat we goin learn from dis lesson? (Jesus Guys 1:3)

³ Jesus wuz on eart fo 40 days befoa he wen go back to heaven, an had plenny diffren times he wen go see his followas. (Read um Jesus Guys 1:3.) Jesus wen build up his followas who wuz all sad an sked. An dey wen come happy an wen get courage fo preach an teach da  good kine tings about God’s Govament. a

⁴ Can be good fo us if we learn about wat Jesus wen do wit his las 40 days on eart. In dis lesson, we goin see how Jesus wen use dis time (1)  fo build up his followas, (2) fo help dem undastan da Scripchas moa betta, an (3) fo train dem fo take on moa bigga kuleana bumbye. We go see how we can copy Jesus exampo in all dese ways.

BUILD ODDAS UP

5. How come Jesus followas needed fo be built up?

⁵ Jesus followas needed fo be built up. How come? Some of dem wen leave dea house, ohana, an work fo follow Jesus full time. (Mat 19:27) Cuz dey wen follow Jesus, some of dem wen get treated bad. (John 9:22) Dey wuz happy fo make dese sacrifices cuz dey wen believe dat Jesus wuz da Messiah. (Mat 16:16) But wen Jesus had get killed, eryting dey wen hope fo, look like no wuz goin happen.

6. Wat Jesus wen do afta he wen come back to life?

⁶ Jesus wen undastan how come his followas wuz sad wen he had mahke. An he wen kno it no wuz cuz dey wen lose trus. On da same day he wen come back to life, he wen go build up his frenz. Jus like how he wen go see Mary Magdalene wen she wuz crying at his tomb. (John 20:11,16) An like we wen talk about befoa, he wen go see his two followas on dea way to Emmaus. An he wen go see da aposal Peter. (Luk 24:34) Wat we can learn from Jesus exampo? We go look wat had happen wen he go visit Mary Magdalene.

7. Like tell in John 20:11-16, wat did Jesus see Mary doin early morning on Nisan 16, an wat he wen do fo her? (Go look da picha.)

⁷ Read um John 20:11-16. Early  morning on Nisan 16, some wahines wen go back to da place wea dey bury Jesus. (Luk 24:1, 10) We go look wat wen happen to one of da wahines, Mary Magdalene. Wen Mary had go to da tomb, neva have notting in um. So she wen tell Peter an John, an dey wen run back to da tomb an Mary wen follow dem. Afta dey see dat Jesus no wuz dea, dey wen go back home. But Mary had stay dea an cry. She neva kno dat Jesus wuz dea watching her. He had see her crying fo him, an he wen like help her feel betta. So he go visit Mary an den he had do someting simpo dat wen build her up big time. He talk to her an give her someting importan fo do. She had fo go tell Jesus braddahs dat he wen come back to life.​—John 20:17, 18.

8. How we can copy Jesus?

⁸ How we can copy Jesus? We can copy Jesus wen we help oua braddahs an sistahs fo keep serving Jehovah. Like Jesus, we gotta see wat problems oua braddahs an sistahs get an den try oua bes fo undastan how dey feel an be dea fo dem. Try look wat wen happen to one sistah name Jocelyn, her sistah wen die in one bad accident. “Fo plenny monts, I wuz out of it an jus supa sad,” she tell. But one braddah an his wife wen tell her fo come ova dea house, dey wen let her talk about how she wuz feeling, dey wen lissen her, an dey wen tell her how spesho she wuz to Jehovah. Jocelyn tell, “I had feel like I wuz drowning in one stormy ocean. But Jehovah wen use dis braddah an sistah fo save me. Dey wen help me get my fiyah back fo keep serving Jehovah.” Us too can encourage oddas wen we let dem talk about how dey feel an lissen real good to dem. Wen we do dat, we can help dem fo keep serving Jehovah.​—Rome 12:15.

HELP ODDAS FO UNDASTAN DA SCRIPCHAS

9. Wat problem Jesus followas had, an how Jesus wen help dem?

⁹ Jesus followas wen believe da scripchas an try dea bes fo use um in dea life. (John 17:6) But dey no could undastan how come Jesus wen get killed az one criminal. Jesus wen kno his followas had fait an wen love Jehovah, but he wen see dey had fo undastan da scripchas moa betta. (Luk 9:44, 45; John 20:9) So he wen help dem undastan wat da scripchas dey wen read had mean. We go talk about how he wen do dat wen he had see da two followas walking to Emmaus.

10. How Jesus wen help his followas fo undastan he wuz da Spesho Guy God Goin Sen? (Luke 24:18-27)

¹⁰ Read um Luke 24:18-27. You wen see dat Jesus neva tell dese guys right away who he wuz. But he wen ask questions. How come? Probly cuz he wen like dem tell him wat dey wuz tinking an feeling. An dass wat dey wen do. Dey wen tell him dat dey thought Jesus wuz goin come king in Israel an rule ova dem instead of da Romans. Afta Jesus let dem talk, he wen use da scripchas fo help dem undastan wat wen happen. b Layta dat night, Jesus wen meet wit his odda followas an had explain to dem dese truts. (Luk 24:33-48) Wat we can learn from dis?

11-12. (a) Wat we can learn from da way Jesus wen teach Bible truts? (Go look da pichas.) (b) How da braddah dat wen study wit Nortey had help him?

 ¹¹ How we can copy Jesus? Firs, wen we teach oua Bible learnas we can ask good kine questions fo dem tell how dey feel. (Smart Guys 20:5) Wen you undastan how dey feel, show dem how fo find scripchas dat can help dem. Den, hold back an make shua you no tell dem wat fo do. But, ask dem questions about da scripchas. Help dem fo tink about wat dey stay reading an how dey can use um in dea life. Try look wat wen happen to one braddah in Ghana name Nortey.

¹² Wen Nortey wuz 16 years old, he wen start fo study da Bible. But litto bit afta dat, his family wen give him presha an had go agains him. Wat wen help him fo keep studying da Bible? Da braddah dat wen study wit him, wen talk to him about Matthew chapta 10 an wen explain how tru Christians goin suffa plenny from oddas. “So wen da presha had start an my family wen go agains me,” Nortey tell, “I had kno fo shua I had find da trut.” Da braddah dat wen study wit him wen help him fo undastan Matthew 10:16 wea it tell we gotta be keaful. Den dey wen talk about how dis scripcha can help Nortey fo show respeck wen he explain his beliefs to his family. Afta he wen get baptize, Nortey wanted fo pionea, but his faddah wanted him fo go college. Da braddah neva tell Nortey wat fo do, but he wen ask him questions fo help him tink about Bible truts fo make da right choice. Wat Nortey wen do? He wen start fo pionea an his faddah wen kick him outa da house. How Nortey feel about wat wen happen to him? He tell, “I kno I wen make da right choice.” Wen we take time fo help oddas undastan da scripchas, we can help dem fo come solid Christians.​—Efe 3:16-19.

HELP TRAIN BRADDAHS FO COME “GUYS DASS GIFS”

13. Wat Jesus wen do fo make shua dat da preaching work wen keep goin afta he wen go heaven? (Fo Da Efesus Peopo 4:8)

¹³ Wen Jesus wuz on eart, he wen do eryting his Faddah wen ask him fo do.  (John 17:4) But Jesus neva tink he wuz da ony one dat could do wat Jehovah wen like. Da three an a half years he wuz preaching on eart, he wen train oddas fo preach too. Jesus wen trus his followas. Befoa he wen go back to heaven, he wen give dem da kuleana fo preach an teach an take kea Jehovah’s peopo. Some of his followas who wen take da lead in dis work, probly wuz in dea 20’s. (Read um Fo Da Efesus Peopo 4:8.) How Jesus wen use his las 40 days fo help dese guys dat wuz hardworking an loyal fo come “guys dass gifs”?

14. Wat Jesus wen do fo teach his followas his las 40 days on eart? (Go look da picha.)

¹⁴ Wit love, Jesus wen tell his followas wat dey needed fo hea fo correck dem. Fo exampo, he wen see dat some of his followas neva really believe dat he wen die an come back to life, so he wen correck dea tinking fo help dem kno da trut. (Luk 24:25-27; John 20:27) He also wen tell dem dat taking kea of Jehovah’s peopo wuz moa importan den making money. (John 21:15) An he wen remind dem fo no compare da work dey do fo Jehovah wit wat oddas do. (John 21:20-22) He even wen correck some wrong kine tinking dey had about God’s Govament an wen help dem fo make preaching da main ting. (Jesus Guys 1:6-8) Wat eldas can learn from Jesus?

15-16. (a) Wat ways eldas can copy Jesus? (b) How wuz good fo Patrick wen somebody had correck him?

¹⁵ How eldas can copy Jesus? Dey gotta train braddahs, even younga guys, fo do moa in da local hui. c Eldas no expeck da ones dey train fo be perfeck. Wit love, dey gotta train young braddahs fo be humbo, be somebody we can trus, an be ready fo like help oddas.​—1 Tim 3:1; 2 Tim 2:2; 1 Pet 5:5.

¹⁶ We go look how wuz good fo Patrick wen somebody wen correck him. Wen he  wuz one young guy, mos times he would speak mean an treat oddas bad, even da sistahs. One elda had see dat Patrick had need fo make changes, so he wen talk wit him an correck him in one nice way. “I happy he wen do dat,” Patrick tell. “I use to feel junk wen I had see odda braddahs get da kuleana dat I had want. But wat da elda wen tell me, had help me fo see I gotta focus on bein humbo an show love to my braddahs an sistahs radda den da kuleana or position I get in da local hui.” Cuz of dat, Patrick wen come one elda wen he wuz 23.​—Smart Guys 27:9.

17. How Jesus wen show dat he trus his followas?

¹⁷ Jesus wen give his followas da kuleana not jus fo preach but fo teach too. (Mat 28:20) Da followas maybe wen feel like dey no could do wat Jesus wuz asking dem fo do. But Jesus wuz so shua dat dey could do da work, he wen tell um, “Jalike my Faddah wen sen me all ova, dass how I goin sen you guys all ova.”​—John 20:21.

18. How eldas can copy Jesus?

¹⁸ How eldas can copy Jesus? Akamai eldas train oddas by giving dem kuleana fo take kea. (Php 2:19-22) Fo exampo, eldas can ask younga guys fo help clean an take kea da Kingdom Hall. Eldas can give braddahs one job fo do, show dem how fo do um, an den trus dem fo do da work good. One new elda name Matthew tell dat he supa tankful dat eldas train him fo take kea diffren kuleana in da local hui, an wen trus him fo do um good. He tell, “Wen I had make mistakes, dey wen help me fo see how I can learn from dose mistakes an do betta nex time.” d

19. Wat we should try oua bes fo do?

¹⁹ Jesus wen use his las 40 days on eart fo build up, teach, an train oddas. We go do oua bes fo go all out fo copy Jesus. (1 Pet 2:21) An he goin help us fo do dat, cuz he wen promise, “I goin stay tight wit you guys ery day, till da world come pau.”​—Mat 28:20.