1-2. Wat make God’s peopo happy? (From James 1:22-25)

 JEHOVAH an Jesus like us fo be happy. Da song writa tell in Songs Fo God 119:2, “Get peopo dat lissen up real good erytime Da One In Charge tell um watch out fo someting. Dey stay try fo know him wit one good heart. Dey da ones can stay good inside!” An Jesus tell, “Da peopo dat hear wat God tell um fo do, an do um, dey da ones dat stay real good inside!”​—Luk 11:28.

² Jehovah’s peopo stay happy. How come? Get plenny reasons, but one importan one iz dat we read da Bible on da regula an try oua bes fo do wat we learn.​—Read um From James 1:22-25.

3. Wen we do wat we read in da Bible, wat good tings happen?

³ Get some good tings dat happen wen we do wat God tell. Fo exampo, wen we do wat we learn from da Bible, we make Jehovah happy, an dat make us happy too. (Teacha 12:13) An wen we follow wat God tell inside da Bible, oua relationships wit oua ohana an da local hui come moa betta. Dass probly tru fo you aah? Not ony dat, we stay away from da plenny problems peopo get wen dey no lissen an do wat Jehovah tell. Az jalike wat King David sed. Afta singing about Jehovah’s rules, how He tell fo live, an judge, David wen figga, “Da peopo dat make shua dey do wat Da One In  Charge tell, He make shua plenny good tings happen to dem.”​—Songs 19:7-11.

4. How come az not always easy fo read da Bible an do wat we learn?

⁴ Az tru, not goin always be easy fo read da Bible an do wat we learn. Even tho we busy, we gotta make time fo read an study da Bible so we can undastan wat Jehovah like us do. So we go look some tings we can do fo read um on da regula. Den we goin check out wat goin help us fo tink about wat we wen read an look fo ways fo use um in oua life.

MAKE TIME FO READ DA BIBLE

5. Wat kine tings keep us busy?

⁵ Mos of Jehovah’s peopo stay real busy. We spen plenny time taking kea da kuleana dat da Bible tell we get. Like, mos of us gotta work fo make money fo oua family an ouaself. (1 Tim 5:8) Plenny braddahs an sistahs take kea dea ohana dat stay sick or makule. All us gotta take kea oua own healt, an dat take time too. On top of dat, we get stuff we gotta do in da local hui. One of dose main tings iz fo try oua bes fo go preach. Wit all da tings you gotta do, how you can find time fo read da Bible eryday, tink about wat you wen read, an do um?

6. How you can make shua you read da Bible? (Go look da picha.)

⁶ One of da “bestes kine stuff” fo us do az Christians iz fo read da Bible, so we gotta make shua we do dat. (Php 1:10) Talking bout da guys who stay happy, da firs song tell, “Dey stay good inside, cuz dey follow da Rules from Da One In Charge. Day time o nite time, dey read da Rules from Da One In Charge, an tink bout um plenny.” (Songs 1:1, 2) So den, az clear fo see we gotta spen time reading da Bible. Wen iz da bes time  fo do dat? Da ansa goin be diffren fo erybody, but wass importan iz dat we choose one time dat goin help us fo read da Bible eryday. One braddah name Victor tell, “I like fo read da Bible in da morning. Even tho I no like waking up early, dass da ony time wen no moa too much stuff fo bodda me. My mind stay clear, an I can focus moa betta.” Dass tru fo you, o wat? Try ask yoaself, “Wen iz da bes time fo me read da Bible?”

TINK ABOUT WAT YOU READ

7-8. Wat can hold us back from getting da mos outa oua Bible reading? Try give one exampo.

⁷ Wen we make time fo read da Bible, get someting else we gotta watch out fo. You eva wen read someting so fas, an den right afta dat, you no could rememba wat you jus wen read? Garanz dat wen happen to all us. Wass sad iz dis can happen wen we read da Bible too. Maybe we choose fo read a few chaptas of da Bible ery day. Dass good. We should make goals an try oua bes fo stick to dem. (1 Cor 9:26) But dass jus da start, we gotta do moa den jus read da Bible if we like get da mos outa um.

⁸ Try tink bout dis. Plants need rainwatta fo live. But if rain plenny one time, da groun goin have too much watta. If it rain even moa, da watta not goin go in da soil an help da plants. Az moa betta wen da rain fall moa slow, cuz den da watta goin go in da soil an help da plants fo grow. Same same, we gotta try oua bes not fo read da Bible so fas dat we no moa time fo tink about, rememba, an use wat we jus wen read.​—Jam 1:24.

9. Wat we gotta do if we stay blasting tru oua Bible reading?

⁹ You sometimes jus blast tru yoa Bible reading? Wat you gotta do? Slow down. Read um moa slow, so you can  tink about wat you stay reading or wat you jus wen read. Dis no gotta be hard. Maybe you can choose fo study longa so dat you get moa time fo tink. Or you can choose fo no read az much verses an use da res of da time fo tink about wat you wen read. “Ony short my Bible reading, jus one chapta,” Victor from earlia tell. “Cuz I read early in da morning, I get fo tink about wat I wen read tru da day.” Wateva you choose fo do, az importan fo read slow enuff so dat you can tink about wat you stay reading.​—Songs 119:97; go look da box “ Questions Fo Tink About.”

10. Try tell how you can use wat you learning. (1 Fo Da Tessalonika Peopo 5:17, 18)

¹⁰ Wen you read da scripchas, make shua you look fo ways you can use um. Wen you read a paht of da Bible, ask yoaself, “How I can use dis now or layta on?” Fo exampo, maybe you jus wen read 1 Fo Da Tessalonika Peopo 5:17, 18. (Read um.) Afta you read dose two verses, you can stop an tink how much an how deep you pray. An you can tink about tings you stay tankful fo. Maybe you figga you goin pick three tings fo tank Jehovah fo. Even if you ony spen coupo minutes tinking about wat you wen read, dat goin help you fo undastan da Bible an do wat it tell. Tink how goin be good fo you if you do dis eryday wit odda pahts of da Bible dat you read! You goin be somebody dat do wat da Bible tell. But wat if you get plenny odda tings you gotta work on?

MAKE GOALS YOU CAN REACH

11. How come you might feel bum out sometimes? Tell one exampo.

¹¹ Wen you read da Bible you might come all bum out cuz you see dat get plenny tings you gotta work on. Try tink about dis, today yoa Bible reading tell az no good fo pick favorites. (Jam 2:1-8) You see dat you can work on how you treat oddas, so you choose fo make some changes. Right on! Den da nex day you read some scripchas dat show az importan fo watch out wat come outa yoa mout. (Jam 3:1-5, 7-12) Sometimes you see dat da tings you talk about iz not nice or no good. Now you goin try fo give good kine words an talk nice wit oddas. Da nex day, yoa Bible reading  give one warning fo no love da bad kine stuff inside da world. (Jam 4:4-12) So you figga you gotta be moa keaful about da tings you read, watch, or lissen to. By day numba four, you feel all bum out cuz of all da tings you gotta work on.

12. Why you no need come bum out if yoa Bible reading show you gotta make plenny changes? (Go look da extra info.)

¹² If you need fo make changes or do betta at some tings, no get bum out. Dat show you get one good heart. Somebody who humbo try read da scripchas fo look fo tings dey gotta work on. a Rememba, fo live da “new kine way” it take time an gotta keep working at um. (Col 3:10) Wat goin help you fo keep doin wat da Bible tell?

13. Wat iz one good way fo work on tings you wen learn? (Go look da picha.)

¹³ Radda den trying fo work on eryting all one time, make da goal fo work on one or two tings. (Smart Guys 11:2) Try do dis. Make one lis of tings you gotta work on, den pick one or two tings fo work on firs, den leave da res fo work on laytas. So wat you should start wit?

14. Wat goals you can start wit?

¹⁴ Maybe you choose fo start wit one goal dass easy fo you reach. Or maybe you choose fo work on getting betta wit someting you need da mos help wit. Wen you choose wat yoa goal iz, go do some research. Maybe you can  use da Watch Tower Publications Index or da Research Guide Fo Witnesses Fo Jehovah. Pray to Jehovah fo help you like work on yoa goal an fo you do um. (Php 2:13) Den try use wat you wen learn. Az you get closa to yoa firs goal, you probly goin feel moa ready fo start anodda one. Wen you see dat you able fo make one change or build up one Christian quality, you goin like fo keep making changes. Dis probly goin make um moa easy fo make odda changes.

LET DA BIBLE “MAKE YOU GUYS COME DIFFREN INSIDE”

15. How Jehovah’s peopo diffren from odda peopo dat read da Bible? (1 Fo Da Tessalonika Peopo 2:13)

¹⁵ Some peopo tell dey wen read da Bible choke times. But do dey really believe wat it teach? Dey do wat it tell, or let um change how dey live? Sad fo say, plenny times da ansa iz no. Dass so diffren from Jehovah’s peopo. Like da firs Christians, we trus dat da Bible iz “wat God tell, an dass fo real.” Dass why we go all out fo do wat da Bible tell in oua life.​—Read um 1 Fo Da Tessalonika Peopo 2:13.

16. Wat can help us fo do wat da Bible tell?

¹⁶ Az not always easy fo read an do wat da Bible tell. Maybe az hard fo find time fo read. Or maybe we blast tru oua Bible reading an no tink about wat we jus wen read. Or maybe we stay all bum out cuz get plenny changes we gotta make. Wateva one you stay dealing wit, not goin be too hard fo hando. Cuz wit Jehovah’s help, you can get tru um. We go take his help an no ony lissen, but do wat he tell. Fo shua da moa we read da Bible an use um in oua life, da moa happy we goin be.​—Jam 1:25.