1-2. How come Jehovah wen make us fo feel happy wen we give to oddas?

 JEHOVAH wen make humans so dat we stay moa happy wen we give to oddas den wen we get someting from dem. (Jesus Guys 20:35) Dis mean we no can be happy wen somebody give us one gif? No. All us stay happy wen we get one gif. But we stay even moa happy wen we give to oddas. An iz good Jehovah wen make us lidis. How come?

² Cuz Jehovah wen make us lidis, we can make ouaself moa happy. We can come moa happy wen we tink of ways fo give to oddas, an den do um. Dass pretty mean aah, how Jehovah wen make us lidis!​—Songs 139:14.

3. How come Jehovah stay called “da God dat stay awesome an good inside”?

³ Cuz da Bible tell us dat dose who give to oddas feel happy, az easy fo undastan how come Jehovah iz “da God dat stay awesome an good inside.” (1 Tim 1:11) He da firs one who wen give to oddas, an nobody can give moa den him. Cuz of him, “us stay alive, move, an do eryting,” jalike da aposal Paul wen tell. (Jesus Guys 17:28) Fo reals, “erytime somebody give you someting nice an spesho,” dat come from Jehovah.​—Jam 1:17.

4. How we get da chance fo come moa happy?

⁴ Da feeling we get wen we give iz so good, dat we like do moa fo get um. We can do dat if we copy how Jehovah give. (Efe 5:1) In dis lesson, we go see how Jehovah give an wat we can do if we feel dat oddas no stay tankful  fo da tings we do fo dem. Dis goin help us fo keep giving to oddas an come moa happy cuz of dat.

COPY HOW JEHOVAH GIVE PLENNY

5. Wass some tings dat Jehovah give us?

⁵ Wass some tings dat Jehovah stay happy fo give us? We go look some exampos. Jehovah give us wat we need. Maybe we not always goin have fancy kine stuffs, but cuz of Jehovah, we always goin get wat we need. Fo exampo, he make um so dat us can have food, clotheses, an one place fo live. (Songs 4:8; Mat 6:31-33, NWT; 1 Tim 6:6-8) Jehovah no give us dese tings ony cuz he feel like he gotta. So how come Jehovah do dis fo us den?

6. Wat we learn from Matthew 6:25, 26, NWT?

⁶ Jehovah give us wat we need cuz he love us. Try look wat Jesus wen say at Matthew 6:25, 26, NWT. (Read um) Jesus wen use exampos from tings Jehovah wen make. Talking about da birds, Jesus tell, “Dey no plant seed, o pick wat grow, o put um away fo layta.” But try look da nex ting Jesus tell, “Yoa Faddah in da sky feed um.” Den Jesus ask, “You moa importan den dem, no?” Wass da point? Da way Jehovah see um, His peopo stay wort way moa plenny den animals. So if Jehovah take kea wat da animals need, den garanz he goin take kea wat we need. Jus like one faddah who kea, Jehovah take kea his family cuz he love dem.​—Songs 145:16; Mat 6:32, NWT.

7. Wass one way we can copy how Jehovah give to oddas? (Go look da picha.)

⁷ Like Jehovah, we can give oddas da stuff dey need cuz we love dem. You kno one braddah or sistah dat need food or clotheses? Jehovah can use you fo help dem out. Jehovah’s peopo get one good rep fo helping oddas wen get disastas. Fo exampo, during da COVID-19 pandemic, braddahs an sistahs wen share food, clotheses, an odda stuffs wit guys dat wen need um. Plenny also wen donate to da worldwide work. Dat wen support da frenz all ova da world dat wen need help. Dey wen do wat Fo Da Hebrew Peopo 13:16 tell, “No foget fo do good tings fo odda peopo. Give dem  wat dey need from yoa stuffs. Cuz dass jalike you stay make one sacrifice dat make God stay good inside.”

8. How Jehovah help us by giving us powa? (Fo Da Philippi Peopo 2:13)

⁸ Jehovah give powa. Jehovah’s powa no moa end an he stay happy fo share um wit his peopo. (Read um Fo Da Philippi Peopo 2:13.) You eva wen pray fo da powa fo hold back from doin someting bad? Or you wen pray fo da mana fo hang in dea wen you had hard time? Maybe you wen pray fo jus be strong enuff fo get tru one moa day. Wen you had get da powa dat you wen pray fo, you had feel like how da aposal Paul wen feel wen he tell, “I strong enuff fo handle any kine cuz I stay tight wit Christ, an he give me da powa fo do um.”​—Php 4:13, NWT.

9. How we can copy Jehovah by using oua powa fo help oddas? (Go look da picha.)

⁹ We no moa da same kine powa dat Jehovah get. An we no can give powa to oddas da same way like Him. But we can copy him by using oua powa fo help oddas. Fo exampo, we can help makule or sick braddahs an sistahs wit chores or by goin store fo dem. If can, we can voluntea fo help clean an take kea da Kingdom Hall. Wen we use oua powa fo do dese kine tings, we help oua braddahs an sistahs who worship Jehovah.

10. How we can use da powa words get, fo help oddas?

¹⁰ No foget dat words get powa. You kno anybody who would feel real good inside if you wen tell dem mahalo fo wat dey wen do? You kno anybody dat need good kine words? Eidda way, make shua fo let da person kno you kea fo dem. You can visit dem, call dem, sen dem one card, email dem, or sen one text. No need worry too much about wat fo say. Jus a coupo good kine words from da heart might be jus wat yoa braddah or sistah need fo stay faitful one moa day or fo feel betta about wat dey goin tru.​—Smart Guys 12:25; Efe 4:29.

11. How Jehovah give his smarts to oddas?

¹¹ Jehovah give smarts. James, one of Jesus followas, wen write, “If one a you guys donno wat fo do, aks God fo help you, fo give you da smarts you need! He no goin give you guys hard time. He goin help you guys. God give plenny to erybody, you know.” (Jam 1:5) Dis show Jehovah no keep all his  smarts to himself. He no hold back fo share um wit oddas. An wen Jehovah share his smarts, he “no goin give you guys hard time” wen he give um. He no make us feel junk fo saying we need his help. Radda, he like us ask him fo help.​—Smart Guys 2:1-6.

12. Wat chances we get fo share oua smarts wit oddas?

¹² Wat about us guys? We can copy Jehovah by sharing oua smarts? (Songs 32:8) Jehovah’s peopo get plenny chance fo share da stuff dey wen learn. Fo exampo, plenny times we teach new guys how fo preach. Eldas stay patient wen dey kokua da helpa guys an odda braddahs fo learn how fo take kea dea kuleana in da local hui. An braddahs an sistahs who work construcktion an do maintenance long time, help train oddas fo work on buildings fo Jehovah.

13. How we can copy da way Jehovah share his smarts wen we teach oddas?

¹³ Try copy Jehovah wen you teach oddas. Rememba dat Jehovah no hold back from sharing his smarts. Jalike him, we like share wat we kno wit da guys who stay learning. We no hold back from teaching oddas cuz we sked dat dey goin take oua place. An we no like tink, “Nobody wen train me! Bumbye he learn!” Jehovah’s peopo should neva tink lidat. But we happy fo share da stuff we kno an like “go all out” fo da guys we teach. (1 Tess 2:8) Cuz we like dem “know how fo teach odda peopo da same tings” dey wen learn. (2 Tim 2:1, 2) If we no hold back fo share wat we kno, den us guys an oddas goin be moa akamai an happy.

WEN LOOK LIKE PEOPO NO STAY TANKFUL

14. Wat mos peopo do wen we do someting fo dem?

¹⁴ Wen we give or do stuff fo oddas, speshly oua braddahs an sistahs, plenny times dey tell us tank you. Maybe dey give us one mahalo card or dey show dey tankful anodda way. (Col 3:15) Wen we get dese tings, it make us moa happy dat we wen do someting fo dem.

15. Wat we gotta rememba wen some no show dea mahalo?

¹⁵ But fo real tho, some peopo no show dea mahalo fo wat we wen do fo dem. Sometimes look like oddas no kea about wat we wen do fo help dem, or even tink about how much time, energy, or stuffs we wen use fo help dem. If dat happen, wat can help us fo no come all bum out or salty? Rememba wat oua main scripcha, Jesus Guys 20:35 tell. How happy we stay wen we give to oddas no depend on if peopo show dey tankful or not. We can still be happy fo give even if oddas no show dea mahalo. Try look wat can help us.

16. Wat we gotta try do wen we give?

¹⁶ Try copy Jehovah. He give good tings to peopo wedda or not dey show dey tankful. (Mat 5:43-48, NWT) Jehovah promise if we give jalike him “an no figga you goin get um back,” den we goin get “plenny good kine stuff bumbye.” (Luk 6:35) So no come bum out if peopo no show dey tankful. Rememba, Jehovah always goin give you plenny good stuff fo da tings you do fo help oddas an cuz you “give wit one good heart an feel good inside.”​—Smart Guys 19:17; 2 Cor 9:7.

17. Wass da mos importan reason why we like give to oddas? (Luke 14:12-14)

 ¹⁷ Anodda ting we can do fo copy Jehovah wen we give iz fo do wat Jesus tell at Luke 14:12-14. (Read um.) Az not wrong fo us invite oddas fo come eat or be nice to guys dat can do da same kine tings fo us. But wat if we figga we ony giving to oddas cuz we like get someting back from dem? If dass us, try do wat Jesus wen tell. We can invite or do someting fo somebody who we kno dat no can give us anyting back. Den we goin be happy cuz we copy Jehovah. An if we no expeck fo get anyting back, we always goin be happy fo give to oddas even wen dey no say mahalo.

18. Wat we gotta make shua not fo do, an how come?

¹⁸ No tink bad about oddas. (1 Cor 13:7) If oddas no say mahalo, we can ask ouaself, “Dey really no kea or dey jus wen foget?” Maybe get odda reasons how come dey neva tank us da way we had expeck. Maybe some supa tankful but get hard time fo show um. Maybe dey shame fo get help, speshly if befoa time dey wuz da ones helping oddas. But if we love oua braddahs an sistahs fo real kine, we no goin tink bad about dem an still yet, we goin be happy wen we give.​—Efe 4:2.

19-20. Wat else can help us fo be happy fo give to oddas? (Go look da picha.)

¹⁹ Be patient. Da akamai King Solomon wen write, “Ship yoa wheat ova da ocean, Cuz afta long time, fo shua you goin get someting back fo dat.” (Teacha 11:1) Dis scripcha stay talking about how some guys might show dea mahalo “afta long time.” Dis iz wat wen happen to one sistah.

²⁰ Long time ago, one wife of one circuit ovaseah wen sen one nice letta fo build up one sistah who jus wen get baptize.  In her letta she wen tell how importan iz fo stay faitful to Jehovah. About eight years layta, da sistah wen write back an she wen tell, “You donno dis but I really wanted fo let you kno how much you wen help me ova da years.” Den she tell, “[Yoa letta] wuz supa nice, but da scripcha wen really hit my heart, an I neva foget um.” a Afta she wen tell some of da pilikia she had fo deal wit, da sistah tell, “Sometimes, I jus wanted fo be pau. Pau wit da trut. Pau wit having fo take kea tings. Jus pau. But da scripcha you wen write had help me fo no give up an keep goin. Fo dose eight years, neva have notting else dat wen help me moa fo keep goin den yoa letta an da scripcha you wen share.” Try tink how happy da circuit ovaseah’s wife wuz fo get dis letta “afta long time”! Same fo us, somebody might show dey tankful long time afta we wen do someting good fo dem.

21. How come you like keep copying da way Jehovah give?

²¹ Like had tell befoa, Jehovah wen make us in one spesho way. Even tho we happy fo get stuffs from oddas, we stay moa happy wen we give to oddas. We feel good wen we can help oua braddahs an sistahs. An we stay happy wen dey show dey tankful. But, no matta if somebody tell mahalo or not, we can be happy dat we wen do da right ting. Neva foget dat wateva you give, “Da One In Charge, he can give you plenny mo den dat!” (2 Records 25:9) No ways we can eva give moa den Jehovah! An wen we get one gif from Jehovah, dass da bestes gif eva. So den, we go all out fo keep copying da way Jehovah give.