1-2. (a) Wen da aposal Paul wen write da letta fo da Hebrew peopo, wat wuz goin on ova dea? (b) How come da letta wen come perfeck time fo dem?

 AFTA Jesus wen mahke, da Hebrew Christians dat wuz in Jerusalem an Judea wen go tru some hard times. Right afta dey wen set up da Christian hui, peopo wen go agains dem an make dem suffa plenny (Jesus Guys 8:1) Den about 20 years layta, da Christians neva have nuff food wea dey wuz an dey wuz pooa. (Jesus Guys 11:27-30) But aroun 61 C.E., tings wuz goin pretty good an dey had peace compared to wat wuz about fo happen. Dat time, dey wen get one letta from da aposal Paul dat wuz goin help dem fo be ready fo wat wuz goin happen layta on.

² Da letta fo da Hebrew peopo came perfeck time cuz da peace dat dey had wuzn’t goin las. Da advice Paul wen give dem would help da Christians ova dea fo hando da trouble dey wuz goin face. Wat Jesus wen say earlia about Jerusalem getting bus up wuz goin happen pretty soon. (Luk 21:20) Az tru dat Paul an da Christians in Judea neva kno wen all dis wuz goin go down. But da Christians could use dis time dat dey had fo make ready by making dea fait moa strong an by learning fo hang in dea.​—Heb 10:25; 12:1, 2, New World Translation.

3. Why we like look real good at da book Fo Da Hebrew Peopo?

 ³ Pretty soon we goin face trouble dass way moa worse den wat da Hebrew Christians wen go tru. (Mat 24:21; Jesus Show 16:14, 16) So we go look some of da advice Jehovah wen give dem dat can help us out too.

“COME SOLID AN GROWN UP INSIDE”

4. Why wuz hard fo da Jews dat wen come Christians? (Go look da picha.)

⁴ Da Jews who wen come Christians had fo make mayjah changes, an no wuz easy fo dem. Fo long time, Jerusalem wuz one real importan place. Dat wuz wea da king dat wen rep Jehovah wen rule from. An da peopo who wanted fo worship Jehovah had fo do um at da temple in Jerusalem. All faitful Jews had fo follow da Rules From Moses an da rules dat dea Jew leadas wen teach. Had rules about food, cutting skin, an how fo treat guys dat wuzn’t Jews. But afta Jesus wen mahke, da sacrifices dey wen give at da temple no wuz good to Jehovah anymoa. So dat made um hard fo da Jew Christians who wuz use to following da Rules From Moses. (Heb 10:1, 4, 10) Even solid Christians like da aposal Peter had hard time make some of dese changes. (Jesus Guys 10:9-14; Gal 2:11-14) Cuz of all da new stuff dey wen believe, da Jew leadas wen start fo go afta dem.

5. Wat da Christians had fo watch out fo?

⁵ Two groups of guys wuz making um hard fo da Jew Christians. One wuz da Jew leadas dat wen treat dem like dey wuz traitors. An den, had some guys in da congregation dat wuz telling um dey still had fo follow da Rules From Moses. Maybe dey wuz saying dat cuz dey neva like peopo give dem hard time. (Gal 6:12) Wat wuz goin help da faitful Christians stick to da trut?

6. Wat Paul wen help his braddahs an sistahs fo do? (Fo Da Hebrew Peopo 5:14–6:1)

 ⁶ In his letta to da Hebrew peopo, Paul wen help his braddahs an sistahs fo study an tink hard about God’s Word. (Read um Fo Da Hebrew Peopo 5:14–6:1.) He wen use da Hebrew Scripchas fo explain to his braddahs why da way Christians wen worship Jehovah wuz way moa betta den da way da Jews wen worship him. a Paul wen kno dat da moa dey wen undastan da trut from da scripchas, dey would be able fo spot wrong teachings an no follow um.

7. Wat make um hard fo us today?

⁷ Today get plenny peopo dat spread anykine stuff dat go agains wat Jehovah say iz right. Some guys say dat Witnesses Fo Jehovah iz wrong cuz dey lissen to wat da Bible tell about sex. Da way peopo tink iz coming moa an moa diffren den da way God tink. (Smart Guys 17:15) Das why iz supa importan fo us spock dat kine wrong tinking an shut um down. Den it not goin throw us off an make us stop serving Jehovah.​—Heb 13:9.

8. How we can come moa solid az one Christian?

⁸ Paul wen tell da Hebrew Christians fo keep coming moa solid, an we gotta do da same ting. Dis mean we gotta study da Bible real good an get fo kno da way Jehovah tink. We gotta keep doin dis even afta we give oua life to Jehovah an get baptize. No matta how long we been in da trut, all us gotta read da Bible an study um all da time. (Songs 1:2) Wen we study da Bible regula, iz goin help us make oua fait moa strong. Dass someting Paul wen tell da Hebrew Christians dey need fo do.​—Heb 11:1, 6. 

GET FAIT FO “GET DA KINE LIFE DAT STAY FO REAL”

9. How come da Hebrew Christians wen need strong fait?

⁹ Would take strong fait fo da Hebrew Christians fo make um tru da trouble dat wuz goin happen in Judea. (Heb 10:37-39) Jesus wen tell his followas fo dig out to da mountains wen dey see da army guys come all aroun Jerusalem. Wat he wen tell wuz fo all Christians, wedda dey wen live in Jerusalem town or out in da country. (Luk 21:20-24) Back den, wen one army wuz goin attack, peopo would dig out to one town wit walls fo be safe. Would take fait fo follow wat Jesus wen say, cuz digging out to da mountains wen look like neva make sense.

10. How strong fait would help da Christians? (Fo Da Hebrew Peopo 13:17, NWT)

¹⁰ Da Hebrew Christians had fo learn fo trus da guys Jesus wen use fo direck da congregation. Da guys showing da way fo go probly wen give clear instrucktions on wen fo dig out an how fo do um. (Read um Fo Da Hebrew Peopo 13:17, NWT.) Da aposal Paul wen tell his braddahs an sistahs fo “lissen to da guys dass showing you da way fo go.” He neva mean dat dey had fo lissen to da eldas jus cuz dey had to, but cuz dey wen trus dem. So da Hebrew Christians  had fo build dea fait in dese guys befoa da trouble wen come. If da Christians wen lissen to da eldas wen tings wuz all good, would be moa easy fo dem lissen wen times wuz hard.

11. How come we gotta have strong fait?

¹¹ Same same like da Hebrew Christians, we need strong fait. Da time we living in now, mos peopo no believe da end iz coming pretty soon, an cuz of dat dey make fun of us. (2 Pet 3:3, 4) Even tho da Bible tell us some tings dat goin happen during da big trouble, still get plenny tings we donno. We gotta have strong fait dat Jehovah kno wen da end goin come, an wen dat time come, he goin take kea us.​—Hab 2:3.

12. Wat goin help us make um tru da big trouble?

¹² We gotta make oua fait strong dat Jehovah iz using “da akamai worka guy dat da boss trus” fo guide us. (Mat 24:45, NWT) Wen da big trouble start, we probly goin get clear instrucktions dat goin save oua lifes, jus like da Hebrew Christians wen get wen da Rome army wen go all aroun Jerusalem. Now iz supa importan dat we trus da braddahs in Jehovah’s hui dass showing us da way fo go. If we no trus an lissen to da intrucktions we get now, goin be moa hard fo lissen bumbye wen get da big trouble.

13. Why da Christians had fo follow wat Fo Da Hebrew Peopo 13:5 wen tell?

¹³ Wen da Hebrew Christians wuz waiting fo da sign fo bag, dey had fo keep dea life simpo an no get “love fo money.” (Read um Fo Da Hebrew Peopo 13:5.) Some of dem had go tru times wea dey wuz broke an neva have nuff food. (Heb 10:32-34) Even tho dey wen go tru hard times fo da trut befoa, maybe some of dem wen start fo trus in money fo proteck dem. But no matta how much money dey had, dat wuzn’t goin proteck dem from wen Jerusalem wuz goin get wipe out. (Jam 5:3) Fo da guys dat wen love money, would be moa hard fo dem dig out an leave dea house an all dea stuffs dey wen own.

14. How strong fait can affeck da way we look at money an da tings we can get?

¹⁴ Money or tings we can get not goin be da mos importan ting, if we get strong fait dat Jehovah goin wipe out dis world pretty soon. Wen da big trouble come, money not goin mean notting. Da peopo goin “throw dea silva on top da streets,” cuz dea “silva an da gold no goin get um outa trouble.” (Eze 7:19) Radda den trying fo make az much money az can, we gotta make choices dat goin help us an oua family serve Jehovah. So we no like spen moa money den we get, or spen all oua time taking kea of all da stuffs we get. (Mat 6:19, 24, NWT) Az da end of dis world come moa close, we gotta choose wedda we goin trus in Jehovah or in oua money an oua material tings.

“YOU GUYS GOTTA HANG IN DEA”

15. How come da Hebrew Christians had fo hang in dea?

¹⁵ Da Hebrew Christians had fo hang in dea cuz tings in Judea wuz getting moa worse. (Heb 10:36) Even tho guys had go agains some of da Hebrew Christians an had make dem suffa, plenny of  dem neva have fo go tru dat. Paul wen say dat even tho dey wen go tru hard times dat wen tes dea fait, dey neva suffa az much az Jesus, who wen bleed an mahke. (Heb 12:4) Wen plenny peopo wuz coming Christians, da Jews wuz getting moa nutz an violent. Few years befoa dat wen Paul wen go visit Jerusalem, he we get mob. Ova 40 Jews wen “make one plan bout Paul. Dey make one promise dat dey no goin eat o drink notting till dey kill um.” (Jesus Guys 22:22; 23:12-14) Da Christians wen live in one time wea peopo wen hate dem an make dem suffa. But still yet, dey had fo meet fo worship, preach, an make dea fait moa strong.

16. How da letta to da Hebrews can help us look at tests da right way? (Fo Da Hebrew Peopo 12:7)

¹⁶ Wat would help da Hebrew Christians fo hang in dea? Paul had kno dey had fo look at da tests dey wuz goin tru da right way. Paul wen explain dat God might let us go tru tests fo help train us. (Read um Fo Da Hebrew Peopo 12:7.) Dis kine training can help us fo be one moa betta Christian. By tinking about wat goin happen at da end of da tes, would make um moa easy fo da Hebrew Christians fo hang in dea.​—Heb 12:11.

17. Wat Paul wen learn about hanging in dea wen peopo make you suffa?

¹⁷ Paul wen tell da Hebrew Christians fo hang in dea an no give up wen goin tru tests. He could give dem good advice about how fo hang in dea wen peopo make dem suffa. Paul wen make plenny peopo suffa befoa he wen come one Christian, so he wen kno how bad dey wuz getting treated. He wen kno how fo hang in dea too cuz wen he wen come one Christian he had fo suffa tru all kine stuff. (2 Cor 11:23-25) So  Paul knew wat he wuz talking about wen come to wat it take fo hang in dea. He wen remind da Christians dat wen goin tru tests, dey needed fo rely on Jehovah an not demselfs. Dass how come Paul wen say, “Da One In Charge, he da One dat help me . . . I no goin come sked.”​—Heb 13:6.

18. Wat goin happen to all us in da future, an wat we gotta do now?

¹⁸ Right now, peopo making some of oua braddahs suffa, but dey hanging in dea. One way we can show oua love fo dem iz by praying fo dem. An sometimes we can help dem by giving dem da stuffs dey need. (Heb 10:33) Da Bible iz clear wen it say, “Erybody dat like live da way God like, an stay tight wit God Spesho Guy Jesus Christ, peopo goin make dem suffa.” (2 Tim 3:12) So all us gotta make ready fo da hard times dass goin come pretty soon. We gotta full on trus Jehovah now, an kno fo shua dat he goin help us wit wateva tests goin come up in da future. Pretty soon all da guys who trus him neva goin have fo suffa again.​—2 Tess 1:7, 8.

19. Wat we can do fo make ready fo da big trouble? (Go look da picha.)

¹⁹ Garanz Paul’s letta to da Hebrew Christians wen help dem fo make ready fo da troubles dey wuz goin face. Paul wen tell dem fo study da Bible real good an undastan um moa betta. If dey wen do dat, would help dem fo spock out an shut down teachings dat would make dea fait come weak. He wen tell dem fo make dea fait moa strong so dat dey would be fas fo follow Jesus an da guys he wen use in da hui. An he wen help da Christians learn fo hang in dea by looking at dea tests az one chance fo Jehovah train dem. All us gotta follow dat same advice. If we do dat, we goin be able fo hang in dea an be faitful to da end.​—Heb 3:14.