1. Wat Jesus goin do pretty soon?

 WE LIVE in one time wea mayjah changes goin happen. Pretty soon, Jesus goin judge erybody who live on top da eart. Jesus let his followas kno how tings in da world would be like befoa he judge erybody. He wen tell dem wat tings fo look fo befoa da world pau. (Mat 24:3, NWT) Dis prophecy stay in Matthew chaptas 24 an 25, an get da same ting in Mark chapta 13 an Luke chapta 21.

2. Wat we goin talk about in dis lesson, an how dis goin help us?

² Jesus wen tell three stories fo help us be ready. Dey like warnings fo us. Dese stories iz about da sheeps an da goats, da smart an da stupid girls, an da bags money. Dey goin help us fo undastan dat one person goin get judge by da way dey ack. Wen we go ova dese stories, we go try find wat we can learn from dem. Da firs story we goin go ova iz da one about da sheeps an da goats.

DA SHEEPS AN DA GOATS

3. Wen Jesus goin judge peopo?

³ In da story of da sheeps an da goats, Jesus wen say dat he goin judge peopo by how dey ack wen dey hea da good news an by how dey treat his anointed braddahs. (Mat 25:31-46) In da “big trouble,” right befoa Armageddon, he goin see wedda dey sheeps or goats. (Mat 24:21) Jalike how one sheep guy separate da sheeps  from da goats, Jesus goin separate da guys dat stick wit his anointed braddahs from da ones dat no stick wit dem.

4. From wat Isaiah 11: 3, 4 tell, why we kno Jesus goin be fair wen he judge peopo? (Go look da picha on da cova.)

⁴ Da Bible say dat wen Jesus judge fo Jehovah, always goin be fair. (Read um Isaiah 11:3, 4.) He look at da way peopo ack, tink, an talk, even da way dey treat his anointed braddahs. (Mat 12:36, 37; 25:40) Jesus goin kno who wen back up his anointed braddahs an da work dey wen do. a One of da mos importan ways somebody back up Christ’s braddahs iz by helping dem wit da preaching work. Dese guys dat “erytime do da right ting,” goin get chance fo “live to da max foeva!” (Mat 25:46; Jesus Show 7:16, 17) Dass one unreal reward fo da guys who stay faitful! By staying faitful tru da big trouble an even afta, dey get dea names in “Da Book Dat Tell Who Get . . . Life.”​—Jesus Show 20:15.

5. Wat we learn from da story of da sheeps an da goats, an who dis fo?

⁵ Be loyal. Jesus story of da sheeps an da goats iz mainly fo da guys dat get da hope fo live foeva on top da eart. Dey show dey loyal by helping Christ’s braddahs in da preaching work an by lissening to guys Jesus wen pick, da “akamai worka guy dat da boss trus.” (Mat 24:45, NWT) But da guys goin heaven gotta pay attention to da story of da sheeps an da goats too. How come? Cuz Jesus looking at how dey ack, tink, an talk. So dey gotta be loyal too. In fact, Jesus wen tell two odda stories dass speshly fo da anointed. Can find um in Matthew chapta 25. Nex we go talk about da story of da smart an da stupid girls.

DA SMART AN DA STUPID GIRLS

6. How five of da girls wen show dey wuz smart? (Matthew 25:6-10)

⁶ In da story of da girls, Jesus wen talk about ten girls who wen go out fo meet da groom. (Mat 25:1-4) Dey all wuz hoping dey could go wit da groom to da party fo da wedding. Jesus wen describe five of dem az “smart” an da odda five az “stupid.” Da smart girls wuz ready an waiting. Dey wen stay ready fo da groom til weneva, even if he wen show up night time. So, dey wen bring lamps so dey could see in da dark. Dey even wen bring extra oil in case da groom wen come late. Dey wuz ready fo keep dea lamps burning. (Read um Matthew 25:6-10.) Wen da groom wen come, da smart girls wen go wit him to da party. Same lidat, da anointed who stay ready an faitful wen Jesus come goin get dea reward of bein wit him in his Govament in heaven. (Jesus Show 7:1-3) Wat about da five stupid girls?

7. Wat wen happen to da five stupid girls, an how come?

⁷ Da smart girls wuz ready fo wen da groom wen come, but da five stupid girls no wuz. Da stupid girls lamps wuz about fo go out cuz dey neva bring nuff oil wit dem. Wen dey had find out da groom wuz goin come pretty soon,  dey had fo go buy oil. Wen he had come, dey wuzn’t back yet. Dat time, “da groom come by da smart girls. Dey was ready, an dey go wit him to da wedding party. An da groom peopo shut da door.” (Mat 25:10) Layta on wen da stupid girls wen come back, dey wanted fo go into da party, but da groom wen tell dem, “No way! I donno you guys.” (Mat 25:11, 12) Dose girls wuzn’t ready fo wait fo da groom. Wat all da anointed can learn?

8-9. Wat da anointed can learn about da story of da ten girls? (Go look da picha.)

⁸ Be ready an waiting. Jesus neva say dat wuz goin have two groups of anointed, one group dat wuz ready an waiting til Jesus come at da big trouble, an one group dat wuzn’t ready. But he wuz saying wat would happen to da anointed if dey no wuz ready fo hang in dea til da end. If dey not ready, dey not goin get dea reward. (John 14:3, 4) Dass some serious stuff! Wedda we get da hope fo live in heaven or on da eart, we all gotta pay attention to da warning from da story of da ten girls. All us gotta be ready an waiting, an hang in dea til da end come.​—Mat 24:13.

⁹ Fo show how importan stay fo be ready an waiting, afta Jesus wen tell da story about da ten girls, he wen tell anodda story about da bags money. Dat story show how importan iz fo work hard.

DA BAGS MONEY

10. How da two workas wen show dey wuz faitful? (Matthew 25:19-23)

¹⁰ In da story about da bags money, Jesus wen talk about three worka guys, an ony two wuz faitful to da masta. (Mat 25:14-18) Da two workas dat wuz faitful wen work hard an make moa money fo  da masta. Befoa he wen go on his trip, he wen give dem plenny money fo dem take kea. Two of da workas wen work hard an wuz smart wit da money. Wat wen happen? Wen da masta had come back, dey wen double his money. Da masta wen tell dem dat dey wen do good an dat he stay happy wit dem. (Read um Matthew 25:19-23.) But wat about da third worka guy? Wat he wen do wit da money da masta wen give him?

11. Wat wen happen to da worka dat wuz one “lazy buggah,” an how come?

¹¹ Da third worka guy wen get one bag money, but he wuz one “lazy buggah.” His masta wen expeck him fo be smart wit how he use da bag money. But instead, he wen bury um inside da groun. Wen da masta wen come back, da worka ony had one bag money fo give him an notting extra. Da worka wen have one lousy attitude. Instead of saying sorry fo not making moa money fo da masta, da worka wen do someting dat wuzn’t right an wen blame da boss an tell um, “I know you one hard guy dat no fool aroun.” Da masta no wuz happy wit him, wen take away da money bag, an wen throw da worka outa his house.​—Mat 25:24, 26-30.

12. Who da two faitful workas rep today?

¹² Da two workas who wuz faitful rep da anointed Christians who faitful. Da masta, Jesus, wen tell dem, “Go come an stay wit me. I stay good inside.” Dey wen get dea reward in heaven, dass da firs time God bring back da mahke guys alive. (Mat 25:21, 23; Jesus Show 20:5b) On da odda hand, how wat wen happen to da worka dat wuz one lazy buggah iz one warning fo da anointed?

13-14. Wat da anointed learn from da story about da bags money? (Go look da picha.)

¹³ Work hard. Jus like da story of da ten girls, in da story of da bags money,  Jesus no wuz telling dat da anointed wuz goin come lazy buggahs. But, he wuz saying wat wuz goin happen if dey wen slow down an lose dea fiyah. Dea hope wouldn’t be one garantee an dey wouldn’t be able fo go into God’s Govament in heaven.​—2 Pet 1:10.

¹⁴ Jesus stories about da ten girls an da bags money make um clear dat all da anointed Christians gotta be ready an waiting, an dey gotta work hard. Jesus wen say someting else fo warn da anointed. Stay inside Matthew 24:40, 41.

WHO “GOD GOIN TAKE”?

15-16. How Matthew 24:40, 41 help da anointed see dat dey gotta watch out?

¹⁵ Befoa Jesus wen tell dese three stories, he wen talk about one las judgement of da anointed fo see who wuz approved. He wen talk about two guys doin da same kine work inside one field, an two wahines doin da same kine work wit one grinding stone. But Jesus wen say dat “God goin take one guy, an he no goin take da odda guy,” an dat “God goin take one wahine, an he no goin take da odda one.” (Read um Matthew 24:40, 41.) Den he wen tell his followas fo “Watch out! Cuz you guys donno wat time yoa Boss goin come back.” (Mat 24:42) Jesus wen say someting lidat wen he wen tell da story about da ten girls. (Mat 25:13) Wat he wen say wuz conneckted? Look like. Ony da ones dass fo real anointed an faitful goin get taken to God’s Govament in heaven.​—John 14:3.

¹⁶ Watch out. If da anointed in one spiritual way neva watch out, dey no goin be brought togedda wit “da peopo dat God wen pick.” (Mat 24:31) So all of God’s peopo, even da guys dat get chance fo live foeva on top da eart, gotta watch out in one spiritual kine way too, an dey gotta stay faitful.

17. Why we no need worry if Jehovah wen pick somebody fo be anointed in oua time?

¹⁷ Cuz we kno Jehovah so good, we trus dat eryting he do iz fair. So we no worry if Jehovah wen pick somebody fo be anointed in oua time. Try tink about da story dat Jesus wen tell about da guys who start fo work on da grape farm in da aftanoon time about five clock. (Mat 20:1-16) Da guys who wen start work layta on in da day wen get paid da same az da guys who wen start work moa early. Same lidat, it no matta wen Jehovah pick da anointed. Dey goin go heaven if dey faitful wen Jehovah judge dem.

LISSEN TO DA WARNINGS

18-19. Wat we wen learn in dese three stories?

¹⁸ Wat we wen learn so far? Fo da guys dat get da chance fo live foeva on top da eart, da story of da sheeps an da goats show how come we gotta stay loyal to Jehovah now an wen get da big trouble. Right befoa Armageddon wen Jesus do da judging, da guys who faitful “goin live to da max foeva.”​—Mat 25:46.

¹⁹ Anodda ting we wen check out wuz two stories dat wen warn da anointed. In da story of da ten girls, five of  dem wuz smart. Dey wuz ready an waiting az long az had to, fo wen da groom come. But da stupid girls no wuz ready. So da groom neva let dem come to da wedding party. Us too gotta be ready fo wait fo howeva long take fo Jesus come an smash dis world. An den, in da story of da bags money, we wen talk about two workas dat wuz faitful an wen work hard. Dey wen work hard fo dea masta an he wuz happy wit dem. But he no wuz happy wit da worka dat wuz one lazy buggah. So wat we learn from dat? We gotta stay busy an work hard fo Jehovah all da way to da end. Da las ting we wen learn wuz dat da anointed gotta watch out in one spiritual way so dat God can take dem to heaven. Dey no can wait fo come togedda wit Jesus in heaven. Afta Armageddon, dey goin be Jesus bride in da wedding luau fo God’s Bebe Sheep Guy.​—2 Tess 2:1; Jesus Show 19:7, 9.

20. Wat Jehovah goin do fo da guys dat lissen his warnings?

²⁰ Even tho da time fo Jesus judge iz coming soon, we no need be sked. If we stay faitful, oua loving Faddah goin give us “unreal powa” fo “stand in front . . . da Fo Real Kine Guy.” (2 Cor 4:7; Luk 21:36) Wedda we get da chance fo live in heaven or on top da eart, we goin make oua Faddah happy if we lissen to da warnings inside Jesus stories. Cuz Jehovah so good to us, oua names goin be in da “Book Dat Tell Who Get Da Real Kine Life!”​—Dan 12:1; Jesus Show 3:5.