No need tink dat jus cuz da 70 followas no wuz dea wen Jesus wen start da Lord’s Evening Meal, dat he neva like dem or dat dey wen bag from him. Jesus jus wanted fo be wit his aposals dat night.

Da 12 guys an da 70 guys wen follow Jesus. He firs wen choose 12 of dem fo come his aposals. (Luk 6:12-16) He wuz in Galilee wen he “tell his twelve guys” fo go out an “teach da Good Stuff From God, an make da sick peopo all ova da place come good.” (Luk 9:1-6) Layta in Judea, Jesus wen pick 70 odda guys an wen sen um out “two by two.” (Luk 9:51; 10:1) So Jesus had followas in differen places dat wen preach about him.

Da Jews dat wen come Jesus followas would celebrate da Passova ery year, probly wit dea ohana. (Egypt 12:6-11, 17-20) Right befoa he wuz goin mahke, Jesus an his aposals wen go Jerusalem. But he neva ask all his followas from Judea, Galilee, an Perea fo come celebrate da Passova togedda. Jesus wanted fo ony be wit his aposals dis time. Jesus wen tell dem, “I stay tink plenny bout dis. I fo real like eat dis Passova food wit you guys befo I suffa.”​—Luk 22:15.

He had one good reason fo dat. Pretty soon, Jesus wuz goin die az “God bebe sheep” fo “hemo da shame fo da bad kine stuff dat erybody inside da whole world stay do!” (John 1:29) He wuz goin die in Jerusalem, wea fo long time peopo wen go fo make sacrifice. Da Passova lamb wen remind da Israel peopo dat Jehovah wen save dem an take dem outa Egypt. But Jesus sacrifice wuz goin do moa den dat. He wuz goin save erybody fo dem no sin or mahke no moa! (1 Cor 5:7, 8) Cuz of wat Jesus wen do, da twelve aposals wuz goin come da foundation of da Christian hui. (Efe 2:20-22) An da holy city Jerusalem get “twelve big kine stone block fo da foundation. On top get da names fo da twelve guys dat Jesus wen sen all ova fo tell peopo bout God Bebe Sheep Guy.” (Jesus Show 21:10-14) So da faitful aposals wuz goin have one spesho paht fo help reach God’s goal. So den, make sense how come Jesus wanted fo have dem wit him fo da las Passova an fo wat wuz goin happen right afta​—da Lord’s Evening Meal.

Da 70 an da odda followas no wuz dea at dat meal wit Jesus. Still yet, da Lord’s Evening Meal wuz goin be good fo all his faitful followas. All da followas who God wen pick fo go heaven wuz goin be paht of da deal fo God’s govament, dat Jesus wen tell da aposals dat night.​—Luk 22:29, 30.