Wat Can Learn From Livin Stuff?

“You guys can even aks da animals, an dey goin teach you. Aks da birds dat fly in da sky, an dey goin tell you. O squawk to da earth, an da earth goin teach you. O let da fish inside da ocean tell you.”​—JOB 12:7, 8.

SCIENCE guys an guys who design an build stuff learn plenny from plants an animals. Dey lookin real good an copyin livin tings so dat dey can make new stuff an make da stuff we get moa betta. We go try check out some exampos an try aks yoaself, ‘Who wen make all dis? An who deserve da credit fo um?’

Wat Can Learn From Da Whale’s Flippas?

Wat can da guys who make airplanes learn from da humpback whale? Real plenny. One full grown humpback whale weigh about 65,000 pounds. Dass like one loaded semi-truck! Da bugga’s body iz pretty stiff an he get flippas dat jalike wings. Dey 40-feet long but still can move fas an easy on da watta. Wen time fo grind, da whale swim undaneat da shrimp o da fish, an swim in circles an blow bubbles same time. Wat he doin iz he makin one bubble net fo get all da food fo come togedda so he can jus grind um one time. Dis bubble net iz small. Can be ony five feet aroun.

Wat wen blow science guys minds iz how dis hujangus whale could swim aroun in small kine circles. Dey wen figga out da whale could ony do dis cuz how da flippas stay. Da edge of da flippas not smooth, like one airplane wing, but da ting get bumps on top um.

Da bumps on da flippas help da whales swim up moa easy. How you figga? One magazine explain um lidis: ‘Da bumps make da watta move ova da flippa so make um easy fo da whale swim up. If da flippa wuz smooth, he no could do dis.’

How all dis help us? If dey made airplane wings like da whale’s flippas, would be moa simpo, safa, an would be moa easy fo take kea. One guy who know plenny about all dis wen tell: ‘Pretty soon all da airplanes goin have bumps on top of um like da whale’s flippas.’

Copyin Da Wings Of Da Seagull

We know awready dat peopo copy da birds’ wings wen makin stuff dat fly like da airplane. But now da guys who design all dis an make um, dey takin um to anodda level. Dey makin even betta copies of da birds’ wings. One science magazine wen tell at da University of Florida, dey wen try copy how da seagull fly. Dey wen go make one drone dat can float in da air an can dive down an go back up real fas.

Seagulls can do all kine nuts stuff in da air. Dass cuz, dey bend dea wings at da elbow an da shouldas. Da magazine tell da drone get metal rods dat move da wing like da seagull. Da unreal way da wings wuz designed, make um so dat da drone can float an dive between tall buildins. Da military like one drone lidat so dat dey can use um fo find all kine weapons in da big cities.

Copyin Da Mo’o’s Feets

Us can learn plenny from da land animals like da mo’o. Can climb up da wall an hang upside down on da ceilin. Even Bible times, da mo’o wuz known fo dat. (Proverbs 30:28) How da mo’o can do dat?

Dey can stick to smooth kine stuff like glass cuz da tiny hairs on top iz feets. No moa glue on top um. Da hair on da feet make um so dey can stick to almos anytin.

Knowin all dis, how dat can help us? Can make one material can copy da gecko’s feet an can use dat instead of velcro. * By da way, velcro iz one odda stuff dey wen copy from nature. One guy who study all dis stuff wen tell: ‘One material made from “gecko tape” would be good fo medical kine stuff fo close up wounds’.

Who Should Give Props To?

NASA wen make one robot dat get plenny legs an walk like one scorpion. An in Finland, dey wen make one tractor dat can climb ova stuff like one giant bug. Odda science guys make one fabric dat copy how da pinecone open an close fo let moisture in an out. One car company wen copy da boxfish fo make one car dat get less drag from da wind. Odda research guys tryin fo figga out how come da abalone shell so strong. Dey tryin fo copy dat fo make lighta, moa strong armor fo da soliders.

We wen learn so plenny from nature dat research guys wen make one list of plenny animals an plants an how dey all work. One magazine wen tell dat science guys can go look ova hea fo help dem figga out how fo design stuff. All da info about da plants an animals iz like nature’s trademark. Normally wen you make sometin, you trademark um so you get da credit fo um. Science guys wen tell: ‘We should be tankful to nature fo all da stuff we wen copy from um.’

How nature wen get all dese bright ideas? Plenny research guys, dey tink iz cuz of all kine random stuff happenin ova uku million years. Odda research guys dey no believe dat. One science guy wen tell in The New York Times: ‘Wen we see unreal designs in nature ony easy da ansa. If one bird look, walk an quack like one duck, iz one duck.’ So same lidat if you can spock da design in nature, den garuntee get one designa.

Fo shua if someone wen design one moa betta airplane wing, one bandage, clotheses o one betta car, dat person should get all da props. If you cockaroach somebody’s designs an no give um da credit, you stealin.

Make sense to you dat all dis unreal stuff dat science guys stay copyin wen jus happen by chance? If you need da smarts fo make one copy, you need even moa smarts fo make da real ting. Who should get moa props den? Da guys who wen make da copy, o da one who wen make da real ting?

Da Ansa Dat Make Sense

Plenny peopo wen dey see all da designs in nature, dey wen feel like da Songwrita of Songs Fo God 104:24 wea he tell: “Eh! You Da One In Charge! Get choke plenny tings you wen make! An eryting you make, you know wat you stay do! Da world stay full a da tings you wen make.” Da Bible writa, Paul, had feel da same way wen he had write Fo Da Rome Peopo 1:20. He tell ova dea: “From befo time wen God make da world, anybody dat try fo undastan da stuffs God wen make, dey can figga how God stay, no matta dey no can see him. You know, God get dis unreal powa dat goin stay lidat foevas. Az why he stay God fo shua. An erybody can undastan all dat. Az why dey no mo excuse fo how dey ack.”

Still yet plenny peopo who respeck da Bible an believe in God, dey tink God wen use evolution fo make stuff. Wat da Bible tell about all dat?

[Footnote]

[Blurb]

How nature wen come up wit so much good ideas?

[Blurb]

Who iz nature’s patent holder?

[Box/​Pikchas]

If da copy take one akamai designer, wat about da original?

Dis aircraft dat move around easy copy da seagull’s wings

A gecko’s feet no get dirty, neva leave a residue, stick to anyting except Teflon, an stick an unstick wit no problem. Researchers tryin fo copy dem

Da low-drag design of da boxfish iz behind da vehicle concept

[Credit Lines]

Airplane: Kristen Bartlett/​University of Florida; gecko foot: Breck P. Kent; box fish is car: Mercedes-Benz USA

[Box/Pikchas]

DEY REAL AKAMAI, DEY KNOW WEA FO GO

Plenny animals dey “real akamai.” Dey can go all ova an not get lost. (Wat Da Smart Guys Wen Tell 30:24, 25) We go try check out two of um.

◼ No Moa Traffic Fo Da Ants Wen da ants go look fo food, how dey find dea way back home? Science guys in England wen figga out da ants go mark da path wit one smell. An dey make dea trail so dat easy fo find dea way back home. One magazine tell: ‘Wen da pharoah ant go leave da nes he go make forks in da trail an he make da forks at jus da right angle.’ Dis real akamai cuz wen da ants goin back, wen he hit da fork, he always choose da mos easy trail cuz dat one always go back home. So wea dey make da trail kokua dem so dey no get all tired out from gettin lost.

◼ Da Birds Know Wea Fo Go Plenny birds can fly real far an in all kine weatha an dey no get lost. How dey do dis? Research guys wen figga out dat da birds can feel da eart’s magnetic field but one magazine wen tell dat da magnetic field get small kine changes an no always poin da same place. So how da birds know wea dey goin? Da birds stay use da sunset eryday fo know wea dey stay. Da sun move thru da year but da bird get sometin inside dem, like one clock, dat tell dem da time of da year. Dey put all dat togedda an dey use dat fo know wea fo fly.

Who wen teach da ants fo make da trails lidat? Who wen teach da birds wea fo go? Wat you tink? Wen happen wit no thought behind um thru evolution, o get one supa akamai Creator?

[Credit Line]

© E.J.H. Robinson 2004