Since small kid time I wen love nature. My ohana would love to go to da forest an da lakes all by wea we stay in oua home town of Findland. Me, I love animals. Wen I was one small kid I wanted fo hug ery cat an dog I wen see! Wen I wen grow up, wen really bodda me da way da peopo wuz treatin da animals real bad. Afta a while, I wen join one hui dat wuz fightin fo da animals, an I wen meet all kine guys who wuz jalike me.

We wen try get odda peopo fo get on board fo fight fo da animals too. We wen give out stuff fo teach peopo about um, we wen protest, we wen fight agains da fur shops an da places wea dey go test da animals. We even wen make oua own hui fo proteck da animals. Plenny times we wen get in trouble wit da law cuz we wuz doin anykine nutz stuff fo fight fo da animals. I wuz arrested an had fo go court plenny times.

I wuzzin ony worried about da animals. Da odda pilikia in da world wuz boddarin me too. Afta a while, I started fo run wit some odda hui’s, like da Amnesty International an Greenpeace. I wen give erytin fo support dese guys an wat dey wuz doin. I wen speak up an try help da guys who wuz broke, hungry, an neva have nottin. But I had start fo see I no can change da world. All dose hui’s could fix da manini kine stuff but da big stuff wuz gettin moa worse. I wen feel like evil wen take ova da whole world an nobody wen kea. An me, I no could do anytin.

Feelin all bum out cuz I no could do anytin, I started fo tink about God an da Bible. I had studied da Bible wit Witnesses Fo Jehovah befo. I wen like dat dey wen show me aloha an dey wen kea about me, but I wuzzin ready fo change my life. Dis time wuz diffren. I wen buss out my Bible an started fo read um, an started fo make me feel real good. I wen spock some verses out dat wen say treat da animals good. Like Wat Da Smart Guys Tell 12:10 tell “da good kine peopo, dey make shua dey take kea dea animals.” I wen figga out dat God iz not da one causing all dis pilikia in da world. Erytin all jam up cuz peopo not doin wat God tell. Wen hit me hard wen I wen learn about Jehovah’s love an aloha.​—Songs Fo God 103:8-14.

Wen all dis wuz happenin, I wen find one coupon fo da book What Does the Bible Really Teach? an I wen sen um in. Right afta dat one Witness couple wen come my door an aks me if I like study. I said “shoots!” I started fo go meetins at da Kingdom Hall. An cuz of dat, da trut started fo reach my heart.

I wen change plenny stuff all cuz of da Bible. I wen stop smokin, gettin all buss, I wen change how I wen look, even da way I wen talk. I wen even change how I wen view da govament guys. (Fo Da Rome Peopo 13:1) Da way I wuz livin befo wea I would fool aroun wit whoevas, I wen hemo all dat.

Da hardes ting wuz how fo see da hui’s I wuz runnin wit. Dat neva happen fas. I felt like if I left dem I would be one traitor. But I wen figga out dat ony God’s Kingdom wuz goin fix all da pilikia dat stay in da world. I wen decide fo go all out fo dat Kingdom an fo kokua odda guys fo learn about um.—Matthew 6:33.

I used to tink ony had two kine peopo—da good kine an da bad kine—an da bad kine I wuz ready fo fight agains dem. But tanks to da Bible, I no full on hate peopo anymoa. Instead, I try fo show love an aloha to peopo. (Matthew 5:44) One way I do dat iz I teach peopo about da good kine tings about da Kingdom. I feel supa good inside fo see how dis work make peopo stay happy, dey get peace, an dey get fo real kine hope.

Cuz I leave erytin in Jehovah’s hands, I no worry no moa. I know fo shua, az da Creator, he not goin let humans an da animals suffa foeva. An he not goin let da eart get destroyed. Moa den dat, wit his Kingdom, he goin fix all da pilau stuff dat wen happen, an he goin do um pretty soon. (Isaiah 11:1-9) Make me supa hauoli fo know all dese tings, an fo help odda peopo fo trus um too. I no feel like I gotta change da world anymoa.