Try picha dis. One fadda stay talkin to his young seven year ol boy. He tell um: “Long, long time ago, God wen make da eart, da sun, da moon, da stars.” Da boy tink litto while an he say: “Daddy, who make God?”

Da fadda tell da boy: “Nobody wen make God. He wuz always dea.” Da boy, he good wit dat fo now. But even wen he come moa olda, he still tinkin about dat question. He get hard time fo figga out how somebody no get one start cuz erytin get one start. Even da universe. He tink to himself ‘Wea God come from den?’

How da Bible ansa dat? Pretty much da same way da fadda wen ansa da boy. Moses wen write: “Befo had mountains, befo you make da world an all da diffren lands, befo had time even, you stay God fo real kine. An you goin stay God foeva!” (Songs Fo God 90:1, 2.) Isaiah wen say: “You guys neva know all dis, o wat?! You neva hear bout dis?! Da One In Charge, he da God dat stay foeva!” (Isaiah 40:28) Jude 25, NW, tell dat God wuz hea “for all past eternity.”

Dat mean he wuz hea befo time, now, an foeva. Dose scripchas show dat God, he da King foeva like Paul wen tell at 1 Fo Timoty 1:17. Dis mean dat no matta how far back you go in da past, he wuz always dea. An he goin stay foeva. (Wat Jesus Show John 1:8) Dass one of da tings dat make him da Almighty.

How come so hard fo undastan dis? Cuz oua life so manini compared to Jehovah, we no view time da same way az him. Cuz God iz foeva, one tousan years iz like one day fo him. (2 From Peter 3:8) Try picha dis. You tink one grasshoppa who live ony like fifty days undastan how long us guys live, 70 o 80 years? No can! Da Bible tell wen come to God dat we like grasshoppas. Even wat we undastan iz ony litto bit compared to him. (Isaiah 40:22; 55:8, 9) So make sense dat plenny stuff about Jehovah we no can undastan.

Even tho hard fo undastan dat God been aroun foeva, still make sense. Cuz if someone wen make God, dat person would be da Creator. But da Bible wen tell dat Jehovah “wen make eryting.” (Wat Jesus Show John 4:11) Even da universe no wuz always hea. (Da Start 1:1, 2) Wea came from den? Da One who wen make um had fo come firs. An God wuz dea even befo his boy Jesus an all da angels. (Job 38:4, 7; Fo Da Colosse Peopo 1:15) So befo he wen make anytin, wuz ony him. So no ways anybody wen make God cuz neva had nottin befo him.

Us bein hea an da universe prove dat get one God dass always been hea foeva. He da ony one who could put all laws in motion fo make da universe run smooth. An he da ony one who wen give life to erytin.​—Job 33:4.