TRY PICHA DIS: You stay inside one museum an get plenny stuff inside dea. An all dose tings stay all buss, dey all ol, get stuff missin from um. But get one of dose tings, da ting iz all cherreh, erytin look good about um. You aks da guy showin you aroun, “eh dat one moa new den da odda ones o wat?”. He tell you, “no, brah, dat one iz moa ol den all da rest. An we neva do nottin to um”. You wen aks da guy, “wat, you guys wen cova um up real good o wat?”. He say, “no, in fact dis one, ho da rain, da wind, erytin wuz takin it’s toll on um. An had plenny guys tryin fo mess wit um”. Den you tink to yoaself, ‘Ho! I wonda wat dis ting iz made out of?’

Same same like da ting in da museum, da Bible iz one of da mos oldes books out dea​—olda den mos odda books. Yeah, get plenny odda olda books out dea but az time go on, da ting no good awready. Jalike wat dey say about science, all dat all outdated awready. Da tings dey say about medical kine stuff, now we know, all dat stuff iz bad fo you. An plenny of da ol writings, no moa da whole ting. Plenny stuff stay missin from um.

Da Bible iz diffren tho. Even tho dey wen start writing da ting 3,500 years ago, da whole ting stay dea. An even tho guys wen try mess wit um thru all dose years—dey wen try burn um, dey wen try say you no can have um, say da ting is no good—erytin inside dea still good. Thru all of dis, da Bible neva come outdated. An even wen we learn new kine stuff, we see da Bible wuz ahead of it’s time.—See the box “Outdated or Ahead of Its Time?”

You might tink, ‘Da Bible can help us today o wat?’ Fo ansa dat, try aks yoaself: ‘Wat iz da mayjah kine pilikia peopo get today? Which one da mos scary?’ Maybe you tinkin war, peopo no take kea da aina, crime, o even corrupt kine guys. Now try tink of some of da tings da Bible say. Try aks yoaself, ‘if peopo live by wat da Bible tell, da world would be one betta place?’

LOVE FO LIVE GOOD WIT ERYBODY

”Da peopo dat help da odda peopo come frens one moa time, dey can stay good inside cuz God goin tell, “Dey my kids.”” (Matthew 5:9) “Try yoa bestes fo be da one dat do eryting fo live good wit erybody wit aloha, no matta dey go agains you.”​—Fo Da Rome Peopo 12:18.

PITY, LET UM GO

”Da peopo dat pity da odda peopo, an give um chance, dey can stay good inside cuz God goin pity dem an give um chance too.” (Matthew 5:7) “No let odda peopo bodda you how dey ack. Wen somebody give you problem, eh, let um go, an no stay huhu wit dem. Da One In Charge * wen let you guys go, fo you make jalike him an let dem go too.”​—Fo Da Colosse Peopo 3:13.

ALL DA DIFFREN PEOPO LIVIN GOOD TOGEDDA

”From one guy, God make all da diffren peopos fo live all ova da world. He set up da times an da places fo dem stay.” (Jesus Guys Wat Dey Wen Do 17:26) “Now I know fo shua dat God treat erybody same same. He tell, “Go come by me, erybody dat get respeck fo me an do da right ting, from all da diffren peopos””.​—Jesus Guys Wat Dey Wen Do 10:34, 35.

RESPECK DA AINA

”God, Da One In Charge, put da guy inside Eden, da place he wen plant plenny trees, fo live dea an work da groun an take kea eryting.” (Da Start 2:15) God goin “ruin those ruining the earth.””​—Revelation 11:18 NW.

HATE TRYIN FO GET PLENNY STUFF AN FOOLIN AROUN

Jesus tell da peopo, “Watch out! Make shua you no try get eryting fo ony you, cuz if you get plenny stuffs, dat no mean you goin live fo real kine!” (Luke 12:15) “But you guys no go fool aroun wit nobody, no go do pilau kine stuff, no try fo get eryting fo ony you. No even tink fo do dat kine stuff. Cuz you guys da peopo dat stay spesho fo God awready, an all dat kine stuff not da way da peopo dat stay spesho fo God suppose to live.”​—Fo Da Efesus Peopo 5:3.

NO BULAI, WORK HARD

”An erytime we like live da right way.” (Fo Da Hebrew Peopo 13:18) “Whoeva steal stuffs betta not do um no moa. Dey gotta work hard fo do good kine stuff wit dea hands.”​—Fo Da Efesus Peopo 4:28.

KOKUA DA GUYS DAT NEED HELP

”Da guys dat tink dey nobody, give um good kine words. Kokua da guys dat not strong inside. Hang in dea wit erybody, an no get huhu.“ (1 Fo Da Tessalonika Peopo 5:14) “Kokua da peopo dat get hard time-da kids dat no mo faddah o muddah, an da wahines dat no mo husban fo take kea dem.—From James 1:27.

Da Bible no jus list erytin we gotta do. In one easy way, da Bible show us why good fo us live dat way, an how fo do um. If erybody live by wat da Bible tell, all da mayjah pilikia would be manini no? So da stuff dat stay in da Bible good fo us today, an we need um moa den eva! So wat da Bible can do fo you now?

One of da mos akamai guys sed: “Da guy dat get da smarts from God, da tings he do, goin show proof dat he right.” (Matthew 11:19) So you no tink, da ony way fo figga out if da ting work iz if you try do um an see wat happen. So try tink: ‘if wat stay in da Bible really work, den goin make oua life moa betta ah? How da ting goin help me wit da pilikia I get right now?’ Try check out wat dis wahine wen go thru.

Delphine, * she had one good, happy life. All dat wen change real fas. Her teenage daughta wen mahke, her marriage wen fall apart, she wen get plenny money kine problems. She wen rememba: ‘I neva even know who I wuz awready—no moa daughta, no moa husban, no moa hale. I felt like I wuz nottin​—I neva have any powa. I no could even tink about one future.’

Afta Delphine wen go thru all dat she wen undastan dese words: “Da time us get fo live, ony seventy year, maybe eighty, if we strong. But no matta how long us guys live, da bestes year, still make us guys come real tired an give us plenny humbug. Cuz da year pass real fas, jalike we fly away.”​—Songs Fo God 90:10.

Wen Delphine wen go thru all of dis, she wen go to da Bible fo help. An wat da ting did fo her wuz unreal. Da next three articles goin show how da Bible wen help odda guys wit dea pilikia wen dey wen follow wat da Bible say. Dey wen feel dat da Bible wuz like dat ting we wen talk about in da museum at da beginnin of dis article. Iz not like da books dat come all ol an stay good fo nottin.You tink dat da Bible made from sometin diffren, dat get God’s thoughts​—an not man’s one?​—1 Fo Da Tessalonika Peopo 2:13.

Maybe you feel like life ony short an get ony pilikia inside. Wen yoa problems start piling up an you feel like you stay drownin, wea you go fo help an advice you can trus fo help you get thru um?

We go try check out three ways da Bible can help you fo

1. stay away from pilikia wen can.

2. try yoa bes fo fix um wen problems come up.

3. hang in dea wen you no can change wat you goin thru.

Da nex articles goin talk about dese three tings.