Da Bible Can Help If You Stay Hooked On Drugs?
Ery year, millions mahke cuz of drug abuse. Wen had da COVID-19 pandemic, dis problem had come moa worse. Da smarts from da Bible wen help plenny fo no use da drugs dey wuz hooked on. If you get hard time kick da habit, da smarts from da Bible can help you too. a
In dis article
How come we gotta go to da Bible fo get help fo get off drugs?
Guys dat study dis wen find dat da guys hooked on drugs plenny times get deep kine issues like dey stay lonely, stress out, worry too much an depress. Dese tings can make you like use drugs but da Bible can give you da fait you need so dat you no give in. Da Bible show how you can be good frenz wit God. (Songs Fo God 25:14, New World Translation) You might tink no ways can solve yoa problems by yoaself but wit God’s help, can.—Mark 11:22-24.
Four steps from da Bible dat help kick da habit
1. Get fo know Jehovah God. b (John 17:3) He da One dat make eryting an get all da powa. On top of dat, he yoa Faddah in heaven dat love you plenny. He like come close to you an use his powa fo help you. (Isaiah 40:29-31; From James 4:8) He get one unreal future fo you if you choose da good tings dat come from his love.—Jeremiah 29:11; John 3:16.
2. Ask Jehovah fo help. Pray to God an ask him fo help you fo no do drugs, so dat you can be “holy,” o clean an be one guy dat “God like.” (Fo Da Rome Peopo 12:1, NWT) Thru his spesho spirit, he give you “unreal powa.” (2 Fo Da Corint Peopo 4:7; Luke 11:13) Dis powa goin help you fo no use drugs no moa an “live da new kine way”, da way God like you live.—Fo Da Colosse Peopo 3:9, 10.
3. Fill up yoa mind wit da way God tink. (Isaiah 55:9) He goin help you “go all out fo come all new kine inside, how you feel an how you tink.” Dat mean fo change da way you tink an dat goin help you fo get off drugs. (Fo Da Efesus Peopo 4:23) Da way God tink stay in da Bible, dass how come importan fo read um regula. (Songs Fo God 1:1-3) Cuz plenny peopo wen get help fo undastan wat da Bible teach, tings wen work out really good fo dem. (Jesus Guys 8:30, 31) Witnesses Fo Jehovah offa one free program fo learn da Bible by talking story. We like you come check out oua meetings too, dass wea we find out wat da Bible tell an how we can use um in oua life.
4. Pick frenz who goin help you. If you stay trying fo get off drugs, da kine frenz you get can affeck you in one good o bad way. (Smart Guys 13:20) God get good kine peopo who worship him dat you can hang out wit, an he like you be frenz wit dem cuz dat goin be good fo you. (Songs Fo God 119:63; Fo Da Rome Peopo 1:12) Be keaful about wat you do fo fun cuz da guys dat you watch, lissen to, o read about, az jalike you hanging out wit dem. Stay away from anyting dat goin make you like do someting bad.—Songs Fo God 101:3; Amos 5:14.
Scripchas dat can help you get off drugs
Songs Fo God 27:10: “Cuz maybe my faddah an my muddah goin leave me, you know. But you, Da One In Charge, you goin take kea me.”
“I neva know my real faddah, an dat wen leave one puka inside me. But wen I had come fo know Jehovah God az one real Person dat really love me, I wen find one reason fo live an wuz able fo get off drugs.”—Wilby, from Haiti.
Songs Fo God 50:15: “Erytime you get hard time, you gotta aks me fo help you. Den I goin get you outa trouble.”
“Erytime, dis scripcha wen give me da mana fo keep goin even wen I had mess up again. Jehovah wen keep his promise.”—Serhiy, from Ukraine.
Smart Guys 3:5,6: “Mo betta if you go all out fo trus Da One In Charge. Wateva you do, tink bout God an wat he like you fo do, den he goin make shua notting goin jam you up.”
“Dis scripcha wen help me fo trus Jehovah, an not tinking dat I can do um by myself. Cuz of him, I wuz able fo change my whole life.”—Michele, from Italy.
Isaiah 41:10: “So no sked, cuz you guys da one I stay wit. No come bum out, cuz I yoa God. I make you guys come strong inside. Mo den dat, I help you guys. I no let you guys fall down! Az cuz I get plenny powa fo do da right ting fo you guys.”
“I wen stress out plenny wen I no could get drugs. Dis scripcha wen help me fo trus dat God would help me no get all stress out, an dass wat he wen do.”—Andy, from South Africa.
1 Fo Da Corint Peopo 15:33: “Eh! No go tink da wrong way lidat!. . . You hang out wit da bad kine guys, dat goin jam you up fo you no be one good guy.”
“Bad frenz wen get me started on drugs an I got hooked. I stopped drugging out ony afta I wen stop hanging out wit dem. I wen make frenz wit peopo living da way I wanted fo live - clean.”—Isaac, from Kenya.
2 Fo Da Corint Peopo 7:1: “Us guys gotta clean out all da bad kine stuff dat make us pilau inside o outside.”
“Even tho wuz hard, dose words wen hep me like clean up my life an no do da drugs an odda tings dat no wuz good fo me.”—Rosa, from Colombia.
Fo Da Philippi Peopo 4:13, NWT: “He give me da powa fo stay strong fo hando any kine stuff.”
“I know I no could stop taking drugs on my own, so I wen pray to God fo help me. He wen give me da powa I wen need.”—Patrizia, from Italy.
Moa real-life stories: Kick da habit wit help from da Bible
Joseph Ehrenbogen wen grow up wea peopo scrap all da time an he wen come one chronic. He wuz hooked on booze, tobacco, pakalolo an heroin. Plenny times he wen ovadose an almos wen mahke. One Bible scripcha wen help him fo know dat he had chance fo change. Go read his story in da article “I Learned to Respect Women and Myself.”
Dmitry Korshunov had hard time fo stop drinking. Plenny times he wen go back to his old ways. Try look da video ‘I Stay Sick Of Living One Jam Up Life’ fo see wat wen help him.
You tink da Bible stay agains getting medical treatment fo get off drugs o wat?
No. Da Bible make um clear: “Da guys dat not sick no need docta, ony da sick guys need docta.” (Matthew 9:12) Da U.S National Institute on Drug Abuse tell da same ting: “Being hooked on drugs, not one simpo kine sick. Mos times fo stop, take moa den jus trying fo control yoaself.” Fo shua, da help from God iz moa strong den wat somebody can do on dea own. But plenny guys dat had stop drugs an drinking by doing wat da Bible tell, still yet had fo get medical help. c Jalike one guy named Allen wen tell: “Wen I had stop drinking, da pain wuz unreal an da witdrawals wuz crazy. Dass wen I had come fo see dat I wen need, not ony spiritual kine help, but medical kine help too.”
You tink da Bible stay agains using drugs fo medicine?
No. Da Bible talk about how booze wuz used fo help peopo dat wuz sick o wuz goin thru plenny pain cuz dey wuz about fo mahke. (Smart Guys 31:6; 1 Fo Timoty 5:23) But jalike alcohol, you can get hooked on da drugs dat dey use fo hando pain. So good fo know da danger an be supa keaful about da way we use dat kine drugs.—Smart Guys 22:3.
a Even tho dis article wen talk about how you can stop using drugs, da Bible truts in hea can help guys fighting odda problems like being hooked on booze, tobacco, food, gambling, porn, o social media.
b Jehovah iz God’s name. (Songs Fo God 83:18, NWT) See da article “Jehovah, Who Dat?”
c Plenny rehab centas, hospitals an programs fo stay clean an soba can help. Each person gotta look ova da choices an den figga out which one iz da bes fo him.—Smart Guys 14:15.
You May Also Like
WHITEBOARD ANIMATIONS
No Let Yoa Life Go Up In Smoke
Plenny peopo smoke or vape, but oddas wen quit an some stay tryin hard fo quit. How come? Smokin really dat bad?
