If yoa healt wen come moa worse all of a sudden, den you know how dat can tire you out. You probly get plenny stuffs goin thru yoa head an all kine diffren feelings. An goin to da doctas can cost plenny money too. So wat can help you fo hando? How you can help somebody dat jus wen find out dey get one mayjah healt problem? Even tho da Bible not one book about medicine, get plenny good tings dat can help you hang in dea da bes you can if you get one mayjah healt problem.

•   Go docta

   Wat da Bible tell: “Da guys dat not sick no need docta, ony da sick guys need docta.”—Matthew 9:12.

   Wat dat mean: Go docta wen gotta.

   Try dis: If can, get da bes docta fo help you. Sometimes, might be good fo see wat anodda docta tink (Smart Guys 14:15) Wen you talk to da docta, make shua you undastan dem an dey know exackly wat you going thru. (Smart Guys 15:22) Learn about yoa sickness an wat you can do fo try get betta. Wen you know wat fo expeck, dat goin help you tink moa clear so you can choose da bes ting fo do.

•   Keep doing stuffs dass good fo yoa healt

   Wat da Bible tell: “Wen one guy work out fo make his body come strong, dass good.”—1 Fo Timoty 4:8

   Wat dat mean: Goin help you if you do tings good fo yoa healt, like regula exercise.

   Try dis: No work out ony once in a while. Do um regula, eat food dass good fo you, an get nuff sleep. Even if you stay trying fo figga out how fo live wit yoa new healt problem, doctas tell dat trying hard fo do tings good fo yoa healt iz wort it. An you know already, no do stuffs dat goin jam you up moa o go agains wat da docta tell.

•   Ask oddas fo help

   Wat da Bible tell: “You get one fren, an he get love an aloha fo you all da time. You get one braddah . . . fo help you wen you need um cuz get trouble.”—Smart Guys 17:17.

   Wat dat mean: Yoa frenz can help you wen you goin thru hard times.

   Try dis: Talk to one fren dat you trus an can tell how you feel. Dis can help you hando da stress an make you feel betta. Yoa family an frenz probly like help you, but dey donno wat fo do. So tell dem exackly wat you need help wit. No expeck too much, an always be tankful fo da help dey give. Same time, so tings no get too much fo you, good fo let da frenz know wen dey can come an how long dey can stay.

•   Stay positive

   Wat da Bible tell: “Wen you feel jalike you like dance an sing inside, dass good medicine fo yoa body. But wen you stay sad inside, jalike yoa body all jam up.”—Smart Guys 17:22.

   Wat dat mean: If you stay positive an no lose fight, dat can help you stay calm an hando one mayjah healt problem.

   Try dis: Az you get use to wat you goin thru now, look good at da tings you can do, not at wat you no can do. No compare yoaself wit oddas o da way you wuz befo you wen get sick. (Fo Da Galatia Peopo 6:4) Make goals dat you can do an dat make sense. Dis goin help you no lose fight wen you look to da future. (Smart Guys 24:10) Az much az can, do tings fo oddas. If you do dat, you goin be happy an no goin focus on yoa own problems.—Jesus Guys 20:35.

 Da Bible show dat Jehovah God a can help you hando healt problems. We no can expeck Jehovah fo cure us, but da guys dat worship him can get his help in dese ways:

 Peace. Jehovah goin make you guys come so “notting bodda you. Dat goin be mo betta den anybody can figga.” (Fo Da Philippi Peopo 4:6, 7) Dis peace can help you stay calm an no worry too much. God give dis kine peace to da guys who pray to him an tell him all about all da stuff dat bodda dem.—1 From Peter 5:7.

 Da smarts. Jehovah can give us da smarts fo make good choices. (From James 1:5) Fo get dis kine smarts, you gotta learn an use da truts from da Bible.

 One moa betta hope fo da future. Jehovah promise one future wen “nobody . . . goin tell, “I stay sick!”” (Isaiah 33:24) Dis hope help plenny peopo stay positive, even if dey goin thru mayjah healt problems right now.—Jeremiah 29:11, 12.