«Կանչիր ինձ, ու ես կպատասխանեմ քեզ և մեծամեծ ու անհասկանալի բաներ կպատմեմ, որոնք դու չգիտես» (Երեմիա 33։3, «Նոր աշխարհ թարգմանություն»)։

 «Կանչիր ինձ եւ ես քեզ պիտի պատասխանեմ, եւ ես քեզ պիտի մեծամեծ եւ անհասանելի բաներ իմացնեմ, որ դու չ’գիտես» (Երեմիա 33։3, «Արարատ» թարգմանություն)։

 Այս խոսքերով Աստված հրավիրում էր իր ժողովրդին աղոթքով դիմել իրեն։ Եթե նրանք ընդունեին հրավերն ու աղոթեին, Աստված նրանց կհայտներ, թե ինչ է լինելու ապագայում։

 «Կանչիր ինձ, ու ես կպատասխանեմ քեզ»։ «Կանչիր ինձ» արտահայտությունը չի նշանակում պարզապես Աստծու անունը տալ կամ գոչել։ Այս համարում Աստծուն կանչելը ներառում է նրանից աղոթքով օգնություն և առաջնորդություն խնդրելը (Սաղմոս 4։1; Երեմիա 29։12)։

 Այս հրավերը, ամենայն հավանականությամբ, ուղղված էր հին Իսրայել ազգին։ Նրանք երես էին թեքել Աստծուց, և բաբելոնական զորքը հարձակում էր գործել նրանց վրա (Երեմիա 32։1, 2)։ Եհովան a հրավիրում էր իսրայելացիներին վերադառնալ իր մոտ՝ հորդորելով աղոթել իրեն։

 «Մեծամեծ ու անհասկանալի բաներ կպատմեմ, որոնք դու չգիտես»։ Այն բաները, ինչ Աստված խոստանում է հայտնել, «անհասկանալի» են այն իմաստով, որ մարդիկ երբեք ինքնուրույն չեն կարող ըմբռնել դրանք։ «Անհասկանալի բաներ» արտահայտությունը կարող է նաև թարգմանվել «թաքցված բաներ»։

 Իսկ որո՞նք էին այն «թաքցված բաները», որ Աստված հայտնելու էր։ Ապագա իրադարձությունները, մասնավորապես՝ հին Երուսաղեմ քաղաքի կործանումն ու ամայացումը, ինչպես նաև դրա վերակառուցումը (Երեմիա 30։1-3; 33։4, 7, 8)։ Սակայն Աստված նաև խոստացավ, որ իրեն պաշտողները որպես ազգ չէին վերանալու (Երեմիա 32։36-38)։

 Երեմիա մարգարեն այս ուղերձը Եհովայից ստացավ մ. թ. ա. 608 թ.-ին՝ Սեդեկիա թագավորի իշխանության տասներորդ տարում։ Մինչ այդ Երեմիան նաև մարգարեացել էր, որ Երուսաղեմն ընկնելու է, իսկ Սեդեկիան գերության է տարվելու։ Քանի որ այս խոսքերը թագավորի սրտով չէին, նա կալանավորեց Երեմիային (Երեմիա 32։1-5; 33։1; 37։21)։

 Ահա այսպիսի հանգամանքներում Աստված ասաց Երեմիա 33։3-ում արձանագրված խոսքերը։ Ցավոք, Սեդեկիա թագավորը և ժողովրդի մեծամասնությունը չթողեցին իրենց ըմբոստ ընթացքը (Երեմիա 7։26; 25։4)։ Նրանք չկանչեցին Աստծուն՝ չփնտրեցին նրա առաջնորդությունը։ Մեկ տարի անց Սեդեկիան գահընկեց արվեց, Երուսաղեմը կործանվեց, իսկ ողջ մնացածների մեծ մասը գերեվարվեց Բաբելոն (Երեմիա 39։1-7)։

 Երեմիա 33։3-ում արձանագրված խոսքերը մերօրյա ընթերցողին հիշեցնում են, որ Եհովան պատրաստ է իր «կամքի մասին ճշգրիտ գիտելիքներ» տալ և «խորունկ գաղտնիքներ» բացահայտել նրանց, ովքեր աղոթում են իրեն և ուսումնասիրում իր Խոսքը՝ Աստվածաշունչը (Կողոսացիներ 1։9; 1 Կորնթացիներ 2։10)։ «Խորունկ գաղտնիքները» ներառում են մոտ ապագայի առնչությամբ Աստծու խոստումները (Հայտնություն 21։3, 4)։

 Դիտիր «Երեմիա» գրքի մասին այս կարճ տեսանյութը։