ՆԱԽՈՐԴ հոդվածներում քննարկվեց, որ կյանքի ցավալի իրողությունների պատճառով գուցե մտածենք, որ այլևս ուժ չունենք ապրելու։ Անկասկած դուք էլ ունեք ձեր դժվարությունները, ու թերևս դուք էլ եք մտածում, թե արդյոք ապրելն իմաստ ունի՞ կամ որևէ մեկը հետաքրքրվա՞ծ է ձեզանով։ Համոզված եղեք, որ Աստված անտարբեր չէ ձեր ցավի նկատմամբ։ Դուք շատ թանկ եք նրա համար։

86-րդ սաղմոսը գրողը, Աստծու հանդեպ վստահությամբ լի, այսպիսի խոսքեր է ասում. «Իմ նեղության օրը ես քեզ կկանչեմ, որովհետև դու կպատասխանես ինձ» (Սաղմոս 86։7)։ Բայց գուցե հարցնեք. «Իսկ «իմ նեղության օրը» Աստված ինչպե՞ս կպատասխանի ինձ»։

Թեև Աստված գուցե անմիջապես չվերացնի ձեր խնդիրները, բայց իր Խոսքի՝ Աստվածաշնչի միջոցով նա հավաստիացնում է, որ կտա ներքին խաղաղություն, որպեսզի կարողանաք դիմանալ։ Այնտեղ կարդում ենք. «Ոչ մի բանի մասին մի՛ մտահոգվեք, այլ ամեն ինչում աղոթքով և աղաչանքով շնորհակալության հետ մեկտեղ թող ձեր խնդրանքները հայտնի լինեն Աստծուն, և Աստծու խաղաղությունը, որ գերազանցում է ամեն միտք, կպահպանի ձեր սրտերն ու մտքերը» (Փիլիպպեցիներ 4։6, 7)։ Աստվածաշնչյան հետևյալ խոսքերը ձեզ ավելի շատ կվստահեցնեն Աստծու ջերմ հոգատարության մեջ։

«Նրանցից [ճնճղուկներից] և ոչ մեկը չի մոռացվում Աստծու առաջ.... դուք շատ ճնճղուկներից ավելի թանկ եք» (Ղուկաս 12։6, 7)։

ՄՏԱԾԵՔ։ Անգամ աննշան թվացող թռչունները անկարևոր չեն Աստծու աչքին. յուրաքանչյուրն էլ նրա համար թանկ կենդանի էակ է։ Նույնիսկ մեկ փոքրիկ ճնճղուկը չի վրիպում նրա աչքից։ Մինչդեռ մարդիկ շատ ավելի թանկ են Աստծու համար, քան ճնճղուկները։ Մարդ արարածը, լինելով երկրի վրա Աստծու արարչագործության գլուխգործոցը, ստեղծված է Աստծու «պատկերով» և կարող է իր մեջ զարգացնել ու դրսևորել նրա վեհ հատկությունները (Ծննդոց 1։26, 27)։

«Ո՛վ Եհովա, դու քննեցիր ինձ և ճանաչում ես ինձ։ Դու գիտես.... իմ մտքերը.... Քննի՛ր ինձ.... և իմացի՛ր ինձ անհանգստացնող մտքերը» (Սաղմոս 139։1, 2, 23)։

ՄՏԱԾԵՔ։ Աստված ճանաչում է ձեզ անհատապես։ Նա գիտի ձեր ամենախորունկ զգացումներն ու մտահոգությունները։  Անգամ եթե ուրիշները չեն հասկանում ձեր դժվարություններն ու մտատանջությունները, Աստված հասկանում է ձեզ և ցանկանում է օգնել։ Այս միտքը կարող է ձեզ ապրելու ուժ տալ։

«Ո՛վ Եհովա, լսի՛ր իմ աղոթքը, և օգնության իմ աղաչանքը թող քեզ մոտ գա.... Ականջդ դեպի ինձ խոնարհեցրու.... երբ կանչեմ քեզ, շտապի՛ր, պատասխանի՛ր ինձ... [Աստված] ուշ կդարձնի ընչազուրկ մարդկանց աղոթքին» (Սաղմոս 102։1, 2, 17)։

ՄՏԱԾԵՔ։ Այն օրվանից, երբ մարդիկ սկսել են տառապանքներ կրել, Եհովայի աչքից աննկատ չի մնացել նրանց աչքերից թափված և ոչ մի արցունք, այդ թվում՝ ձեր արցունքները (Սաղմոս 56։8)։ Աստված իր մտքում է պահում ձեր կրած բոլոր դժվարությունները ու ձեր թափած արցունքները, քանի որ դուք շատ թանկ եք նրա համար։

«Խուճապի մի՛ մատնվիր, որովհետև ես քո Աստվածն եմ, ես կամրացնեմ ու կօգնեմ քեզ.... Ես՝ Եհովաս՝ քո Աստվածը.... ասում [եմ]. «Մի՛ վախեցիր, ես կօգնեմ քեզ»» (Եսայիա 41։10, 13)։

ՄՏԱԾԵՔ։ Աստված պատրաստ է օգնել ձեզ, և եթե անգամ ընկնեք, նա կօգնի, որ ոտքի կանգնեք։

«Աստված այնքան շատ սիրեց աշխարհը, որ իր միածին Որդուն տվեց, որպեսզի ամեն ոք, ով հավատ է դրսևորում նրա հանդեպ, չկործանվի, այլ հավիտենական կյանք ունենա» (Հովհաննես 3։16)։

ՄՏԱԾԵՔ։ Դուք այնքան թանկ եք Աստծու համար, որ նա հանուն ձեզ զոհել է իր Որդուն՝ Հիսուսին։ Այդ զոհի շնորհիվ ձեր առջև բացվել է երջանիկ ու իմաստալից կյանքով հավիտյան ապրելու հեռանկար։ *