«Առաջին օձը, որ Բանսարկու և Սատանա է կոչվում.... մոլորեցնում է ողջ երկիրը» (Հայտնություն 12։9)։

ԻՆՉ ԵՆ ԱՍՈՒՄ ՄԱՐԴԻԿ

Ոմանց կարծիքով՝ Սատանան անձնավորություն չէ, այլ յուրաքանչյուր մարդու մեջ գոյություն ունեցող չարությունն է։

ԻՆՉ Է ԱՍՈՒՄ ԱՍՏՎԱԾԱՇՈՒՆՉԸ

Սատանան իրական անձնավորություն է։ Նա ըմբոստ հրեշտակ է՝ ոգեղեն արարած, որը հակառակվում է Աստծուն։ Աստվածաշունչը Սատանային կոչում է «այս աշխարհի իշխան» (Հովհաննես 12։31)։ Նա «սուտ նշանների» և «խաբեության» միջոցով իրագործում է իր նպատակները (2 Թեսաղոնիկեցիներ 2։9, 10)։

Սուրբ Գրքում արձանագրված է երկնքում տեղի ունեցած Սատանայի ու Աստծու զրույցը։ Եթե Սատանան միայն չարության խորհրդանիշ լիներ, որը գոյություն ունի յուրաքանչյուր անձնավորության մեջ, ապա ինչպե՞ս կարող էր Աստված, որը կատարյալ է ու անարատ, խոսել իր մեջ եղող չարության հետ (2 Օրենք 32։4; Հոբ 2։1–6)։ Հստակ է, որ Սատանան իրական անձնավորություն է և ոչ թե անձնավորված չարություն։

ԻՆՉՈ՞Ւ ԴԱ ՊԵՏՔ Է ՀԵՏԱՔՐՔՐԻ ՔԵԶ

Սատանան ուզում է, որ դու հավատաս, թե ինքը գոյություն չունի։ Դա նման է այն բանին, որ հանցագործը թաքցնում է իր ով լինելը, որպեսզի շարունակի չար գործեր անել։ Սատանայից պաշտպանվելու համար առաջին հերթին պետք է ընդունես, որ նա գոյություն ունի։

«Վա՜յ երկրին.... որովհետև Բանսարկուն ցած է իջել ձեզ մոտ» (Հայտնություն 12։12)։

ԻՆՉ ԵՆ ԱՍՈՒՄ ՄԱՐԴԻԿ

Շատերը հավատում են, որ Սատանան ապրում է երկրի տակ գտնվող կրակոտ դժոխքում։ Մյուսներն էլ հավատում են, թե նա մարդկանց մեջ գոյություն ունեցող չարությունն է։

ԻՆՉ Է ԱՍՈՒՄ ԱՍՏՎԱԾԱՇՈՒՆՉԸ

Սատանան ոգեղեն էակ է, ուստի ապրում է անտեսանելի ոլորտում։ Մի ժամանակ նա կարող էր ազատորեն ներկա լինել այնտեղ, որտեղ Աստված և հավատարիմ հրեշտակներն են ապրում (Հոբ 1։6)։ Հիմա, սակայն, նա վտարված է այն ոլորտից, որտեղ Աստված է, և մյուս չար արարածների հետ վայր է գցվել երկրի մերձակայքը (Հայտնություն 12։12)։

Արդյոք դա նշանակո՞ւմ է, որ Սատանան երկրի վրա կոնկրետ մի վայրում է բնակվում։ Օրինակ՝ գուցե կարդացել ես, որ հին Պերգամոն քաղաքի մասին ասվել է, որ նա այն վայրն է, «ուր որ Սատանան է բնակվում» (Հայտնություն 2։13)։ Իրականում, այդ արտահայտությունն ակնարկում է այն բանին, որ այդտեղ սատանայական պաշտամունք էր մատուցվում։ Սատանան չի ապրում երկրի վրա կոնկրետ մի վայրում։ Աստվածաշունչն ասում է, որ «աշխարհի բոլոր թագավորությունները» նրանն են (Ղուկաս 4։5, 6)։

«Ամբողջ աշխարհը Չարի իշխանության տակ է» (1 Հովհաննես 5։19)։

ԻՆՉ Է ԱՍՈՒՄ ԱՍՏՎԱԾԱՇՈՒՆՉԸ

Մարդկության մեծ մասը ենթարկվում է Սատանայի մոլորեցնող ազդեցությանը և այդպիսով ընկնում նրա իշխանության տակ (2 Կորնթացիներ 11։14)։ Դա է պատճառը, որ մարդիկ ի զորու չեն բարելավելու աշխարհի վիճակը։

Աստվածաշնչում արձանագրված են դեպքեր, երբ Սատանան և այլ ըմբոստ հրեշտակներ ազդել են մարդկանց վրա և վնաս են հասցրել նրանց (Մատթեոս 12։22; 17։15–18; Մարկոս 5։2–5)։

ԻՆՉ ԿԱՐՈՂ ԵՍ ԱՆԵԼ

Սատանայից սարսափելու կարիք չկա։ Նրա ազդեցության կամ իշխանության տակ չընկնելու համար դու պետք է իմանաս, թե ինչպես է նա մանիպուլյացիայի ենթարկում մարդկանց, որպեսզի «անտեղյակ չլինես նրա դիտավորություններին» (2 Կորնթացիներ 2։11)։ Աստվածաշունչն ընթերցելով՝ կարևոր գիտելիքներ կստանաս Սատանայի մարտավարությունների մասին և չես դառնա նրա զոհը։

Ձերբազատվիր այն առարկաներից, որոնք կապ ունեն դևերի գործունեության հետ (Գործեր 19։19)։ Օրինակ՝ թալիսմաններից, տպագրված նյութերից, տեսաֆիլմերից, երաժշտությունից և համակարգչային ծրագրերից, որոնք առնչվում են ոգեհարցությանն ու գուշակությանը։

«Հակառակվեք Բանսարկուին,— ասում է Աստվածաշունչը,— և նա կփախչի ձեզանից» (Հակոբոս 4։7)։ Հետևելով Սուրբ Գրքի իմաստուն խորհրդին՝ կարող ես պաշտպանել քեզ Սատանայի նենգություններից (Եփեսացիներ 6։11–18)։