ՌՈԶԱԼԻՆԴԸ, որ մեծացել է Անգլիայում, գիտելիքի ծարավ էր, նաև մեծ ցանկություն ուներ մարդկանց օգնելու։ Նա այնպիսի աշխատանք գտավ, որի մեջ մտնում էր անտուն մարդկանց, ինչպես նաև ֆիզիկական և մտային սահմանափակումներ ունեցողներին աջակցություն ցույց տալը։ Ուսումն ավարտելուց հետո Ռոզալինդը պատվաբեր աշխատանքի առաջարկ ստացավ։ Սակայն չնայած բավականություն պատճառող և միևնույն ժամանակ եկամտաբեր այդ աշխատանքին՝ նա ասում է, որ տարիներ շարունակ մտածել է, թե որն է իր կյանքի իմաստը։

Ի տարբերություն կենդանիների՝ մարդիկ բանական էակներ են։ Մենք կարող ենք անցյալից դասեր քաղել, ծրագրել ապագան և փնտրել կյանքի իմաստը։

Շատերն այն կարծիքին են, որ կյանքի իմաստը հարստություն կուտակելու կամ հռչակ ձեռք բերելու մեջ է։

Մենք մեր առաջնահերթություններն ենք դնում կյանքում։ Մեր ցանկությունները ավելի կարևոր են, քան Աստծու կամքը։

Սողոմոն թագավորը հսկայական հարստություն կուտակեց և իրեն հաճույքներից չզրկեց, բայց տեսավ, որ դրանք իր կյանքը հարատև իմաստով չեն լցնում։ Նա գրեց, թե ինչն է իրականում իմաստավորում մարդու կյանքը. «Այս ամբողջ ասվածի հետևությունը սա է. վախեցիր ճշմարիտ Աստծուց և պահիր նրա պատվիրանները, քանի որ դա է մարդու ողջ պարտականությունը» (Ժողովող 12։13)։ Ի՞նչ է մտնում Աստծու պատվիրանները պահելու մեջ։

Աստված ուզում է, որ մենք վայելենք կյանքը։ Սողոմոնը գրեց. «Մարդու համար բացի ուտելուց, խմելուց և իր տքնաջան աշխատանքով իր  հոգուն հաճույք պատճառելուց, ավելի լավ բան չկա։ Ես տեսել եմ, որ դա էլ է ճշմարիտ Աստծու ձեռքից» (Ժողովող 2։24)։

Աստված նաև ուզում է, որ սիրենք և հոգ տանենք մեր ընտանիքին։ Ուշադրություն դարձրու հետևյալ պարզ ու գործնական առաջնորդությանը, որ տրվում է ընտանիքի յուրաքանչյուր անդամի.

• «Ամուսինները պետք է սիրեն իրենց կանանց, ինչպես իրենց սեփական մարմինները» (Եփեսացիներ 5։28)։

• «Կինը պետք է խոր հարգանք տածի իր ամուսնու հանդեպ» (Եփեսացիներ 5։33)։

• «Երեխանե՛ր, հնազանդ եղեք ձեր ծնողներին» (Եփեսացիներ 6։1)։

Կիրառելով աստվածաշնչյան այս սկզբունքները՝ որոշ չափով երջանկություն և ուրախություն կգտնենք։ Բայց ամենակարևորն այն է, որ հնարավորինս մոտիկից ճանաչենք մեր Արարչին և նրա ընկերը դառնանք։ Աստվածաշունչը նույնիսկ հրավիրում է մեզ մոտենալ Աստծուն և խոստանում է, որ նա էլ մեզ կմոտենա (Հակոբոս 4։8)։ Եթե ընդունես այս հրավերը, կյանքդ իրական իմաստով կլցնես։

Ռոզալինդը, որի մասին նշվեց հոդվածի սկզբում, գտել է կյանքի իմաստը։ 10-րդ էջում կարող ես կարդալ, թե ինչպես նա գտավ իր հարցի պատասխանը։