Մաս 4

Աստված տեղեկացնում է իր նպատակների մասին

1, 2. Որտեղի՞ց գիտենք, որ Աստված պատասխանում է անկեղծ հետաքրքրություն ցուցաբերող մարդկանց հարցերին։

 ԱՍՏՎԱԾ, որ սիրո մարմնացում է, իսկապես հայտնում է իր նպատակները իրեն փնտրող անկեղծ անհատներին։ Հետաքրքրություն ցուցաբերող մարդկանց նա տալիս է իրենց հուզող հարցերի պատասխանները, այդ թվում նաև՝ թե ինչու է թույլատրել տառապանքը։

² Աստվածաշունչը հավաստիացնում է. «Եթէ [Աստծուն] որոնես, նա կ’գտնուի քեզանից»։ «Կայ Աստուած երկնքումը՝ գաղտնիքներ յայտնող»։ «Տէր Եհովան ոչ մի բան չի անիլ, եթէ չ’յայտնէ իր խորհուրդը իր ծառաներին՝ մարգարէներին» (Ա Մնացորդաց 28։9; Դանիէլ 2։28; Ամովս 3։7)։

Որտե՞ղ գտնել պատասխանները

3. Որտեղի՞ց կարող ենք իմանալ, թե ինչու է Աստված թույլատրել տառապանքը։

³ Թե ինչու է Աստված թույլատրում տառապանքը, և թե ինչ է ձեռնարկելու այդ կապակցությամբ, կարելի է իմանալ նրա կողմից ներշնչված մի արձանագրությունից, որ գրվել է մեր օգտի համար։ Այդ արձանագրությունը նրա սուրբ Խոսքն է՝ Աստվածաշունչը։ «Ամեն Գիրք աստուածաշունչ են եւ օգտակար [«Աստծու ներշնչումով գրված բոլոր [Սուրբ] գրքերը օգտակար են», ԱՆԹ]՝ վարդապետութեան, եւ յանդիմանութեան, եւ ուղղելու, եւ արդարութեան խրատելու համար. որ Աստուծոյ մարդը կատարեալ լինի ամեն բարի գործերի համար պատրաստուած» (Բ Տիմոթէոս 3։16, 17)։

4, 5. Ինչո՞վ է Աստվածաշունչն անզուգական։

⁴ Աստվածաշունչն իսկապես անզուգական գիրք է։ Այն հանդիսանում է մարդկության պատմությունը ներկայացնող ամենաճշգրիտ աղբյուրը։ Գիրքը տեղեկություններ է պարունակում նույնիսկ այն իրադարձությունների մասին, որ տեղի են ունեցել նախքան մարդու ստեղծվելը։ Այն նաև այժմեական է, քանզի այնպիսի մարգարեություններ է պարունակում, որ վերաբերում են ինչպես մեր օրերում կատարվող, այնպես էլ մոտ ապագայում տեղի ունենալիք իրադարձություններին։

⁵ Ճշգրտությամբ պահպանված լինելու հարցում ոչ մի գիրք այդքան ապացույցներ չունի, որքան Աստվածաշունչը։ Անտիկ դասական գրողների ստեղծագործություններից, օրինակ, միայն մի քանի ձեռագրեր են պահպանվել։ Ինչ վերաբերում է Աստվածաշնչին, ապա մինչև օրս, մասամբ թե ամբողջովին, պահպանվել են բազում ձեռագրեր. մոտ 6 000–ը Եբրայերեն Գրություններից (Հին Կտակարանի 39 գրքերը) և մոտ 13 000–ը Քրիստոնեական Հունարեն Գրություններից (Նոր Կտակարանի 27 գրքերը)։

6. Ինչո՞ւ կարող ենք վստահ լինել, որ Աստվածաշնչի տեքստն այսօր գրեթե չի տարբերվում բնագրից։

⁶ Ամենակարող Աստված, որի ներշնչմամբ գրվել է Աստվածաշունչը, հոգ է տարել, որ այդ ձեռագրերի կրկնօրինակման ժամանակ չխախտվի տեքստի ամբողջականությունը։ Այնպես որ այսօրվա մեր ունեցած Աստվածաշնչում հիմնականում նույնն է գրված, ինչ որ եղել է բնագրում։ Դրանում է՛լ ավելի կարելի է համոզվել, եթե հաշվի առնենք, որ Քրիստոնեական Հունարեն Գրությունների որոշ կրկնօրինակներ արվել են բնագրերի արձանագրումից հարյուր տարի էլ չանցած։ Մինչդեռ հազվադեպ է պատահում, որ հին աշխարհի գրողների ստեղծագործությունների՝ մեզ հասած ձեռագիր պատճենները արված լինեն բնագրից գոնե մի քանի դար հետո։

Աստծո պարգևը

7. Ի՞նչ տարածում է գտել Աստվածաշունչը։

⁷ Աստվածաշունչն ամենալայն տարածում ունեցող գիրքն է պատմության մեջ։ Մինչև օրս տպագրվել է ավելի քան երեք միլիարդ օրինակ։ Ոչ մի ուրիշ գիրք իր տպաքանակով չի կարող հավասարվել Աստվածաշնչին, նույնիսկ՝ մոտավորապես։ Աստվածաշունչը՝ մասամբ թե ամբողջովին, թարգմանվել է ավելի քան 2 250 լեզուներով։ Հաշվարկները ցույց են տալիս, որ այն մատչելի է երկրագնդի բնակչության ավելի քան 90%–ին։

8-10. Ինչո՞ւ արժե քննել Աստվածաշունչը։

⁸ Անշուշտ մի գիրք, որը պնդում է, թե գրվել է  Աստծո կողմից, և որի հավաստի լինելն ապացուցող բազում փաստեր կան թե՛ անմիջապես այդ գրքում և թե՛ արտաքին աղբյուրներում, արժանի է մեր քննությանը։ a Այն ցույց է տալիս, թե որն է կյանքի իմաստը, բացատրում է, թե ինչու է աշխարհում տիրում նման իրավիճակ, և պատմում է, թե ինչ է սպասվում ապագայում։ Ոչ մի ուրիշ գրքում նման բան չես գտնի։

⁹ Այո՛, Աստվածաշունչը մարդկության հետ Աստծո հաղորդակցման միջոցն է։ Այդ գիրքը գրի է առնվել նրա գործուն ուժի՝ սուրբ ոգու առաջնորդությամբ, և այդ գործին մասնակցել են մոտ 40 անհատներ։ Այսպիսով՝ Աստված մեզ հետ խոսում է իր սուրբ Խոսքի՝ Աստվածաշնչի միջոցով։ Պողոս առաքյալը գրել է. «Մեզնից Աստծու խօսքի լուրն առնելով, այն ընդունեցիք ոչ որպէս մարդկանց խօսք, այլ՝ ճշմարտապէս, որպէս Աստծու խօսք» (Ա Թեսաղոնիկեցիս 2։13)։

¹⁰ Աբրահամ Լինքոլնը՝ Միացյալ Նահանգների 16–րդ նախագահը, Աստվածաշունչն անվանել է «Աստծո կողմից մարդուն տրված լավագույն պարգևը.... Առանց նրա մենք չէինք կարողանա տարբերել ճիշտը սխալից»։ Այժմ տեսնենք՝ ինչ է ասում այս մեծագույն պարգևը այն բանի վերաբերյալ, թե ինչպես սկիզբ առավ տառապանքը, ինչու այն թույլատրվեց, և ինչ է Աստված ձեռնարկելու այդ կապակցությամբ։

[ծանոթագրություններ]

[Հարցեր ուսումնասիրության համար]

[նկար 10–րդ էջի վրա]

Աստվածաշունչը, որ գրվել է Աստծո ներշնչմամբ, մարդկության հետ նրա հաղորդակցման միջոցն է