Առակներ 21։1-31
21 Թագաւորների սիրտը ջրի վտակների պէս է Տիրոջ ձեռքին, դէպի ուր որ էլ ուզենայ՝ կ’դարձնէ:
2 Մարդիս ամեն ճանապարհը ուղիղ է իր աչքի առաջին. բայց սիրտերը կշռողը Տէրն է:
3 Արդարութիւն եւ իրաւունք գործելը Տիրոջ հաճելի է քան թէ զոհը:
4 Աչքերի ամբարտաւանութիւնը եւ սրտի հպարտութիւնը, որ ամբարիշտների լոյսն է, մեղք է։
5 Աշխատասէրի մտածողութիւնները միայն դէպի առատութիւն են. բայց ամեն աճապարող՝ միայն դէպի կարօտութիւն է դիմում:
6 Ստախօս լեզուով գանձեր շինելը մահը որոնողների փախստական ունայնութիւնն է:
7 Ամբարիշտների բռնութիւնը քարշ կ’տայ իրանց. որովհետեւ չեն ուզում իրաւունք անել:
8 Ծռմռած է յանցաւոր մարդի ճանապարհը, բայց մաքուրի գործն ուղիղ է:
9 Լաւ է կտուրի մի անկիւնումը բնակուել, քան թէ կռուասէր կնոջ հետ ընկերովի՝ տան մէջ:
10 Անզգամի հոգին չարութիւն է ցանկանում, նորա ընկերը նորա աչքի առաջին շնորհք չի գտնիլ:
11 Ծաղրողը տուժելիս միամիտը կ’իմաստնանայ, եւ իմաստունը կրթուելիս՝ գիտութիւն կ’ստանայ:
12 Արդար Աստուածը դիտում է ամբարշտի տան վերայ, նա գցում է ամբարիշտներին չարիքի մէջ*:
րշտի տան վերայ, ամբարիշտները չարութեան համար կործանուելիս։
13 Ով որ խցկէ աղքատի աղաղակի դէմ իր ականջը, ինքն էլ կ’կանչէ, եւ պատասխան չի գտնիլ:
14 Գաղտնի ընծան բարկութիւնը կը հանգեցնէ, եւ ծոցի պարգեւը՝ սաստիկ ցասումը:
15 Ուրախութիւն է արդարի համար իրաւունք անելը, բայց սոսկում՝ չարագործների համար:
16 Մարդ որ մոլորվում է խոհեմութեան ճանապարհից, ուրուականների ժողովքի մէջ կ’իջնէ:
17 Կարօտութիւն կ’ունենայ այն մարդը որ ուրախութիւն է սիրում, գինի ու իւղ սիրողը չի հարստանալ:
18 Արդարի համար անզգամը փրկանք կ’դառնայ, եւ ուղիղների փոխարէն՝ անօրէնը:
19 Լաւ է բնակուիլ ամայի երկրում, քան թէ կռուասէր եւ բարկացոտ կնոջ հետ:
20 Ցանկալի գանձ եւ իւղ կ’գտնուի իմաստունի բնակարանումը, բայց յիմարը կուլ կ’տայ նորան:
21 Արդարութեան եւ ողորմածութեան հետեւողը կ’գտնէ կեանք, արդարութիւն եւ պատիւ:
22 Իմաստունը վեր կ’ելնէ զօրաւորների քաղաքը, եւ կ’կործանէ նորանց ապաւինած ամրութիւնը:
23 Ով որ զսպէ իր բերանն ու լեզուն, իր հոգին նեղութիւններից կ’պահէ:
24 Ամբարտաւան լիրբի անունը Ծաղրող է, որ յանդգնութեամբ լրբութիւն է անում:
25 Ծոյլի ցանկութիւնը սպանում է նորան. որովհետեւ նորա ձեռքերը չեն ուզում գործել:
26 Նա ամեն օր սաստիկ ցանկանում է, բայց արդարը տալիս է եւ չէ խնայում:
27 Ամբարիշտների զոհը պիղծ է. մանավանդ երբոր չար խորհրդով մատուցանեն:
28 Ստախօս վկան պիտի կորչի, բայց նա, որ ինքը լսել է, միշտ կ’խօսէ:
29 Անզգամ մարդը պնդացնում է իր երեսը, բայց նա՝ որ ուղիղ է, քննում է իր ճանապարհը:
30 Չկայ իմաստութիւն, չկայ հանճար, չկայ նաեւ մի խորհուրդ Տիրոջ դէմ:
31 Ձի է պատրաստվում պատերազմի օրուայ համար. բայց փրկութիւնը Տէրիցն է:
Ծանոթագրություններ
^ 21։12 Կամ՝ Արդարը դիտում է ամբարշտի տան վերայ, ամբարիշտները չարութեան համար կործանուելիս։