Առակներ 4։1-27
4 Որդիք, լսեցէք հօր խրատը. եւ ականջ դրէք որ իմաստութիւնն իմանաք.
2 Որովհետեւ ես ձեզ բարի ուսում եմ տալիս, իմ օրէնքը մի ձգէք.
3 Որովհետեւ ես իմ հօր որդին էի, փափուկ եւ միամօր* էի:
4 Նա ինձ սովորեցնում էր եւ ասում ինձ. Թող քո սիրտը բռնէ իմ խօսքերը, պահիր իմ պատուէրները, եւ կ’ապրես:
5 Իմաստութիւն ստացիր, հանճար ստացիր. Մի մոռանար, եւ մի խոտորիր իմ բերանի խօսքերիցը:
6 Մի թողիր նորան, եւ նա քեզ կ’պահէ. նորան սիրիր, եւ նա քեզ կ’պաշտպանէ:
7 Իմաստութեան սկիզբն է*, «Իմաստութիւն ստացիր». եւ քո ամեն ստացուածքի հետ հանճար ստացիր:
8 Դու նորան մեծարիր, եւ նա քեզ կ’բարձրացնէ. նա քեզ կ’պատուէ, երբոր նորան գրկես:
9 Նա քեզ գեղեցիկ պսակ կ’տայ քո գլխի համար, եւ փառքի թագ կ’պարգեւէ քեզ:
10 Լսիր, որդեակս, եւ ընդունիր իմ խօսքերը, եւ կ’շատանան քո կեանքի տարիները:
11 Իմաստութեան ճանապարհը քեզ սովորեցրի, քեզ առաջնորդեցի ուղղութեան շաւիղներումը:
12 Դու գնալիս՝ քո քայլերը պիտի չ’նեղուին, եւ վազելիս չես գայթակղուիլ:
13 Պինդ բռնիր խրատը, մի ձգիր. նորան պահիր, որ նա քո կեանքն է:
14 Անզգամների ճանապարհը մի մտնիր. եւ մի ման գար չարերի ճանապարհումը:
15 Թող տուր նորան, նորա վերայ մի գնար, նորանից խոտորիր եւ անցիր:
16 Որովհետեւ նորանք չեն քնիլ, մինչեւ որ չարութիւն չ’անեն. եւ քնից կ’զրկուին, եթէ չ’կործանեն:
17 Նորա համար որ նորանք ամբարշտութեան հացն են ուտում եւ անիրաւութեան գինին խմում:
18 Բայց արդարների ճանապարհը ծագող լոյսի պէս է. որ գնալով լուսաւորվում է, մինչեւ որ կատարեալ օր է դառնում:
19 Ամբարիշտների ճանապարհը խաւարի նման է, նորանք չ’գիտեն թէ ինչով են գայթակղում:
20 Որդեակս, ուշադիր եղիր իմ խօսքերին, եւ ականջդ տուր իմ ասածներին.
21 Թող նորանք չ’գնան քո աչքի առջեւից, պահիր նորանց քո սրտի մէջ:
22 Որ նորանք կեանք են նորանց գտնողներին, եւ նորանց բոլոր մարմնին՝ բժշկութիւն:
23 Ամեն զգուշութիւնից առաւել զգուշացիր քո սրտին, որ նորանից է կեանքի ելքը:
24 Հեռացրու քեզանից բերանի ծռութիւնը, եւ նենգաւոր շրթունքները թող հեռու լինին քեզանից:
25 Թող քո աչքերն ուղիղ նային, եւ քո արտեւանունքները ուղղուած լինին դէպի քո առաջը:
26 Շիտակ արա քո ոտների շաւիղը, եւ քո բոլոր ճանապարհները կ’հաստատուին:
27 Մի խոտորիր աջ եւ ձախ, ոտքդ հեռացրու չարիցը:
