Եզեկիել 28։1-26
28 Եւ Տիրոջ խօսքը եղաւ ինձ ասելով.
2 Մարդի որդի, ասիր Տիւրոսի իշխանին՝ թէ Այսպէս է ասում Տէր Եհովան. Որովհետեւ սիրտդ հպարտացաւ եւ ասեցիր. Ես աստուած եմ, Աստուծոյ աթոռի վերայ եմ նստած ծովի միջումը. բայց դու մարդ ես եւ ոչ թէ Աստուած, թէեւ դու քո սիրտը Աստուծոյ սրտի տեղն ես դրել.
3 Ահա դու Դանիէլիցը իմաստուն ես. ոչ մի գաղտնիք մութ չէ քեզ համար.
4 Քո իմաստութեամբն ու հանճարովը քեզ համար հարստութիւն շինեցիր, եւ ոսկի ու արծաթ դրիր քո գանձարաններումը.
5 Քո շատ իմաստութիւնովը՝ քո վաճառականութիւնովը շատացրիր քո հարստութիւնը, եւ սիրտդ բարձրացաւ քո հարստութիւնովը։
6 Սորա համար այսպէս է ասում Տէր Եհովան. Որովհետեւ դու քո սիրտը Աստուծոյ սրտի նման շինեցիր,
7 Դորա համար ահա ես քեզ վերայ պիտի բերեմ օտարներին՝ ազգերին բռնաւորներին, եւ նորանք պիտի հանեն իրանց սրերը քո իմաստութեան գեղեցկութեան վերայ, եւ պիտի ապականեն քո գեղեցկուիւնը։
8 Քեզ գուբը պիտի գցեն, եւ դու պիտի մեռնես վիրաւորուածների մահով ծովի մէջ։
9 Մի՞թէ ասելու ես քեզ սպանողների առաջին. Ես աստուած եմ. քանի որ դու մարդ ես եւ ոչ Աստուած՝ քեզ սպանողների ձեռքին։
10 Անթլփատների մահով պիտի մեռնես օտարների ձեռքով. որովհետեւ ես խօսեցի. ասում է Տէր Եհովան։
11 Եւ Տիրոջ խօսքն եղաւ ինձ ասելով.
12 Մարդի որդի, ողբ բարձրացրու Տիւրոսի թագաւորի վերայ եւ ասիր նորան. Այսպէս է ասում Տէր Եհովան. Դու կատարելութեան կնիքն ես՝ լիքն իմաստութիւնով, եւ գեղեցկութեամբ կատարեալ։
13 Եդեմումն՝ Աստուծոյ դրախտումն էիր. բոլոր պատուական քարերը քո ծածկոցն էին՝ սարդիոն, տպազիոն, անդամանդ, ոսկեքար, եղնգնաքար եւ յասպիս, շափիւղայ, կարկեհան եւ զմրուխտ եւ ոսկի. քո թմբուկների եւ քո սրինգների գործը քեզ համար քո ստեղծուած օրը պատրաստուեցաւ.
14 Դու մի օծուած քերովբէ էիր ծածկող, եւ ես քեզ շինեցի. Աստուծոյ սուրբ սարի վերայ էիր. կրակի քարերի մէջ տեղ էիր ման գալիս։
15 Դու կատարեալ էիր քո ճանապարհներումը քո ստեղծուած օրիցը մինչեւ որ քեզանում անօրէնութիւն գտնուեցաւ։
16 Քո առուտուրի շատութեան համար լցուեցաւ քո ներսը զրկանքով եւ դու մեղանչեցիր. եւ ես քեզ իբրեւ պիղծ հեռացրի Աստուծոյ սարիցը, եւ քեզ փչացրի, ով ծածկող քերովբէ, կրակի քարերի միջից։
17 Սիրտդ հպարտացաւ քո գեղեցկութիւնովը. դու ապականեցիր քո իմաստութիւնը քո գեղեցկութեան պատճառով. ես քեզ գետինը պիտի գցեմ. թագաւորների առաջին քեզ տեսարան պիտի շինեմ։
18 Քո անօրէնութիւնների շատութիւնովը՝ քո անիրաւ վաճառականութիւնովը պղծեցիր քո սրբարանները. եւ ես կրակ պիտի հանեմ քո միջից. նա պիտի ուտէ քեզ, եւ ես քեզ մոխիր պիտի շինեմ երկրի վերայ բոլոր քեզ տեսնողների աչքերի առաջին։
19 Ազգերի մէջ քեզ ամեն ճանաչողները պիտի ապշեն քեզ վերայ. դու սոսկում եղար եւ ոչնչացար յաւիտեան։
20 Եւ Տիրոջ խօսքը եղաւ ինձ ասելով.
21 Մարդի որդի, երեսդ Սիդոնին դարձրու, եւ մարգարէացիր նորա վերայ.
22 Եւ ասիր. Այսպէս է ասում Տէր Եհովան. Ահա ես քեզ դէմ եմ, ով Սիդոն. եւ պիտի փառաւորուիմ քեզանում, եւ պիտի իմանան որ ես եմ Տէրը, երբոր նորանում դատաստաններ անեմ եւ նորանում սրբուիմ։
23 Եւ նորա մէջ ժանտախտ պիտի ուղարկեմ եւ նորա փողոցների մէջ՝ արիւն. եւ վիրաւորուածներ պիտի ընկնեն նորա մէջ նորա վերայի սրով շուրջանակի։ Եւ պիտի իմանան, որ ես եմ Տէրը։
24 Եւ Իսրայէլի տան համար այլեւս պիտի չ’լինի խայթող տատասկ եւ ցաւացնող փուշ նորանց բոլոր շրջականերից, որ ատում են նորանց. եւ պիտի գիտենան, որ ես եմ Տէր Եհովան։
25 Այսպէս է ասում Տէր Եհովան. Երբոր ես կ’հաւաքեմ Իսրայէլի տունը այն ազգերի միջից որոնցում ցրուել եմ, եւ երբոր ես կ’սրբուիմ նորանցով ազգերի աչքերի առաջին, այն ժամանակ նորանք կ’բնակուեն իրանց հողի վերայ, որ ես տուի իմ ծառայ Յակոբին։
26 Եւ նորանք կ’բնակուեն նորանում ապահովութիւնով եւ տուներ կ’շինեն եւ այգիներ կ’տնկեն, եւ ապահով կ’բնակուեն, երբոր ես դատաստաններ կ’անեմ իրանց շրջակայքիցը բոլոր իրանց արհամարհողներին, եւ կ’գիտենան որ ես եմ Տէրը նորանց Աստուածը։
