Եզեկիել 32։1-32
32 Եւ եղաւ տասնեւերկուերորդ տարուայ, տասնեւերկուերորդ ամսուայ ամսի մէկին եղաւ Տիրոջ խօսքը ինձ ասելով.
2 Մարդի որդի, ողբ բարձրացրու Եգիպտոսի Փարաւօն թագաւորի վերայ եւ ասիր նորան. Ազգերի մէջ դու առիւծի էիր նմանվում. եւ դու մի վիշապի նման էիր ջրերումը. դու վեր էիր բղխում քո գետերովը, եւ պղտորեցնում էիր ջուրը ոտներովդ, եւ կոխ էիր տալիս նորանց գետերը։
3 Այսպէս է ասում Տէր Եհովան. Ես պիտի իմ ցանցը քեզ վերայ տարածեմ շատ ազգերի ժողովրդովը, եւ քեզ վեր պիտի քաշեմ իմ ուռկանովը։
4 Եւ քեզ պիտի գցեմ գետնի վերայ, դաշտի երեսը պիտի շպռտեմ քեզ, եւ քեզ վերայ պիտի բնակեցնեմ երկնքի բոլոր թռչուններին, եւ քեզանով պիտի կշտացնեմ երկրի բոլոր գազաններին։
5 Եւ քո միսը պիտի սարերի վերայ գցեմ, եւ պիտի լցնեմ ձորերը քո դէզերովը։
6 Եւ երկրին պիտի խմեցնեմ քո արիւնի արտահոսածովը մինչեւ սարերն էլ, եւ հեղեղատները պիտի լցուին քեզանով։
7 Եւ քեզ հանգցնելիս պիտի ծածկեմ երկինքը, եւ սուգ պիտի հագցնեմ նորա աստղերին, արեգակը ամպով պիտի ծածկեմ, եւ լուսինը պիտի չ’ճառագայթէ իր լոյսը։
8 Երկնից վերայ բոլոր լուսաւոր լուսատուներին պիտի խաւարեցնեմ քո պատճառով, եւ քո երկրի վերայ մթութիւն պիտի բերեմ, ասում է Տէր Եհովան։
9 Եւ շատ ժողովուրդների սիրտը պիտի խռովեցնեմ, երբոր քո կործանումը հասցնեմ ազգերին այն երկիրներում, որոնց չէիր գիտում։
10 Եւ շատ ժողովուրդներ պիտի ապշեցնեմ քեզ վերայ, եւ նորանց թագաւորները զարհուրանքով պիտի քեզ վերայ զարհուրեն, երբոր իմ սուրը կ’թռթռացնեմ նորանց առաջին. եւ պիտի ամեն մարդ ամեն վայրկեան սարսափէ իր անձի համար քո կործանման օրը։
11 Որովհետեւ այսպէս է ասում Տէր Եհովան. Բաբիլոնի թագաւորի սուրը պիտի գայ քեզ վերայ։
12 Զօրաւորների սրերովը վայր պիտի գցեմ քո բազմութիւնը, որոնք ամենքը ազգերի բռնաւորներն են։ Եւ նորանք պիտի կողոպտեն Եգիպտոսի պարծանքը, եւ պիտի ոչնչանայ նորա բոլոր բազմութիւնը։
13 Եւ պիտի կորցնեմ նորա բոլոր անասունները, շատ ջրերի վերայից, եւ այլ եւս նորանց պիտի չ’պղտորէ մարդի ոտք, եւ անասունի կճղակներ պիտի նորանց չ’պղտորեն։
14 Այն ժամանակ պիտի պարզեցնեմ նորանց ջրերը, եւ իւղի պէս հոսեցնեմ նորանց գետերը, ասում է Տէր Եհովան.
15 Երբոր Եգիպտոսի երկիրը աւերակ կ’դարձնեմ, եւ երկիրը աւերակ կ’դառնայ իր լիութիւնիցը. երբոր ես կ’զարկեմ նորա միջի բոլոր բնակիչներին, այն ժամանակ կ’իմանան թէ ես եմ Տէրը։
16 Սա մի ողբ է, եւ ողբով պիտի երգեն նորան, ազգերի աղջկերքը պիտի ողբալով երգեն նորան, Եգիպտոսի վերայ պիտի ողբալով երգեն նորան, ասում է Տէր Եհովան։
17 Եւ եղաւ տասնեւերկուերորդ տարուայ՝ ամսի տասնեւհինգին, որ Տիրոջ խօսքը եղաւ ինձ ասելով.
18 Մարդի որդի, կոծ արա Եգիպտոսի բազմութեան վերայ եւ իջեցրու նորան՝ նորան եւ զօրաւոր ազգերի աղջիկներին գետնի տակը գուբը իջնողների հետ։
19 Դու ումի՞ց ես վայելուչ. իջիր եւ պառկիր անթլփատների հետ։
20 Սրով սպանուածների մէջ պիտի ընկնեն, սուրի պիտի տրուի նա, քաշքաշեցէք նորան եւ նորա բոլոր բազմութիւնը։
21 Նորան խօսելու են զօրաւորների հզօրները գերեզմանի* միջից՝ նորա օգնողների հետ. իջել պառկել են անթլփատները՝ սրով սպանուած։
22 Այնտեղ է Ասորեստանցին եւ նորա բոլոր ամբոխը, նորա գերեզմանները նորա շրջակայքումն են. ամենքը սպանուած՝ սրով ընկածներ են։
23 Որի գերեզմանները գուբի խորքերումն են շինուած, եւ իր ամբոխը իր գերեզմանների շրջակայքումն է, ամենքը սպանուած՝ սրով ընկածներ են, որոնք վախ էին տալիս կենդանաց երկրումը։
24 Այնտեղ է Եղամացին եւ իր բոլոր բազմութիւնը, իր գերեզմանների շրջակայքումը, ամենքը սպանուած՝ սրով ընկածներ են, որոնք իջել են անթլփատ՝ երկրի տակերը, որոնք իրանց վախը տալիս էին կենդանաց երկրումը, սակայն իրանց ամօթը պիտի կրեն գուբը իջնողների հետ։
25 Սպանուածների մէջ նորան անկողին տուին իր բոլոր բազմութեան հետ, նորա շրջակայքումն են իր գերեզմանները. ամենքը անթլփատներ՝ սրով սպանուած, որ իրանց վախը տալիս էին կենդանաց երկրումը, եւ որոնք պիտի կրեն իրանց ամօթը գուբը իջնողների հետ. նա սպանուածների մէջ է դրուել։
26 Այնտեղ է Մոսոքը՝ Թոբելը եւ նորա բոլոր ամբոխը, նորա շրջակայքումն են իր գերեզմանները. ամենքը անթլփատներ՝ սրով սպանուածներ, որոնք իրանց վախը տալիս էին կենդանաց երկրումը։
27 Եւ նորանք պիտի չ’պառկեն անթլփատներից ընկնող զօրաւորների հետ, որոնք իրանց պատերազմական զէնքերովը գերեզման* իջան, եւ որոնց սուրերը իրանց գլխների տակին դրին. բայց նորանց անօրէնութիւնները իրանց ոսկորների վերայ պիտի լինի, թէեւ նորանք զօրաւորների երկիւղն էին կենդանաց երկրումը։
28 Եւ դու պիտի անթլփատների մէջ փշրուիս, եւ պառկես սրով սպանուածների հետ։
29 Այնտեղ է Եդովմը, նորա թագաւորները եւ նորա բոլոր իշխանները, որոնք իրանց զօրութիւնովը սրով սպանուածների հետ են դրուած. նորանք պիտի պառկեն անթլփատների հետ եւ գուբը իջնողների հետ։
30 Այնտեղ են հիւսիսի իշխանները բոլորը, եւ բոլոր Սիդոնացիք, որոնք իջան սպանուածների հետ. իրանց ահարկութիւնովը պիտի ամաչեն իրանց զօրութիւնիցը, եւ պիտի պառկեն անթլփատ՝ սրով սպանուածների հետ, եւ իրանց ամօթը կրեն գուբը իջնողների հետ։
31 Փարաւօնը տեսնելու է նորանց, եւ պիտի մխիթարուի իր բոլոր ամբոխի մասին, սրով սպանուածներ են Փարաւօնը եւ իր բոլոր զօրքերը, ասում է Տէր Եհովան։
32 Որովհետեւ ես նորա երկիւղ տալ տուի կենդանաց երկրումը. եւ նա պիտի պառկեցնուի անթլփատների մէջ՝ սրով սպանուածների հետ՝ Փարաւօնը եւ նորա բոլոր ամբոխը, ասում է Տէր Եհովան։
Ծանոթագրություններ
^ 32։21 Կամ՝ մեռելների բնակարանի։
^ 32։27 Կամ՝ մեռելների բնակարան. ոմանք՝ դժոխքն։
