Երեմիա 26։1-24
26 Յուդայի թագաւոր Յովսիայի որդի Յովակիմի թագաւորութեան սկբզումն այս խօսքն եղաւ Տիրոջ կողմանէ ասելով.
2 Տէրն այսպէս է ասում. Կանգնիր Տիրոջ տան գաւիթումը եւ ասիր երկրպագելու համար Տիրոջ տունը եկող Յուդայի բոլոր քաղաքներին այն ամեն խօսքերը, որ քեզ պատուիրել եմ նորանց ասելու, մի խօսք չ’պակասեցնես։
3 Գուցէ կ’լսեն եւ ետ կ’դառնան ամեն մէկն իր չար ճանապարհիցը, որ ես զղջամ այն չարիքի մասին, որ ես մտածել եմ նորանց անելու իրանց գործերի չարութեան պատճառով։
4 Եւ ասիր նորանց, Այսպէս է ասում տէրը. Եթէ ինձ չ’լսէք, որ իմ օրէնքումը վարուիք, որ ես դրել եմ ձեր առաջին.
5 Որ լսէք իմ ծառաների՝ մարգարէների խօսքերին, որոնց ես ուղարկում եմ ձեզ մօտ, որ ես կանուխ վեր կենալով ուղարկում էի, բայց դուք չ’լսեցիք.
6 Այն ժամանակ այս տունը Սելովի պէս պիտի անեմ, եւ այս քաղաքը անէծք պիտի շինեմ երկրի բոլոր ազգերի համար։
7 Եւ լսեցին քահանաներն ու մարգարէքը եւ բոլոր ժողովուրդը՝ Երեմիան այս խօսքերը Տիրոջ տանը ասելիս։
8 Եւ եղաւ երբոր Երեմիան ասեց վերջացրեց ամեն ինչ որ Տէրը պատուիրել էր ասելու այն բոլոր ժողովրդին, այն ժամանակ բռնեցին նորան քահանաները եւ մարգարէքը եւ բոլոր ժողովուրդն ասելով Դու անպատճառ պէտք է մեռնես։
9 Ի՞նչու համար մարգարէացար Տիրոջ անունով ասելով. Այս տունը Սելովի պէս պիտի դառնայ, եւ այս քաղաքը պիտի քանդուի եւ անբնակ դառնայ. եւ բոլոր ժողովուրդը ժողովուեցաւ Տիրոջ տունը Երեմիայի մօտ։
10 Եւ Յուդայի իշխանները լսեցին այս բաները եւ վեր գնացին թագաւորի տանիցը Տիրոջ տունը եւ նստեցին Տիրոջ տան նոր դռան մուտքումը.
11 Եւ քահանաները եւ մարգարէքը ասեցին իշխաններին եւ բոլոր ժողովրդին թէ Այս մարդը մահի արժանի է, որովհետեւ մարգարէացել է այս քաղաքի դէմ, ինչպէս որ լսեցիք ձեր ականջներովը։
12 Եւ Երեմիան ասեց բոլոր իշխաններին եւ բոլոր ժողովրդին. Տէրն ինձ ուղարկեց որ մարգարէանամ այս տան դէմ եւ այս քաղաքի դէմ այն բոլոր խօսքերը որ լսել էք։
13 Եւ հիմա լաւացրէք ձեր ճանապարհները եւ ձեր գործերը, եւ լսեցէք ձեր Տէր Աստուծոյ ձայնը, եւ Տէրը կ’զղջայ այն չարիքի մասին, որ խօսել է ձեր մասին։
14 Բայց ես ահա ձեր ձեռքին եմ, արէք ինձ ինչ որ հաճոյ եւ ուղիղ է ձեր աչքին։
15 Միայն թէ լաւ իմացած լինէք, որ եթէ ինձ սպանելու լինէք, դուք անմեղ արիւն էք թափում ձեր վերայ եւ այս քաղաքի վերայ ու նորա բնակիչների վերայ. որովհետեւ ճշմարտապէս Տէրն է ինձ ուղարկել ձեզ մօտ, որ ասեմ ձեր ականջներին այս ամեն խօսքերը։
16 Եւ իշխանները եւ բոլոր ժողովուրդը ասեցին քահանաներին եւ մարգարէներին. Այս մարդը մահի արժանի չէ, որովհետեւ մեր Տէր Աստուծոյ անունովն է խօսել մեզ դէմ։
17 Եւ երկրի ծերերից մարդիկ վեր կացան եւ ասեցին ժողովրդի բոլոր ժողովքին թէ
18 Մօրաստացի Միքիան մարգարէանում էր Յուդայի Եզեկիա թագաւորի օրերին. եւ նա ասեց Յուդայի բոլոր ժողովրդին թէ Այսպէս է ասում Զօրաց Տէրը. Սիօնը պիտի հերկուի իբրեւ ագարակ, եւ Երուսաղէմն աւերակների դէզեր պիտի դառնայ, եւ տաճարի սարը՝ անտառի բարձր տեղերի պէս։
19 Մի՞թէ Յուդայի թագաւոր Եզեկիան եւ բոլոր Յուդան նորան իսկոյն մեռցրին. չէ՞ որ նա վախեցաւ Տէրից եւ աղօթք արաւ Տիրոջ առաջին. եւ Տէրը զղջաց այն չարիքի մասին, որ ասել էր նորանց դէմ. ուրեմն մենք մեծ չարութիւն արած կ’լինենք մեր անձերի դէմ։
20 Եւ մի մարդ էլ կար, որ մարգարէանում էր Տիրոջ անունովը՝ Կարիաթարիմցի Սեմայիայի որդի Ուրիան. եւ նա մարգարէացաւ այս քաղաքի վերայ եւ այս երկրի վերայ Երեմիայի բոլոր խօսքերին պէս։
21 Եւ երբոր լսեց Յովակիմ թագաւորը եւ բոլոր նորա քաջազունները եւ բոլոր իշխանները այն խօսքերը, այն ժամանակ թագաւորն ուզեց նորան սպանել. բայց երբոր Ուրիան լսեց՝ վախեցաւ եւ փախաւ ու գնաց Եգիպտոս։
22 Եւ Յովակիմ թագաւորը Եգիպտոս մարդիկ ուղարկեց՝ Աքոբորի որդի Եղնաթանին եւ նորա հետ մի քանի մարդիկ ուղարկեց Եգիպտոս.
23 Եւ նորանք հանեցին Ուրիային Եգիպտոսից եւ նորան բերին Յովակիմ թագաւորի մօտ, եւ նա նորան սպանեց սրով եւ նորա մարմինը գցեց ժողովրդի որդկանց գերեզմանները։
24 Բայց Սափանի որդիի Աքիկամի ձեռքը Երեմիայի հետ էր, որ նորան չ’մատնեն ժողովրդի ձեռքը նորան սպանելու համար։
