Երեմիա 38։1-28
38 Եւ լսեցին Մատթանի որդի Սափատիան եւ Փասուրի որդի Յուքաղը եւ Մեղքիայի որդի Փասուրը այս խօսքերը, որ Երեմիան խօսում էր բոլոր ժողովրդի հետ ասելով.
2 Այսպէս է ասում Տէրը. Այս քաղաքում մնացողը պիտի սրով, սովով եւ ժանտախտով մեռնէ, իսկ դուրս եկող՝ Քաղդէացիների մօտ գնացողը պիտի ապրէ, եւ իր հոգին իրան համար աւարի պէս պիտի լինի, եւ նա պիտի ապրէ։
3 Այսպէս է ասում Տէրը. Անպատճառ այս քաղաքը պիտի Բաբիլոնի թագաւորի զօրքի ձեռքը մատնուի, եւ նա պէտք է առնէ նորան։
4 Եւ իշխաններն ասեցին թագաւորին. Խնդրում ենք՝ թող այս մարդը մեռցնուի, որովհետեւ այդ պատճառով դա թուլացնում է պատերազմի մարդկանց ձեռքերը, որոնք մնացել են այս քաղաքում, եւ բոլոր ժողովրդի ձեռքերը, նորանց այսպիսի խօսքեր ասելով. որովհետեւ այս մարդը խաղաղութիւն չէ ուզում այս ժողովրդի համար, այլ չարիք։
5 Եւ Սեդեկիա թագաւորն ասեց. Ահա նա ձեր ձեռքին է, որովհետեւ թագաւորը ձեզ մօտ մի բան չէ կարող։
6 Եւ նորանք առան Երեմիային եւ գցեցին նորան թագաւորի որդի Մեղքիայի գուբը որ բանտի դռանն էր. եւ չուաններով իջեցրին Երեմիային, եւ գուբի մէջ ջուր չ’կար այլ տիղմ. եւ Երեմիան ընկղմում էր տիղմի մէջ։
7 Եւ Եթէովպացի Աբդիմելէք ներքինին, որ թագաւորի տանն էր լինում, լսեց, որ Երեմիային գցել են գուբը. եւ թագաւորը նստել էր Բենիամինի դռանը։
8 Եւ Աբդիմելէքը դուրս եկաւ թագաւորի տանիցը եւ խօսեց թագաւորի հետ ասելով.
9 Ով տէր իմ թագաւոր, այս մարդիկը վատ բան արին ամեն ինչ որ Երեմիա մարգարէին արին, որ նորան գցեցին գուբը. եւ նա կ’մեռնէ նորա տակին սովի պատճառով, որովհետեւ քաղաքումը այլ եւս հաց չ’կայ։
10 Եւ թագաւորը պատուիրեց Եթէովպացի Աբդիմելէքին ասելով. Վեր առ այստեղից քեզ հետ երեսուն մարդ եւ հանիր Երեմիա մարգարէին այն գուբիցը նորա մեռնելուց առաջ։
11 Եւ Աբդիմելէքն առաւ այն մարդիկն իր մօտ եւ տարաւ նորանց թագաւորի տունը շտեմարանի տակը, եւ այնտեղից առաւ պատառոտած շորեր եւ հինացած շորեր եւ իջեցրեց նորանց չուաններով գուբը Երեմիայի մօտ։
12 Եւ Եթէովպացի Աբդիմելէքն ասեց Երեմիային. Այդ պատառոտած եւ հինացած շորերը դիր կռներիդ տակին չուանների տակ. եւ Երեմիան այնպէս արաւ։
13 Եւ Երեմիային վեր քաշեցին չուաններով եւ նորան հանեցին գուբիցը. եւ Երեմիան կենում էր բանտի գաւիթումը։
14 Եւ Սեդեկիա թագաւորը մարդ ուղարկեց եւ տարաւ Երեմիա մարգարէին իր մօտ այն երրորդ մուտքը որ Տիրոջ տան մօտ է, եւ թագաւորն ասեց Երեմիային. Ես քեզնից մի բան եմ հարցնելու, ինձանից ոչինչ չ’ծածկես։
15 Եւ Երեմիան ասեց Սեդեկիային. Եթէ քեզ պատմեմ, մի՞թէ չես սպանել տալ. եւ եթէ քեզ խրատ տամ, ինձ չես լսիլ։
16 Եւ Սեդեկիա թագաւորը ծածուկ երդում արաւ Երեմիային ասելով. Կենդանի է Տէրը, որ ստեղծել է մեր այս հոգին, որ քեզ չեմ մեռցնիլ եւ քեզ չեմ տալ այս մարդկանց ձեռքը, որ պահանջում են քո հոգին։
17 Եւ Երեմիան ասեց Սեդեկիային. Այսպէս է ասում Եհովայ Զօրաց Աստուածը՝ Իսրայէլի Աստուածը. Եթէ իրաւ դուրս գաս Բաբիլոնի թագաւորի իշխանների մօտ, այն ժամանակ քո անձը ողջ պիտի մնայ, եւ այս քաղաքը չի այրուիլ կրակով. եւ ողջ կ’մնաս դու եւ քո տունը։
18 Իսկ եթէ դուրս չ’գաս Բաբիլոնի թագաւորի իշխանների մօտ, այն ժամանակ այս քաղաքը պիտի Քաղդէացիների ձեռքը մատնուի, եւ նորանք պիտի այրեն նորան կրակով. եւ դու էլ չես պրծնիլ նորանց ձեռքիցը։
19 Եւ Սեդեկիա թագաւորն ասեց Երեմիային. Ես վախենում են Հրէաներիցը, որոնք անցել են Քաղդէացիների կողմը, որ մի գուցէ ինձ նորանց ձեռքը տան, եւ նորանք անարգեն ինձ։
20 Եւ Երեմիան ասեց. Չեն տալ. խնդրեմ՝ լսիր Տիրոջ ձայնին, որ ես քեզ ասում մ, այն ժամանակ լաւ կ’լինի քեզ համար, եւ քո անձը ողջ կ’մնայ։
21 Իսկ եթէ չ’ուզես դուրս գնալ, ահա այն բանը որ Տէրը ցոյց տուաւ ինձ։
22 Եւ ահա այն բոլոր կանայքը, որոնք մնացել են Յուդայի թագաւորի տանը, պիտի դուրս տարուին Բաբիլոնի թագաւորի իշխանների մօտ, եւ նորանք պիտի ասեն. Քեզ հրապուրեցին եւ քեզ յաղթեցին քո բարեկամները. խրուեցան տիղմի մէջ քո ոտները, նորանք ետ քաշուեցան։
23 Եւ քո բոլոր կանանցը եւ քո որդկանցը պիտի դուրս հանեն Քաղդէացիների մօտ, եւ դու էլ չես պրծնիլ նորանց ձեռքիցը. այլ պիտի բռնուիս Բաբիլոնի թագաւորի ձեռքովը, եւ այս քաղաքը պիտի այրես կրակով։
24 Եւ Սեդեկիան ասեց Երեմիային. Ոչ մի մարդ չ’իմանայ այս խօսքերը, եւ դու չես մեռնիլ.
25 Եւ երբոր իշխանները լսեն, որ ես քեզ հետ խօսել եմ եւ գան քեզ մօտ եւ քեզ ասեն. Մեզ ասիր՝ ի՞նչ ես ասել թագաւորին, մեզանից մի ծածկիր, եւ մենք էլ քեզ չենք սպանիլ, եւ ի՞նչ ասեց քեզ թագաւորը.
26 Այն ժամանակ ասես նրոանց. Ես աղաչանքս մատուցրի թագաւորին, որ ինձ ետ չ’ուղարկէ Յովնաթանի տունը, որ այնտեղ մեռնեմ։
27 Եւ բոլոր իշխանները եկան Երեմիայի մօտ եւ նորանից հարցրին, եւ նա պատմեց այս բոլոր խօսքերի համեմատ որ թագաւորը հրամայել էր իրան, եւ դադարեցին նորա հետ խօսելուց, որովհետեւ բանը չ’յայտնուեցաւ։
28 Եւ Երեմիան ետ դառաւ բանտի գաւիթը մինչեւ այն օրը, որ Երուսաղէմն առնուեցաւ. եւ եղաւ այնտեղ, երբոր առնուեցաւ Երուսաղէմը։
