Թվեր 3։1-51
3 Եւ Ահարօնի եւ Մովսէսի ազգաբանութիւնը սա է, այն օրն որ Եհովան Մովսէսի հետ խօսեց Սինա սարումը։
2 Եւ Ահարօնի որդկանց անունները սորանք են. անդրանիկը Նադաբ եւ Աբիուդ, Եղիազար եւ Իթամար։
3 Սորանք էին Ահարօնի քահանայ օծուած որդիների անունները, որոնց ձեռքը լցրեց քահանայութիւն անելու համար։
4 Եւ Նադաբն ու Աբիուդը Սինա անապատումը Եհովայի առաջին օտար կրակ մատուցանելիս մեռան Եհովայի առաջին, եւ նորանք որդի չ’ունէին. եւ Եղիազարն ու Իթամարն իրանց հայր Ահարօնի առաջին քահանայութիւն արին։
5 Եւ Եհովան խօսեց Մովսէսի հետ ասելով.
6 Ղեւիի ցեղը մօտեցրու, եւ նորանց կանգնեցրու Ահարօն քահանայի առաջին, որ նորան սպասավորութիւն անեն։
7 Եւ պահեն նորա պահպանութիւնը՝ եւ բոլոր ժողովքի պահպանութիւնը ժողովքի խորանի առաջին խորանի պաշտօնն անելով։
8 Եւ պահեն ժողովքի խորանի բոլոր կարասիները՝ եւ Իսրայէլի որդկանց պահպանութիւնը՝ խորանի պաշտօնն անելով։
9 Եւ Ղեւտացիները Ահարօնին եւ նորա որդկանցը տաս, սորանք բոլորովին նորան են տրուած Իսրայէլի որդիներիցը։
10 Եւ Ահարօնն ու նորա որդիները կարգես իրանց քահանայական պաշտօնը կատարելու. եւ մօտեցող օտարականը մեռցնուի։
11 Եւ Եհովան խօսեց Մովսէսի հետ ասելով.
12 Եւ ես ահա Իսրայէլի որդկանց միջից Ղեւտացիներին առի, Իսրայէլի որդկանց մէջ ամեն մօր արգանդը բացողը առաջինեկի տեղը, եւ Ղեւտացիները իմը պիտի լինեն։
13 Որովհետեւ ամեն առաջինեկը իմն է. այն որ Եգիպտոսի երկրումը բոլոր առաջինեկները զարկեցի, Իսրայէլի մէջ բոլոր առաջինեկները մարդից մինչեւ անասուն սրբեցի ինձ համար. նորանք իմը պիտի լինեն. ես եմ Եհովան։
14 Եւ Եհովան խօսեց Մովսէսի հետ Սինայ անապատումն ասելով.
15 Համարիր Ղեւիի որդիքն իրանց հայրերի տների եւ իրանց ազգատոհմերի համեմատ. մէկ ամսականից վեր եղող ամեն արուն համարես։
16 Եւ Մովսէսը համարեց նորանց Եհովայի խօսքին համեմատ, ինչպէս որ իրան պատուէր եղաւ։
17 Եւ Ղեւիի որդիքն իրանց անուններովը սորանք էին։
18 Գերսոն եւ Կահաթ եւ Մէրարի։ Եւ Գերսոնի որդկանց անուններն իրանց տոհմերովը սորանք են, Ղոբենի եւ Սեմէի։
19 Եւ Կահաթի որդիքն իրանց տոհմերովը՝ Ամրամ եւ Իսահառ, Քեբրոն եւ Ոզիէլ։
20 Եւ Մերարիի որդիքն իրանց տոհմերովը՝ Մոողի եւ Մուսի. Ղեւտացիների տոհմերն իրանց հայրերի տների համեմատ սորանք են։
21 Գերսոնից Ղոբենեանց տոհմը եւ Սէմէեանց տոհմն եղաւ. Գերսոնեանց տոհմերը սորանք են։
22 Նորանց համարուածները՝ մէկ ամսականից վեր եղող բոլոր արուների թիւին համեմատ համարուածները՝ եօթը հազար հինգ հարիւր հոգի։
23 Գերսոնեանց տոհմերը խորանի ետքի կողմումը դէպի արեւմուտք իջեւան անեն։
24 Եւ Գերսոնեանց հօր տան իշխանը՝ Լայէլի որդի Եղիասափը լինի։
25 Եւ ժողովքի խորանի մէջ Գերսոնի որդկանց պահպանութիւնը՝ խորանը եւ վրանը, նորա ծածկոցը եւ ժողովքի խորանի դրան վարագոյրը,
26 Խորանի եւ սեղանի շուրջը եղած սրահի առագաստները, եւ սրահի դրան սրահակը եւ նորա ամեն գործի համար եղած չուանները։
27 Եւ Կահաթից Ամրամեանց տոհմը՝ եւ Իսահառեանց տոհմը՝ եւ Քեբրոնեանց տոհմը. եւ Ոզիէլեանց տոհմը. Կահաթեանց տոհմերը սորանք են.
28 Մէկ ամսականից վեր եղող բոլոր արուներն իրանց թիւին համեմատ՝ ութը հազար վեց հարիւր հոգի սրբարանի պահպանութիւնը պահպանող։
29 Կահաթի որդկանց տոհմերը խորանի հարաւային կողմումն իջեւան անեն։
30 Եւ Կահաթեանց տոհմերի հօր տան իշխանը՝ Ոզիէլի որդի Եղիսափանը լինի։
31 Եւ նորանց պահպանութիւնը լինի տապանակը՝ սեղանը՝ եւ աշտանակը եւ սեղանները՝ եւ սրբարանի գործիքները, որոնցով պաշտօն են անում, եւ վարագոյրը՝ եւ նորա վերաբերեալ ամեն բաները։
32 Եւ Ղեւտացիների իշխանների իշխանը՝ Ահարօն քահանայի որդի Եղիազարը լինի, որ սրբարանի պահպանութիւնն անողների վերայ վերակացու լինի։
33 Մերարիից Մոողեանց տոհմը եւ Մուսեանց տոհմը, սորանք են Մերարիի տոհմերը։
34 Եւ նորանց համարուածները՝ մէկ ամսականից վեր եղող բոլոր արուներն իրանց թիւին համեմատ վեց հազար երկու հարիւր հոգի։
35 Եւ Մերարեանց տոհմերի հօր տան իշխանը՝ Աբիքելի որդի Սուրիէլը լինի. սորանք խորանի հիւսիսային կողմումն իջեւան անեն։
36 Եւ Մերարիի որդկանց պահպանութեան յանձնուածները լինեն խորանի տախտակները՝ եւ նորա նիգերը եւ սիւները եւ խարիսխները՝ եւ նորա բոլոր գործիքները՝ եւ նորա վերաբերեալ ամեն բաները։
37 Եւ շուրջանակի սրահի սիւները եւ նորանց խարիսխները եւ ցիցերը եւ նորանց չուանները։
38 Եւ խորանի առաջի կողմում այսինքն ժողովքի խորանի առաջին դէպի արեւելք իջեւան անողները Մովսէսն ու Ահարօնը եւ նորա որդիքը լինեն, որ սրբարանի պահպանութիւնը Իսրայէլի որդկանց պահպանութեան համար պահպանեն. եւ մօտեցող օտարականը պիտի մեռցնուի։
39 Ղեւտացիների բոլոր համարուածները, որ Մովսէսն ու Ահարօնը համարեցին, իրանց տոհմերովը Եհովայի խօսքին համեմատ՝ մէկ ամսականից վեր եղող բոլոր արուները քսանեւերկու հազար էին։
40 Եւ Եհովան ասեց Մովսէսին. Իսրայէլի որդկանց մէկ ամսականից վեր բոլոր առաջինեկ արուները համարիր, եւ նորանց անունների թիւն առ։
41 Եւ Ղեւտացիներն առնես ինձ համար Իսրայէլի որդկանց բոլոր առաջինեկների փոխարէն. ես եմ Եհովան. եւ Ղեւտացիների անասունները՝ Իսրայէլի որդկանց անասունների բոլոր առաջինեկների փոխարէն։
42 Եւ Մովսէսը համարեց Իսրայէլի որդկանց բոլոր առաջինեկները՝ ինչպէս որ Եհովան իրան պատուիրեց։
43 Եւ բոլոր առաջինեկ արուներն իրանց անասունների թիւին համեմատ մէկ ամսականից վեր համարուողները՝ քսանեւերկու հազար երեք հարիւր եօթանասունեւերեք հոգի։
44 Եւ Եհովան խօսեց Մովսէսի հետ ասելով.
45 Առ Ղեւտացիներին, Իսրայէլի որդկանց մէջ ամեն առաջինեկների փոխարէն, եւ Ղեւտացիների անասունները՝ նորանց անասունների փոխարէն, որ Ղեւտացիներն իմը լինեն. ես եմ Եհովան։
46 Եւ այն երկու հարիւր եօթանասունեւերեքին փրկանք լինելու համար, որ աւելացան Ղեւտացիներից Իսրայէլի որդիներիցը։
47 Իւրաքանչիւր մարդի համար հինգ սիկղ առնես, սրբարանի սիկղի համեմատ առնես. մէկ սիկղը քսան կերատ է։
48 Եւ նորանց մէջ աւելացածների փրկանքի փողը Ահարօնին եւ նորա որդկանցը տաս։
49 Եւ Մովսէսը Ղեւտացիներով փրկուածների աւելացածներից փրկանքի փողն առաւ։
50 Իսրայէլի որդկանց առաջինեկներից հազար երեք հարիւր վաթսունեւհինգ սիկղ արծաթ առաւ սրբարանի սիկղի համեմատ։
51 Եւ Մովսէսը Եհովայի խօսքի պէս փրկուածների փողը Ահարօնին ու նորա որդկանցը տուաւ, ինչպէս որ Եհովան Մովսէսին պատուիրել էր։
