Սաղմոս 18։1-50
Երգողների գլխաւորին։ Տիրոջ ծառայ Դաւիթի Սաղմոս*, որ այս երգի խօսքերն ասեց Տիրոջը այն օրումը, որ Տէրը նորան փրկել էր իր բոլոր թշնամիների ձեռքիցը եւ Սաւուղի ձեռքիցը.* եւ ասեց.
18 Սրտանց սիրում եմ քեզ, ով Տէր՝ իմ զօրութիւնը:
2 Տէր, իմ վէմ, եւ իմ բերդ եւ իմ ազատիչ. իմ Աստուած, իմ ամրութիւն, որին ես յուսացած եմ: Ով իմ ասպար եւ իմ փրկութեան եղջիւր, նա իմ բարձր աշտարակն է.
3 Ես օրհնեալ Տիրոջը կանչեցի, եւ իմ թշնամիներիցը կ’փրկուիմ:
4 Մահի լարերը շրջապատեցին ինձ, եւ կորստեան վտակները վախեցրին ինձ,
5 Գերեզմանի* ցավերը պատեցին ինձ, մահի որոգայթները հասան ինձ վերայ:
6 Ես իմ նեղութիւնումը կանչեցի դէպի Տէրը, եւ դէպի իմ Աստուածն աղաղակեցի. նա լսեց իմ ձայնը իր տաճարիցը. եւ իմ աղաղակը նորա առաջը հասաւ՝ նորա ականջներին:
7 Այն ժամանակ երկիրը դողաց ու շարժուեցաւ, եւ սարերի հիմունքները սարսափեցան եւ դողացին. որովհետեւ նա բարկացաւ:
8 Ծուխ դուրս եկաւ նորա քթիցը*, եւ փչացնող կրակ՝ նորա բերանիցը. կայծակներ փայլատակեցին նորանից:
9 Նա խոնարհեցրեց երկինքը եւ վայր եկաւ, եւ մառախուղ կար նորա ոտների տակ:
10 Նա հեծաւ քերովբեի վերայ եւ թռաւ. եւ սլացաւ քամիի թեւերի վերայ:
11 Նա խաւարը ծածկոյթ դրաւ իր վերայ. խորան եղան նորան չորս կողմովը խաւարային ջուրերը եւ երկնքի ամպերը:
12 Նորա առաջին փայլող լոյսիցը նորա ամպերը անցան, կարկուտ եւ կրակի կայծակներ դառան:
13 Եւ Տէրը որոտաց երկնքումը, եւ Բարձրեալն իր ձայնը տուաւ կարկուտով եւ կրակի կայծակներով:
14 Եւ նա իր նետերն ուղարկեց եւ ցրուեց նորանց, եւ կայծակները գցեց եւ շփոթեցրեց նորանց:
15 Եւ երեւեցան ջրերի անդունդքը, եւ երկրի հիմունքը յայտնուեցան քո սաստելուցը, Տէր. քո բարկութեան հողմի փչելուցը:
16 Նա վերեւիցն ուղարկեց եւ բռնեց ինձ. նա շատ ջրերից հանեց ինձ:
17 Նա ազատեց ինձ իմ զօրաւոր թշնամիիցը, եւ իմ ատողներիցը, որ ինձանից զօրաւոր էին:
18 Նորանք իմ նեղութեան օրումը առաջս առան. բայց Տէրը նեցուկ եղաւ ինձ համար:
19 Եւ ինձ հանեց լայնարձակ տեղ եւ ինձ փրկեց. որովհետեւ հաւանեց ինձ:
20 Տէրը բարի է անում ինձ իմ արդարութեան պէս, եւ ինձ հատուցանում է իմ ձեռքի մաքրութեան պէս:
21 Որովհետեւ ես պահեցի Տիրոջ ճանապարհները եւ իմ Աստուածանից ամբարշտութիւնով չ’հեռացայ:
22 Որովհետեւ նորա ամեն իրաւունքներն իմ առաջն են, եւ ես նորա պատուիրանքներն ինձանից չեմ հեռացնում:
23 Ես անարատ եմ նորա առաջին, եւ զգուշանում եմ իմ անօրէնութիւնիցը:
24 Ուստի Տէրը հատուցանում է ինձ իմ արդարութեան պէս. իմ ձեռքի մաքրութեան պէս՝ նորա աչքի առաջին:
25 Ողորմածի հետ ողորմած ես. եւ անարատի հետ անարատ ես.
26 Իստակի հետ իստակ ես. եւ ծուռի հետ՝ ծուռ:
27 Որովհետեւ դու աղքատ ժողովրդին ապրեցնում ես. եւ բարձր աչքերը խոնարհեցնում ես:
28 Որովհետեւ դու լուսաւորում ես իմ ճրագը. Տէր Աստուածը լուսաւոր է անում իմ խաւարը.
29 Որովհետեւ քեզանով վազում եմ զօրքի վերայ. եւ իմ Աստուծովն անց եմ կենում պարսպի վերայից։
30 Աստուծոյ ճանապարհը կատարեալ է. Տիրոջ խօսքը կրակով մաքրուած է. նա պահապան է ամեն իրան յուսացողների համար.
31 Որովհետեւ ո՞վ է Աստուած բացի Տէրիցը. եւ ո՞վ է վէմ մեր Աստուածանից ջոկ.
32 Այն Աստուածը, որ զօրութիւն է հագցնում ինձ. եւ իմ ճանապարհն անարատ անում.
33 Նա որ իր ոտներն եղջերուների ոտների նման է շինում, եւ ինձ՝ բարձր տեղերումը կանգնեցնում.
34 Նա իմ ձեռքը վարժեցնում է պատերազմ անելու, որ իմ բազուկը պղնձի աղեղը լարեն:
35 Եւ տալիս ես ինձ քո փրկութեան վահանը, եւ քո աջը հաստատում է ինձ, եւ քո քաղցրութիւնը մեծացնում է ինձ:
36 Դու լայնարձակ ես անում իմ գնացքը իմ տակ, եւ իմ սրունքները չեն դողում:
37 Ես կ’հալածեմ իմ թշնամիները եւ նորանց կ’հասնեմ. եւ ետ չեմ դառնալ մինչեւ որ փչանան:
38 Ես կ’զարկեմ նորանց, որ չ’կարողանան վեր կենալ. նորանք իմ ոտների տակ կ’ընկնեն:
39 Դու ինձ զօրութիւն ես հագցնում պատերազմի համար. եւ ինձ դէմ վեր կացածներին իմ տակն ես գցում:
40 Դու իմ թշնամիներին հալածական ես անում. եւ ես ինձ ատողներին կ’փչացնեմ:
41 Նորանք կանչում են, բայց փրկող չ’կայ. դէպի Տէրը՝ բայց նա նորանց չէ պատասխանում:
42 Ես կ’փշրեմ նորանց ինչպէս փոշի քամիի առաջին. դուրս կ’թափեմ նորանց ինչպէս փողոցի ցեխը:
43 Դու ազատում ես ինձ ժողովրդի հակառակութիւնիցը. ինձ հեթանոսների վերայ գլուխ ես դնում. այն ժողովուրդը, որ ես նորան չէի ճանաչում, ծառայում է ինձ:
44 Հէնց ականջով լսելով՝ հնազանդուեցան ինձ. օտարների որդիքը ինձ շողոքորթեցին:
45 Օտարների որդիքը թուլացան, եւ սարսափում էին իրանց ապաստաններիցը:
46 Կենդանի է Տէրը. եւ օրհնեալ է իմ Վէմը. եւ բարձրացած լինի իմ փրկութեան Աստուածը.
47 Այն Աստուածը՝ որ վրէժս առնում է, եւ ժողովուրդները հնազանդեցնում է իմ ներքեւը.
48 Որ փրկում է ինձ իմ թշնամիներիցը. եւ բարձրացնում է ինձ նորանցից, որ ինձ դէմ վեր կացան. դու ազատում ես ինձ անիրաւ մարդիցը:
49 Սորա համար հեթանոսների մէջ կ’գոհանամ քեզանից, ով Տէր. եւ քո անունին սաղմոս կ’ասեմ:
50 Նա մեծացնում է իր փրկութիւնը իր թագաւորի համար. եւ ողորմութիւն է անում իր օծեալ Դաւիթին եւ նորա զաւակին մինչեւ յաւիտեան:
