Սաղմոս 84։1-12
Երգողների գլխաւորին. Կիթթիթի* վերայ. Կորխի որդկանց Սաղմոս։
84 Քանի՜ սիրելի են քո բնակարանները, ով Զօրաց Տէր:
2 Իմ անձը ցանկանում է եւ փափաքում Տիրոջ սրահներին, իմ սիրտը եւ իմ մարմինը ցնծում են կենդանի Աստուծով:
3 Ծիտն էլ տուն գտաւ եւ ծիծեռնակը բուն՝ իրան համար, որ իր ձագերը դնէ նորանում, այսինքն քո սեղանները, ով Զօրաց Տէր՝ իմ Թագաւոր եւ իմ Աստուած:
4 Երանի քո տան բնակողներին. նորանք յաւիտեան կ’օրհնեն քեզ: (Սելա։)
5 Երանի այն մարդկանց որ նորանց զօրութիւնը քեզանից է, որ նորանց սրտերումը պատրաստուած ճանապարհներ կան:
6 Արտասուքի ձորովն անցնելով՝ նորան աղբիւի պէս են շինում. եւ աշունի անձրեւը ծածկում է օրհնութիւնով:
7 Նորանք զօրութիւնից զօրութիւն են գնում, եւ Աստուծուն երեւում՝ Սիօնի մէջ:
8 Ով Տէր՝ Զօրաց Աստուած, լսիր իմ աղօթքն. ականջ դիր, ով Յակոբի Աստուած: (Սելա։)
9 Ով մեր վահանը՝ Աստուած, տես, եւ քո օծեալի երեսին նայիր:
10 Որովհետեւ լաւ է մէկ օր քո սրահներումը քան հազարներ. աւելի ուզում եմ դուռը պահպանել իմ Աստուծոյ տանը քան բնակիլ ամբարշտութեան տներումը:
11 Որովհետեւ Տէր Աստուածն արեւ եւ վահան է. Տէրը շնորհք եւ փառք է տալիս. նա ոչ մի բարիք չէ խնայում անարատութիւնով գնացողներից:
12 Ով Զօրաց Տէր, երանի այն մարդին որ քեզ է յուսացած:
