1 Թագավորներ 3։1-28
3 Եւ Սողոմոնը խնամութիւն արաւ Եգիպտոսի Փարաւօն թագաւորի հետ, եւ առաւ Փարաւօնի աղջիկը ու բերաւ նորան Դաւիթի քաղաքը մինչեւ որ շինեց վերջացրեց իր տունը եւ Տիրոջ տունը եւ Երուսաղէմի պարիսպը շուրջանակի։
2 Միայն թէ ժողովուրդը զոհում էր բարձր տեղերի վերայ. որովհետեւ մինչեւ այն օրերը Տիրոջ անունի համար տուն չէր շինուած։
3 Եւ Սողոմոնը սիրեց Տիրոջը, որ գնայ իր հայր Դաւիթի պատուէրներովը, միայն թէ զոհում եւ խնկարկում էր բարձր տեղերի վերայ։
4 Եւ թագաւորը գնաց Գաբաւոն, որ այնտեղ զոհ մատուցանէ. որովհետեւ նա էր մեծ բարձր տեղը. Սողոմոնը այն սեղանի վերայ հազար ողջակէզ զոհեց։
5 Գաբաւոնի մէջ Տէրը երեւեցաւ Սողոմոնին գիշերը երազում, եւ Աստուած ասեց. Խնդրիր թէ քեզ ինչ տամ։
6 Եւ Սողոմոնն ասեց. Դու մեծ ողորմութիւն արիր իմ հայր Դաւիթին՝ քո ծառային, ինչպէս որ նա գնաց քո առաջին հաւատարմութեամբ եւ արդարութեամբ եւ սրտի ուղղութեամբ քեզ հետ. եւ նորա համար պահեցիր այդ մեծ ողորմութիւնը եւ նորան մի որդի տուիր որ նստում է նորա աթոռի վերայ ինչպէս այսօր։
7 Եւ արդ, ով Տէր իմ Աստուած, դու թագաւորեցրիր ծառայիդ իմ հայր Դաւիթի տեղ, բայց ես մի փոքր տղայ եմ չ’գիտեմ ելնել ու մտնելը։
8 Եւ ծառադ քո ընտրած ժողովրդի մէջ է՝ մի մեծ ժողովրդի որ շատութիւնից չի հաշվուիլ եւ չի համարուիլ։
9 Ուրեմն տուր քո ծառային իմաստուն* սիրտ քո ժողովրդին դատելու բարիի ու չարի մէջտեղը ջոկելու. որովհետեւ ո՞վ է կարող քո այս մեծ ժողովրդին դատել։
10 Եւ այս խօսքը, որ Սողոմոնն այս բանը խնդրեց, հաճոյ երեւեցաւ Տիրոջ աչքին։
11 Եւ Աստուած ասեց նորան. Որովհետեւ դու այդ բանը խնդրեցիր եւ քեզ համար չ’խնդրեցիր շատ օրեր, եւ քեզ համար չ’խնդրեցիր հարստութիւն եւ չ’խնդրեցիր քո թշնամիների կեանքը, այլ քեզ համար դատ լսելու իմաստութիւն խնդրեցիր,
12 Ահա քո խօսքի պէս պիտի անեմ, ահա ես քեզ իմաստուն եւ հանճարեղ սիրտ տուի, որ քեզանից առաջ քեզ նմանը եղած չէ, եւ քեզանից յետոյ էլ քեզ նմանը վեր չի կենալ։
13 Ու նաեւ քո չ’ուզածն էլ տուի քեզ, հարստութիւն էլ, փառք էլ, որ քեզ նման մի մարդ չի լինիլ թագաւորների մէջ քո բոլոր օրերումը։
14 Եւ եթէ գնաս իմ ճանապարհներումը, որ իմ պատուիրանքներն ու հրամանները պահես ինչպէս որ գնաց քո հայր Դաւիթը, այն ժամանակ քո օրերը կ’երկայնացնեմ։
15 Եւ Սողոմոնը զարթնեց, եւ ահա երազ էր. եւ եկաւ Երուսաղէմ եւ կանգնեց Տիրոջ ուխտի տապանակի առաջին, եւ ողջակէզներ մատուցրեց եւ խաղաղութեան զոհեր արաւ. եւ իր բոլոր ծառաների համար կոչունք արաւ։
16 Այն ժամանակ երկու պոռնիկ կնիկներ եկան թագաւորի մօտ եւ կանգնեցին նորա երեսի առաջին։
17 Եւ կնիկներից մէկն ասեց. Ոհ տէր իմ, ես եւ այս կնիկը մէկ տան ենք բնակվում. եւ ես նորա մօտ որդի ծնեցի այս տանը։
18 Եւ եղաւ իմ ծնանելու երրորդ օրը, որ այս կնիկն էլ ծնեց. եւ մենք մէկտեղ էինք, այն տանը օտար չ’կայ մեզ հետ. մինակ մենք երկուսս ենք այն տան մէջ։
19 Եւ այս կնկայ որդին մեռնում է գիշերը. որովհետեւ սա նորա վերայ պառկած է լինում։
20 Եւ սա կէս գիշերին վեր է կենում առնում իմ որդիին իմ կշտիցը, եւ աղախինդ քնած է լինում, եւ նորան պառկեցնում է իր ծոցումը, իսկ այն իր մեռած տղան պառկեցնում է իմ ծոցումը։
21 Եւ ես առաւօտը վեր եմ կենում որ տղայիս ծիծ տամ, եւ ահա մեռած էր, եւ ցերեկին նորա վերայ մտադրութեամբ նայեցի, եւ ահա նա իմ ծնած տղան չէր։
22 Եւ այն միւս կնիկը ասում էր. Ոչ, այլ թէ կենդանին է իմ տղան, եւ քո տղան մեռածն է. եւ միւսն էլ ասում էր. Ոչ, այլ քո տղան մեռածն է, եւ իմ տղան կենդանին է. եւ այսպէս խօսում էին թագաւորի առաջին։
23 Եւ թագաւորն ասեց. Սա ասում է. Այս ողջը իմ տղան է, եւ քո տղան մեռածն է. իսկ նա ասում է. Ոչ, այլ քո տղան մեռածն է ու իմ տղան ողջն է։
24 Եւ թագաւորն ասեց. Սուր բերէք ինձ մօտ. եւ սուրը բերին թագաւորի առաջը։
25 Եւ թագաւորն ասեց. Կտրեցէք այդ ողջ երեխային երկու կտոր արէք. եւ տուէք կէսը մէկին եւ կէսը միւսին։
26 Եւ այն կնիկը որ կենդանի տղան նորանն էր, պատասխանեց թագաւորին, որովհետեւ նորա աղիքը գալարուեցան իր տղայի վերայ, եւ ասեց. Ո՜հ, տէր իմ, ողջ երեխային նորան տուէք բայց մի սպանէք նորան. իսկ միւսն ասում էր. Ոչ ինձ լինի, ոչ քեզ, կտրեցէք։
27 Եւ թագաւորը պատասխանեց եւ ասեց. Նորան տուէք ողջ երեխան, եւ մի սպանէք նորան. նա նորա մայրն է։
28 Եւ բոլոր Իսրայէլը լսեցին դատաստանը որ վճռեց թագաւորը, եւ թագաւորի երեսից վախեցան. որովհետեւ տեսան որ նորանում Աստուծոյ իմաստութիւնը կար դատաստան անելու համար։
Ծանոթագրություններ
^ 3։9 Եբր.՝լսող, ականջը բաց։
