2 Թագավորներ 15։1-38
15 Իսրայէլի թագաւոր Յերոբովամի քսանեւեօթներորդ տարին թագաւոր եղաւ Յուդայի թագաւոր Ամասիայի որդի Ազարիան*։
2 Տասնեւվեց տարեկան էր երբոր թագաւոր եղաւ, եւ յիսունեւերկու տարի թագաւորեց Երուսաղէմում, եւ նորա մօր անունն էր Յեքէլիա՝ Երուսաղէմից։
3 Եւ նա ուղղութիւն արաւ Տիրոջ առաջին բոլորովին այնպէս, ինչպէս որ արաւ իր հայրը՝ Ամասիան։
4 Միայն թէ բարձրաւանդակները չ’հեռացան. ժողովուրդը տակաւին զոհում եւ խունկ էր ծխում բարձրաւանդակների վերայ։
5 Եւ Տէրը զարկեց թագաւորին, եւ նա բորոտ էր մինչեւ իր մահուան օրը, եւ նա հիւանդանոցումն էր կենում. իսկ թագաւորի որդի Յովաթամը՝ տան վերատեսուչը՝ դատում էր երկրի ժողովրդին։
6 Եւ Ազարիայի գործերի մնացորդը եւ նորա բոլոր արածը, ահա նորանք յիշատակաց գրքումը։
7 Եւ Ազարիան ննջեց իր հայրերի հետ, եւ նորան թաղեցին իր հայրերի հետ Դաւիթի քաղաքումը. եւ նորա որդի Յովաթամը թագաւոր եղաաւ նորա տեղ։
8 Յուդայի թագաւոր Ազարիայի երեսունեւութերորդ տարին թագաւորեց Իսրայէլի վերայ Յերոբովամի որդի Զաքարիան՝ Սամարիայում վեց ամիս թագաւորելով։
9 Եւ նա չարութիւն արաւ Տիրոջ աչքի առաջին ինչպէս որ իր հայրերն էին արել. չ’հեռացաւ Նաբատեան Յերոբովամի մեղքիցը, որ Իսրայէլին մեղանչել տուաւ։
10 Եւ նորա դէմ ապստամբուեց Յասիսի որդի Սեղղումը, եւ նորան զարկեց ժողովրդի առաջին եւ սպանեց նորան, եւ թագաւոր եղաւ նորա տեղ։
11 Եւ Զաքարիայի գործերի մնացորդը, ահա գրուած են Իսրայէլի թագաւորների յիշատակաց գրքումը։
12 Այս Տիրոջ այն խօսքն է, որ խօսեց Յէուի հետ ասելով. Քո որդիքը մինչեւ չորրորդ սերունդը կ’նստեն Իսրայէլի աթոռի վերայ, եւ այնպէս եղաւ։
13 Յաբիսի որդի Սեղղումը թագաւոր եղաւ Յուդայի Ոզիա* թագաւորի երեսունեւիններորդ տարին, եւ թագաւորութիւն արաւ մէկ ամիս ժամանակ Սամարիայում։
14 Եւ վեր եկաւ Գադդիյի որդի Մանայեմը Թերսայից. եւ եկաւ Սամարիա եւ զարկեց Յաբիսի որդի Սեղղումին Սամարիայում եւ սպանեց նորան ու թագաւորեց նորա տեղ։
15 Եւ Սեղղումի գործերի մնացորդը, եւ նորա արած ապստամբութիւնը, ահա նորանք գրուած են Իսրայէլի թագաւորների յիշատակաց գրքումը։
16 Այն ժամանակ զարկեց Մանայեմը Թափսան եւ բոլոր նորանում եղողներին եւ նորա սահմանները Թերսայից սկսած, որովհետեւ իր դռները չ’բացաւ. նա էլ ջարդեց, նորա բոլոր յղիներին ճղոտեց։
17 Յուդայի թագաւոր Ազարիայի երեսունեւիններորդ տարին թագաւոր եղաւ Գադդիի որդի Մանայեմը Իսրայէլի վերայ տասը տարի Սամարիայումը թագաւորելով։
18 Եւ նա չարութիւն արաւ Տիրոջ աչքի առաջին. Նաբատեան Յերոբովամի մեղքերիցը, որ Իսրայէլին մեղանչել տուաւ, չ’հեռացաւ իր բոլոր օրերումը։
19 Երկրի վերայ եկաւ Ասորեստանի թագաւոր Փուղը, եւ Մանայեմը Փուղին հազար տաղանդ արծաթ տուաւ որ նորա ձեռքերը իր հետը լինեն, որ թագաւորութիւնը հաստատէ իր ձեռքին։
20 Եւ Մանայեմը հարկ դրաւ այս արծաթը Իսրայէլի բոլոր հարուստների վերայ Ասորեստանի թագաւորին տալու համար՝ իւրաքանչիւր անձին քառասուն սիկղ արծաթ. եւ Ասորեստանի թագաւորը ետ դառաւ եւ այնտեղ այն երկրում չ’մնաց։
21 Եւ Մանայեմի գործերի մնացորդը եւ նորա բոլոր արածը, ահա նորանք գրուած են Իսրայէլի թագաւորների յիշատակաց գրքումը.
22 Եւ Մանայեմը ննջեց իր հայրերի հետ, եւ նորա որդի Փակէիան թագաւոր եղաւ. նորա տեղ։
23 Յուդայի Ազարիա թագաւորի յիսուներորդ տարին թագաւոր եղաւ Մանայեմի որդի Փակէիան Իսրայէլի վերայ Սամարիայումն երկու տարի թագաւորելով։
24 Եւ նա չարութիւն արաւ Տիրոջ աչքի առաջին. չ’հեռացաւ Նափատեան Յերոբովամի մեղքերիցը որ Իսրայէլին մեղանչել տուաւ։
25 Եւ նորա դէմ դաւաճանութիւն արաւ իր զօրապետ՝ Ռովմելայի որդի Փակէէն եւ զարկեց նորան Սամարիայումը թագաւորի պալատի դահլիճումը Արգովբի եւ Արիէի հետ, եւ նորա հետ կային Գաղաադացիներից յիսուն հոգի. եւ նորան սպանեց եւ թագաւոր եղաւ նորա տեղը։
26 Եւ Փակէիայի գործերի մնացորդը եւ նորա բոլոր արածը, ահա նորանք գրուած են Իսրայէլի թագաւորների յիշատակաց գրքումը։
27 Յուդայի Ազարիա թագաւորի յիսունեւերկուերորդ տարին, թագաւոր եղաւ Ռովմելայի որդի Փակէէն Իսրայէլի վերայ Սամարիայումը քսան տարի թագաւորելով։
28 Եւ նա չարութիւն արաւ Տիրոջ աչքի առաջին. չ’հեռացաւ Նաբատեան Յերոբովամի մեղքերից, որ Իսրայէլին մեղանչել տուաւ։
29 Իսրայէլի թագաւոր Փակէէի օրերումն եկաւ Ասորեստանի Թագղաթ–փաղասար թագաւորը եւ առաւ Իյօնը, Աբէլ–բեթմաաքան, Յանովէն, Կադէսը, Հասորը, Գաղաադը եւ Գալիլեան՝ Նեփթաղիմի բոլոր երկիրը, եւ նորանց գերի տարաւ Ասորեստան։
30 Եւ Էլայի որդի Ովսէէն դաւաճանութիւն արաւ Ռովմելայի որդի Փակէէի դէմ, եւ զարկեց նորան ու սպանեց եւ թագաւոր եղաւ նորա տեղ Ոզիայի որդի Յովաթամի քսաներորդ տարին։
31 Եւ Փակէէի գործերի մնացորդը եւ նորա բոլոր արածը, ահա նորանք գրուած են Իսրայէլի թագաւորների յիշատակաց գրքումը։
32 Իսրայէլի թագաւոր Ռովմելայի որդի Փակէէի երկրորդ տարին թագաւոր եղաւ Յովաթամը՝ Յուդայի թագաւոր Ոզիայի որդին։
33 Քսանեւհինգ տարեկան էր, երբոր թագաւոր եղաւ, եւ տասնեւվեց տարի թագաւորեց Երուսաղէմում, եւ նորա մօր անունն էր Յերուսա՝ դուստր Սադովկի։
34 Եւ Տիրոջ աչքի առաջին ուղղութիւն արաւ, բոլորովին իր հայր Ոզիայի արածին պէս արաւ.
35 Միայն թէ բարձրաւանդակները չ’հեռացան. ժողովուրդը տակաւին զոհում եւ խունկ էր ծխում բանրձրաւանդակների վերայ. նա շինեց Տիրոջ տան բարձր դուռը։
36 Եւ Յովաթամի գործերի մնացորդը եւ նորա բոլոր արածը, ահա նորանք գրուած են Յուդայի թագաւորների յիշատակաց գրքումը։
37 Այն օրերումը Տէրը սկսեց Յուդայի վերայ ուղարկել Ասորիների Ռասին թագաւորին եւ Ռովմելայի որդի Փակէէին։
38 Եւ Յովաթամը ննջեց իր հայրերի հետ եւ թաղուեցաւ իր հայրերի հետ իր հայր Դաւիթի քաղաքումը, եւ նորա որդի Աքազը թագաւոր եղաւ նորա տեղ։
Ծանոթագրություններ
^ 15։1 Հմր 13, 30 ևլն. և բ Մն. 26:1, կոչուած է «Ոզիա». տես և Գլ. 14:21։ բ Մն 26:1, 3, 4։
^ 15։13 Մատ. ա. 8, 9. իսկ հմր. 1-ում կոչուած է «Ազարիա։»
