2 Թագավորներ 19։1-37
19 Եւ երբոր Եզեկիա թագաւորը լսեց, պատառեց իր հանդերձները եւ քուրձ հագաւ եւ գնաց Տիրոջ տունը։
2 Եւ պալատի հազարապետ Եղիակիմին եւ ատենադպիր Սեբնային եւ քահանաների ծերերին քուրձեր հագած ուղարկեց Ամովսի որդի Եսայիա մարգարէի մօտ։
3 Եւ նորանք ասեցին նորան. այսպէս է ասում Եզեկիան. Նեղութեան եւ կշտամբանքի եւ նախատինքի օր է այս օրը. որովհետեւ երեխաները հասել են ծննդեան կէտին, բայց ոյժ չ’կայ ծնելու։
4 Թերեւս լսէ քո Տէր Աստուածը Ռաբսակի բոլոր խօսքերը, որին իր տէրը՝ Ասորեստանի թոգաւորն ուղարկեց կենդանի Աստուծուն նախատելու եւ այնպիսի խօսքերով կշտամբելու, որոնք լսել է քո Տէր Աստուածը։ Ուրեմն աղօթք արա գտնուաղ մնացորդի համար։
5 Եւ Եզեկիա թագաւորի ծառաները եկան Եսայիայի մօտ։
6 Եւ Եսայիան ասեց նորանց. Այսպէս ասեցէք ձեր տիրոջը. ՏԷրը այսպէս է ասում. Մի վախենար այն խօսքերիցը, որ լսեցիր, որով հայհոյեցին ինձ Ասորեստանի թագաւորի ծառաները։
7 Ահա ես նորա վերայ մի ոգի կ’ուղարկեմ, եւ նա մի լուր կ’լսէ, եւ ետ կ’դառնայ իր երկիրը, եւ սրով կ’ընկնէ իր երկրումը։
8 Եւ Ռաբսակը ետ դառաւ եւ գտաւ Ասորեստանի թագաւորին Լեբնայի հետ պատերազմելիս, որովհետեւ լսել էր թէ չուէլ է Լաքիսից։
9 Եւ նա լուր լսեց Եթովպացիների թագաւոր Թարակայի մասին ասելով. Ահա գալիս է քեզ հետ պատերազմելու. եւ դարձեալ դեսպաններ ուղարկեց Եզեկիայի մօտ ասելով.
10 Այսպէս ասեցէք Եզեկիային՝ Յուդայի թագաւորին ասելով. Թող քո Աստուածը քեզ չ’խաբէ որին դու ապաւինել ես ասելով. Երուսաղէմը պիտի չ’տրուի Ասորեստանի թագաւորի ձեռքը։
11 Ահա դու լսեցիր, թէ ինչ են արել Ասորեստանի թագաւորները բոլոր երկիրներին՝ նորանց բնաջինջ անելով. եւ դու պիտի ազատուի՞ս։
12 Մի՞թէ ազգերի աստուածները ազատեցին նորանց, որոնց փչացրին իմ հայրերը՝ Գովզանը, Խառանը, Ռեսեփը եւ Թելասարում եղող Եդեմի որդկանցը։
13 Ո՞ւր է Եմաթի թագաւորը, Արփադի թագաւորը, Սեփարուիմ քաղաքի, Անայի եւ Աւայի թագաւորը։
14 Եւ Եզեկիան առաւ նամակները դեսպանների ձեռքիցը եւ կարդաց նորանց, եւ վեր գնաց Տիրոջ տունը. եւ Եզեկիան տարածեց նորանց Տիրոջ առաջին։
15 Եւ Եզեկիան աղաչեց Տիրոջ առաջին եւ ասեց. Ով Տէր Աստուած Իսրայէլի, որ նստած ես քերովբէների վերայ, դու ես միայն Աստուած երկրի բոլոր թագաւորութիւնների համար. դու ես ստեղծել երկինքն ու երկիրը։
16 Ով Տէր, խոնարհեցրու քո ականջը եւ լսիր. ով Տէր, բաց քո աչքերը եւ տես եւ լսիր Սենեքերիմի խօսքերը, որ ուղարկեց կենդանի Աստուծուն նախատելու։
17 Արդարեւ, ով Տէր, աւերել են Ասորեստանի թագաւորները այն ազգերին եւ նորանց երկիրները.
18 Եւ այրել են նորանց աստուածները կրակով, որովհետեւ նորանք աստուածներ չեն, այլ մարդի ձեռքի գործ՝ փայտ եւ քար. ուրեմն նորանց փչացրին էլ։
19 Բայց արդ, ով Տէր մեր Աստուած, մեզ ազատիր նորա ձեռքիցը, որ երկրի ամեն թագաւորութիւններն իմանան, որ դու Եհովադ ես միայն Աստուած։
20 Եւ Ամովսի որդի Եսայիան մարդ ուղարկեց Եզեկիայի մօտ ասելով. Այսպէս է ասում Իսրայէլի Տէր Աստուածը. Այն որ աղաչեցիր ինձ Ասորեստանի Սենեքերիմ թագաւորի մասին, լսեցի։
21 Այս այն խօսքն է որ Տէրն ասում է նորա մասին.Քեզ անարգեց, քեզ ծաղրեց Սիօնի կոյս աղջիկը.Քո ետեւից գլուխը շարժեց Երուսաղէմի աղջիկը։
22 Ո՞ւմ նախատեցիր եւ հայհոյեցիր.Եւ ո՞ւմ վերայ ձայն բարձրացրիր,Եւ աչքերդ վեր հանեցիր. Իսրայէլի Սուրբի վերայ։
23 Քո դեսպանների ձեռովը նախատեցիր Տիրոջը և ասեցիր.Իմ կառքերի շատութիւնովը վեր գնացի սարերի բարձրութեան վերայ՝ Լիբանանի կողմերը.Եւ ես կտրում եմ նորա բարձր եղեւինները,Եւ նորա ընտիր մայրերը.Եւ մտնում եմ նորա ծայրի օթեւանը Նորա Կարմեղոսի անտառը։
24 Եւ ես փորեցի եւ օտար ջրերը խմեցի,Եւ իմ ոտքերի թաթերովը կ’չորացնեմ Եգիպտոսի բոլոր գետերը։
25 Մի՞թէ դու չես լսել, որես եմ վաղուց արել այդ,Որ հին օրերից դորան ձեւակերպեցի.Հիմա բերի այդ,Որ աւերակների հողակոյտների դարձնես պարսպաւոր քաղաքները։
26 Եւ նորանց բնակիչների ձեռքը կարճ է,Վասն որոյ զարհուրեցին եւ ամաչեցին,Եւ եղան դաշտի խոտ՝Եւ կանաչ բանջար՝Տանիքի խոտ՝Եւ հասկը քշելուց առաջ խորշակահար եղած արտ,
27 Բայց ես գիտեմ քո բնակութիւնը, քո ելքն ու քո մուտքը,Եւ քո բարկութիւնը ինձ դէմ։
28 Քո ինձ դէմ ունեցած բարկութեան համար,Եւ ըստ որում քո ամբարտաւանութիւնը հասել է իմ ականջներին.Ես էլ դնում եմ իմ կարթը քո քթինԵւ իմ սանձը՝ քո բերանին,Եւ քեզ ետ եմ դարձնում քո եկած ճանապարհովը։
29 Եւ այս լինի քեզ նշանը.Կերէք այս տարի թափուածից բուսածը,Իսկ երկրորդ տարին՝ ինքնիրան բուսածը,Իսկ երրորդ տարին սերմեցէք ու հնձեցէք,Եւ այգիներ տնկեցէք ու նորանց պտուղը կերէք։
30 Եւ Յուդայի տան ազատուած մնացորդըԿրկին արմատ կ’արձակէ դէպի ցած,Եւ պտուղ կ’տայ վերեւումը։
31 Որովհետեւ Երուսաղէմից դուրս կը գայ մնացորդ,Եւ փրկուածներ՝ Սիօն սարիցը։Այս Զօրաց Տիրոջ նախանձն է անելու։
32 Սորա համար այսպէս է ասում Տէրը Ասորեստանի թագաւորի մասին.Նա չի մտնիլ այս քաղաքը,Եւ այնտեղ մի նետ չի գցիլ.Եւ վահանով նորա առաջը չի գալ,Եւ նորա դէմ պատնէշ չի կանգնեցնիլ։
33 Իր եկած ճանապարհովը ետ կ’դառնայ.Եւ այս քաղաքի մէջ չի մտնիլ.Ասում է Տէրը։
34 Եւ ես կ’պաշտպանեմ այդ քաղաքը, որ ազատեմ՝Ինձ համար եւ իմ ծառայ Դաւիթի համար։
35 Եւ եղաւ որ այն գիշերը դուրս եկաւ Տիրոջ հրեշտակը եւ զարկեց Ասորեստանցիների բանակումը հարիւր ութսունեւհինգ հազար. եւ երբոր առաւօտը վեր կացան, եւ ահա բոլորը մեռած դիակներ էին։
36 Եւ Ասորեստանի Սենեքերիմ թագաւորը չուեց գնաց դարձեալ, ու նստեց Նինուէ։
37 Եւ երբոր նա երկրպագում էր իր աստուծուն՝ Նեսրաքի տանը, նորա որդիքը Ադրամելէք եւ Սարասար նորան սրով սպանեցին եւ իրանք փախան Արարատի երկիրը. եւ նորա որդի Ասորդանը թագաւոր եղաւ նորա տեղ։
