2 Թագավորներ 9։1-37
9 Եւ Եղիսէ մարգարէն կանչեց մարգարէների որդիներից մէկին եւ ասեց նորան. Գօտիդ մէջքդ կապիր եւ այս իւղի ամանը ձեռքդ առ եւ գնա Ռամովթ–գաղաադ։
2 Եւ երբոր այնտեղ հասար, աչք ածիր այնտեղ Նամեսսեան Յովսափատի որդի Յէուին, եւ գնա ու վեր առ նորան իր գղբայրների միջիցը եւ նորան տար մի ներսի սենեակ։
3 Եւ իւղի ամանը առ եւ ածիր նորա գլխին եւ ասիր. Այսպէս է ասում Տէրը. Ես քեզ թագաւոր օծեցի Իսայէլի վերայ. յետոյ դուռը բաց ու փախիր եւ մի սպասիր։
4 Եւ այն երիտասարդը՝ մարգարէի ծառան Ռամովթ–գաղաադ գնաց։
5 Եւ եկաւ. եւ ահա զօրքի իշխանները նստել էին. եւ նա ասեց. Ես մի խօսք ունեմ քեզ հետ, ով զօրագլուխ. եւ Յէուն ասեց. Մեր ամենիցը որի՞ հետ. եւ նա ասեց. Քեզ հետ, ով զօրագլուխ։
6 Նա էլ վեր կացաւ գնաց տունը. եւ նա իւղը թափեց նորա գլխին եւ նորան ասեց. Այսպէս է ասում Իսրայէլի Տէր Աստուածը. Ես քեզ թագաւոր օծեցի Տիրոջ ժողովրդի՝ Իսայէլի վերայ։
7 Եւ դու ջարդիր քո տիրոջ Աքաաբի տունը, որ Յեզաբէլի ձեռքից առնեմ իմ մարգարէ ծառաների եւ Տիրոջ ամեն ծառաների արիւնների վրէժը։
8 Եւ Աքաաբի բոլոր տունը պիտի փչանայ, եւ պիտի ջնջեմ Աքաաբի համար ամեն արու մարդին եւ կապուածին եւ արձակուածին Իսրայէլի մէջ։
9 Եւ Աքաաբի տունը պիտի Նաբատեան Յերոբովամի տան պէս եւ Աքիայի որդի Բաասայի տան պէս անեմ։
10 Եւ Յեզաբէլին էլ պիտի շուներն ուտեն Յեզրայէլի ագարակումը, եւ թաղող պիտի չ’լինի։ Եւ դուռը բացաւ ու փախաւ։
11 Եւ Յէուն դուրս եկաւ գնաց իր տիրոջ ծառաների մօտ. եւ նորան ասեցին. Խաղաղութի՞ւն է. ի՞նչու համար էր եկել այդ ցնորուածը քեզ մօտ. եւ նա ասեց նորանց. Դուք ճանաչում էք այն մարդին էլ նորա խօսքն էլ։
12 Բայց նորանք ասեցին. Սխալ է, մեզ պատմիր. եւ նա ասեց. Այսպէս եւ այսպէս ասեց ինձ ասելով թէ Եհովան այսպէս է ասում. Ես քեզ թագաւոր օծեցի Իսրայէլի վերայ։
13 Եւ նորանք շուտով ամեն մէկն իր հանդերձներն առան եւ գցեցին նորա տակը բուն աստիճանների վերայ եւ փողը հնչեցրին ու ասեցին. Յէուն է թագաւոր։
14 Եւ Նամեսսեան Յովսափատի որդի Յէուն դաւաճանութիւն արաւ Յովրամի դէմ։ (Բայց Յովրամը պահպանութիւն էր անում Ռամովթ–գաղաադում ինքը եւ բոլոր Իսրայէլը Ասորիների Ազայէլ թագաւորի երեսից։
15 Եւ Յովրամ թագաւորը ետ էր դառել, որ առողջանայ Յեզրայէլում Ասորիների նորան տուած վէրքերիցը, երբոր նա պատերազմ ունէր Ասորիների Ազայէլ թագաւորի հետ։) Եւ Յէուն ասեց. Եթէ հաճութիւն ունէք, մի փախստական դուրս չ’գայ այս քաղաքից, որ գնայ եւ իմացնէ Յեզրայէլում։
16 Եւ Յէուն հեծաւ եւ գնաց Յեզրայէլ, որովհետեւ Յովրամն այնտեղ պառկած էր, եւ Յուդայի Ոքոզիա թագաւորն իջել էր այնտեղ որ Յովրամին տեսնէ։
17 Եւ դէտը կանգնել էր Յեզրայէլի աշտարակի վերայ, եւ տեսաւ Յէուի բազմութիւնը գալիս, եւ ասեց. Մի բազմութիւն եմ տեսնում գալիս. եւ Յովրամն ասեց. Մի ձիաւոր առ եւ ուղարկիր նորանց դէմ, որ ասէ՝ Խաղաղութի՞ւն է։
18 Եւ ձիաւորը գնաց նորան դիմաւորելու, եւ ասեց. Այսպէս է ասում թագաւորը՝ Խաղաղութի՞ւն է։ Եւ Յէուն ասեց նորան. Դու ի՞նչ բան ունես խաղաղութեան հետ, ետեւս անցիր։ Եւ դէտը պատմեց եւ ասեց. Պատգամաւորը գնաց մինչեւ նորանց եւ ետ չ’դառաւ։
19 Եւ մի երկրորդ ձիաւոր ուղարկեց, եւ նա գնաց նորանց մօտ, եւ ասեց. Այսպէս է ասում թագաւորը. Խաղաղութի՞ւն է։ Եւ Յէուն ասեց նորան. Դու ի՞նչ բան ունես խաղաղութեան հետ. ետեւս անցիր։
20 Եւ դէտը պատմեց եւ ասեց. Գնաց մինչեւ նորանց եւ ետ չ’դառաւ. եւ ընթացքը Նամեսսեան Յէուի ընթացքին նման է. որովհետեւ կատաղաբար է քշում։
21 Եւ Յովրամն ասեց. Լծեցէք. եւ նորանք լծեցին նորա կառքը, եւ դուրս եկաւ Իսրայէլի Յովրամ թագաւորը եւ Յուդայի Ոքոզիա թագաւորը ամեն մէկն իր կառքովը Յէուին դիմաւորելու, եւ նորան գտան Յեզրայէլացի Նաբովթի ագարակումը։
22 Եւ եղաւ երբոր Յովրամը Յէուին տեսաւ, ասեց. Խաղաղութի՞ւն է, Յէ՛ու. եւ նա ասեց. Ի՜նչ է խաղաղութիւնը, մինչեւ որ կան քո մօր՝ Յեզաբէլի պոռնկութիւնները եւ նորա շատ կախարդութիւնները։
23 Եւ Յովրամը դարձրեց իր ձեռքերը ու փախաւ. եւ Ոքոզիային ասեց. Դաւաճանութիւն է, Ոքոզիա։
24 Եւ Յէուն քաշեց աղեղը եւ զարկեց Յովրամին նորա ուսերի մէջտեղից, եւ նետը անցաւ սրտի միջովը, եւ նա կծկուեցաւ իր կառքումը։
25 Եւ Յեուն ասեց իր զօրագլուխ Բադեկարին. Վեր առ գցիր դորան Յեզրայէլացի Նաբովթի կալուածքի ագարակը. որովհետեւ յիշիր, երբոր ես եւ դու նորա հայր Աքաաբի ետեւից հեծած զոյգ գնում էինք, Տէրը այդ վճիռը տուաւ դորան։
26 Իրաւի տեսայ երէկ Նաբովթի արիւնը եւ նորա որդկանց արիւնը, ասում է Տէրը, եւ պիտի հատուցանեմ քեզ այս ագարակումը, ասում է Տէրը. եւ արդ՝ վեր առ գցիր դորան ագարակը՝ Տիրոջ խօսքին համեմատ։
27 Եւ երբոր Յուդայի թագաւոր Ոքոզիան տեսաւ, փախաւ պարտէզի տան ճանապարհովը. եւ Յէուն հալածեց նորան եւ ասեց. Դորան էլ սպանեցէք այդ կառքի վերայ. եւ վիրաւորեցին նորան Յեբղաամի մօտ եղող Գուր բլուրի վերայ. նա էլ փախաւ Մակեդդով, եւ մեռաւ այնտեղ։
28 Եւ նորա ծառաները նորան կառքով տարին Երուսաղէմ եւ թաղեցին նորան իր գերեզմանումը իր հայրերի հետ Դաւիթի քաղաքումը։
29 Եւ Ոքոզիան թագաւոր եղաւ Յուդայի վերայ Աքաաբի որդի Յովրամի տասնեւմէկերորդ տարին։
30 Եւ Յէուն եկաւ Յեզրայէլ։ Եւ երբոր Յեզաբէլը լսեց, ծարոյր դրաւ աչքերին եւ զարդարեց իր գլուխը եւ պատուհանովը դուրս էր նայում։
31 Եւ Յէուն մտաւ քաղաքի դուռը. եւ Յեզաբէլա ասեց. Մի՞թէ խաղաղութիւն գտաւ իր տիրոջն սպանող Զամբրին։
32 Իսկ նա իր երեսը վեր բարձրացրեց դէպի պատուհանը եւ ասեց. Ո՞վ է ինձ հետ, ո՞վ. եւ երկու երեք ներքինիներ մտիկ տուին իրան։
33 Եւ ասեց. Դորան վայր գցեցէք. եւ նորանք վայր գցեցին նորան. եւ նորա արիւնը պատովը եւ ձիերովը տուաւ. եւ նորան կոխ տուին։
34 Յետոյ նա եկաւ եւ կերաւ ու խմեց եւ ասեց. Գտէք այդ անիծուածին եւ թաղեցէք դորան. որովհետեւ թագաւորի աղջիկ է։
35 Եւ գնացին նորան թաղելու, բայց նորա վերայ բան չ’գտան բացի գագաթից եւ ոտներից եւ ձեռքերի թաթերից։
36 Եւ ետ դառան նորան իմացրին. եւ նա ասեց. Այդ Տիրոջ խօսքն է որ խօսել է իր ծառայ Թեզբացի Եղիայի ձեռով ասելով. Յեզրայէլի ագարակումը շուները պիտի ուտեն Յեզաբէլի միսը.
37 Եւ Յեզաբէլի դիակը աղբի պէս պիտի լինի Յեզրայէլի ագարակի վերայ այնպէս որ չ’ասեն թէ Սա Յեզաբէլն է։
