2 Սամուել 19։1-43
19 Եւ Յովաբին պատմեցին թէ Ահա թագաւորը լաց է լինում եւ Աբիսողոմի վերայ սուգ է անում։
2 Եւ յաղթութիւնն այն օրը սուգի դարձաւ բոլոր ժողովրդի առաջին. որովհետեւ ժողովուրդը այն օրը լսել էր որ ասում էին թէ թագաւորը տրտմել է իր որդիի մասին։
3 Եւ այն օրը զօրքը գողի պէս էր մտնում քաղաքը ինչպէս որ գողի պէս քաղաքը կ’մտնէ պատերազմում փախած ամօթահար զօրքը։
4 Եւ թագաւորը ծածկեց իր երեսը, եւ մեծ ձայնով աղաղակեց թագաւորը. Որդիս Աբիսողոմ, Աբիսողոմ որդիս, որդիս։
5 Եւ Յովաբը գնաց մտաւ թագաւորի մօտ սենեակը եւ ասեց. Դու այսօր ամօթով արիր քո բոլոր ծառաների երեսը, որ քո անձը եւ քո որդկանց ու աղջկերանց անձը, եւ քո կանանց անձն եւ քո հարճերի անձը այսօր ազատեցին։
6 Դու սիրում եմ քեզ ազատողներին եւ ատում եմ քեզ սիրողներին, որովհետեւ այսօր իմացրիր որ քեզ համար ոչինչ են իշխանները եւ ծառաները. որովհետեւ ես այսօր հասկացայ որ այսօր Աբիսողոմը կենդանի լինէր եւ մենք այսօր ամենքս մեռած լինէինք, այն ժամանակ հաճոյ կ’լիներ այս քո աչքին։
7 Եւ արդ վեր կաց՝ դուրս եկ եւ քաղցրութեամբ խօսիր ծառաներիդ հետ. որովհետեւ երդում եմ անում Տէրով, որ եթէ դուրս չ’գաս, այս գիշեր քեզ մօտ մարդ չի մնալ, եւ այս քեզ համար աւելի չար կ’լինի քան թէ այն ամեն չարիքները, որ քեզ վերայ եկել են քո մանկութիւնից մինչեւ հիմա։
8 Եւ թագաւորը վեր կացաւ ու նստեց դռանը, եւ բոլոր ժողովրդին իմացրին ասելով. Ահա թագաւորը նստել է դռանը, եւ բոլոր ժողովուրդն եկաւ թագաւորի առաջ, իսկ Իսրայէլը փախել էր ամեն մարդ իր վրանը։
9 Եւ Իսրայէլի ամեն ցեղերում բոլոր ժողովուրդը վիճում էին եւ ասում. Թագաւորը մեզ փրկեց մեր թշնամիների ձեռքիցը, եւ նա ազատեց մեզ Փղշտացիների ձեռքիցը, եւ հիմա փախել է երկրիցը Աբիսողոմի պատճառով։
10 Իսկ Աբիսողոմը, որին մենք օծեցինք մեզ վերայ, մեռաւ պատերազմումը. եւ հիմա ի՞նչու համար էք լուռ կացել թագաւորին ետ բերելուց։
11 Եւ Դաւիթ թագաւորը ուղարկեց Սադովկ եւ Աբիաթար քահանաների մօտ եւ ասեց. Խօսեցէք Յուդայի ծերերի հետ ասելով. Ի՞նչու համար դուք վերջինը լինէք թագաւորն իր տունը ետ բերելում. եւ բոլոր Իսրայէլի խօսքը հասել էր թագաւորին իր տանը։
12 Դուք իմ եղբայրներն էք, իմ իմ ոսկրն ու մարմինն էք դուք, եւ ի՞նչու համար դուք վերջինը լինէք թագաւորը ետ բերելում։
13 Եւ Ամեսայիին ասեցէք. Մի՞թէ դու իմ ոսկրն ու մարմինը չես. Աստուած ինձ այսպէս անէ, եւ էլ աւելացնէ, թէ որ դու իմ առաջին ամեն ժամանակ զօրագլուխ չ’լինես Յովաբի փոխարէն։
14 Եւ դարձրեց բոլոր Յուդայի մարդկանց սիրտը մէկ մարդի սրտի պէս. եւ նորանք պատգամաւորներ ուղարկեցին թագաւորի մօտ թէ Ետ դարձիր դու եւ քո բոլոր ծառաները։
15 Եւ թագաւորը ետ դառաւ եւ եկաւ մինչեւ Յորդանան. եւ Յուդան եկաւ մինչեւ Գաղգաղա, որ թագաւորին դիմաւորեն եւ Յորդանանովն անցկացնեն թագաւորին։
16 Եւ Բաւուրիմացի Գերայի որդի Բենիամինեան Սեմէին շուտով եկաւ իջաւ Յուդայի մարդկանց հետ Դաւիթ թագաւորին դիմաւորելու։
17 Եւ նորա հետ հազար մարդ կար Բենիամինից. նաեւ Սաւուղի տան ծառայ Սիբան եւ նորա տասնեւհինգ որդիները եւ քսան ծառաները նորա հետ եկան եւ հասան Յորդանան թագաւորի առաջը։
18 Եւ մի նաւակ անցաւ թագաւորի տունը անց կանցնելու եւ նորա աչքին հաճոյ երեւեցածն անելու համար. եւ Գերայի որդի Սեմէին վայր ընկաւ թագաւորի առաջը, երբ նա անցնում էր Յորդանանովը։
19 Եւ ասեց թագաւորին. իմ տէրը յանցանք չ’համարէ ինձ, եւ մի յիշիր որ ծառադ անօրէնութիւն գործեց այն օրը, որ իմ տէր թագաւորը դուրս էր եկել Երուսաղէմից. թագաւորը իր սրտումը չ’դնէ այն։
20 Որովհետեւ ծառադ գիտէ, որ ես յացանք եմ գործել եւ ահա այսօր առաջինը ես եմ եկել Յովսէփի բոլոր տանիցն իմ տէր թագաւորին դիմաւորելու իջնելով։
21 Եւ Շարուհեայի որդի Աբեսսան պատասխանեց եւ ասեց. Մի՞թէ սորա փոխարէն չի պիտի մեռնէ Սեմէին որ Տիրոջ օծեալին անիծեց։
22 Եւ Դաւիթն ասեց. Դուք ի՞նչ ունէք ինձ հետ, ով Շարուհեայի որդիք, որ այսօր ինձ համար ոսոխ էք դառնում. մի՞թէ այսօր մարդ մեռնէ Իսրայէլի մէջ. որովհետեւ չ’գիտե՞մ որ ես այսօր թագաւոր եմ Իսրայէլի վերայ։
23 Եւ թագաւորն ասեց Սեմէիին. Պիտի չ’մեռնես. եւ թագաւորը նորան երդում արաւ։
24 Եւ Սաւուղի որդի Մեմփիբոսթէն իջաւ թագաւորին դիմաւորելու առանց իր ոտքերը պատրաստելու եւ առանց իր մօրուքը շինելու, եւ իր հանդերձները չէր լուացել այն օրից հետէ, որ թագաւորը գնացել էր մինչեւ այն օրը որ եկաւ խաղաղութեամբ։
25 Եւ եղաւ երբոր եկաւ Երուսաղէմ թագաւորին դիմաւորելու այն ժամանակ թագաւորն ասեց նորան. Ի՞նչու համար չ’եկար ինձ հետ, Մեմփիբոսթէ։
26 Եւ նա ասեց. Ով իմ տէր թագաւոր, ծառաս ինձ խաբեց. որովհետեւ ծառադ ասեց. Ինձ համար համետեմ էշը եւ վերան հեծնեմ ու գնամ թագաւորի հետ, որովհետեւ ծառադ կաղ է։
27 Իսկ նա բամբասել է քո ծառայիդ իմ տէր թագաւորին. բայց իմ տէր թագաւորը Աստուծոյ հրեշտակի պէս է. ուրեմն արա ինչ որ հաճելի է քո աչքի առաջին։
28 Որովհետեւ իմ հօր բոլոր տունը մի ուրիշ բան չէին բացի մահի արժանի լինելուց իմ տէր թագաւորի համար. սակայն ծառայիդ քո սեղանից ուտողների հետ դրիր. եւ ես այլ եւս ի՞նչ իրաւունք ունեմ որ միւսանգամ աղաղակեմ դէպի թագաւորը։
29 Եւ թագաւորն ասեց նորան. Էլ ի՞նչու ես խօսում այդ խօսքերը. ասել եմ՝ Դու եւ Սիբան բաժանեցէք արտը։
30 Եւ Մեմփիբոսթէն ասեց թագաւորին. Թող նա բոլորն էլ առնէ՝ իմ տէր թագաւորը խաղաղութեամբ իր տունը գալուց յետոյ։
31 Եւ Գաղաադացի Բերզելին իջաւ Ռովգելիմից եւ անցաւ թագաւորի հետ Յորդանանովը, որ նորան Յորդանանովը ճանապարհ դնէ։
32 Եւ Բերզնելին շատ ծեր էր՝ ութսուն տարեկան. եւ նա կերակրեց թագաւորին քանի որ նա Մանայիմի մէջ էր կենում. որովհետեւ նա մի շատ մեծ մարդ էր։
33 Եւ թագաւորն ասեց Բերզելիին. Դու եկ ինձ հետ, եւ ես քեզ կերակրեմ ինձ հետ Երուսաղէմում։
34 Եւ Բերզելին ասեց թագաւորին. Ո՞րքան են իմ կեանքի տարիների օրերը, որ ես թագաւորի հետ վեր գնամ Երուսաղէմ։
35 Ես այսօր ութսուն տարեկան մարդ եմ. մի՞թէ կարող եմ լաւը վատից ջոկել. կամ ծառադ կերածիս խմածիս հա՞մը կառնեմ. կամ էլ կ’լսե՞մ երգիչների եւ երգչուհիների ձայնը, եւ էլ ի՞նչու համար ծառադ իմ տէր թագաւորին բեռ դառնայ։
36 Մի քիչ անց է կենում ծառադ Յորդանանովը թագաւորի հետ, եւ ի՞նչու համար թագաւորն ինձ համար մի այսպիսի մեծ վարձք հատուցանէ։
37 Ծառադ ետ դառնամ ու մեռնեմ իմ քաղաքումը իմ հօր ու իմ մօր գերեզմանումը. ահա թող Քամաամ ծառադ անցնէ իմ տէր թագաւորի հետ. եւ նորան արա ինչ որ բարի է քո աչքին։
38 Եւ թագաւորն ասեց. Թող Քամաամն անցնէ ինձ հետ, եւ ես կ’անեմ նորան ինչ որ բարի է քո աչքին. եւ ամեն ինչ որ դու ինձանից ուզես՝ կ’անեմ քեզ։
39 Եւ բոլոր ժողովուրդն անցաւ Յորդանանովը, եւ թագաւորն էլ անցաւ եւ թագաւորը համբուրեց Բերզելիին եւ օրհնեց նորան, եւ նա ետ դառաւ իր տեղը։
40 Եւ թագաւորն անցաւ Գաղգաղա, եւ Քամաամն անցաւ նորա հետ. եւ Յուդայի բոլոր ժողովուրդը անց կացրեց թագաւորին, նոյնպէս եւ Իսրայէլի կէս ժողովուրդը։
41 Եւ ահա ամեն Իսրայէլացի մարդիկը գալիս էին թագաւորի մօտ եւ ասում էին թագաւորին. Ի՞նչու համար քեզ մեր Յուդայեան եղբայրները գողացան եւ թագաւորին ու նորա տունը անցկացրին Յորդանանովը եւ Դաւիթի ամեն մարդիկն իրան հետ։
42 Եւ ամեն մի Յուդայեան պատասխանում էր Իսրայէլացիին թէ Թագաւորը ինձ աւելի մօտ է, եւ դու ի՞նչու ես այդպէս բարկանում այս բանի մասին. մի՞թէ մենք թագաւորիցը կերակրով կերակրուեցանք կամ նա մեզ ընծանե՞ր ընծայեց։
43 Եւ Իսրայէլացին պատասխանում էր Յուդայեանին. Ես թագաւորի վերայ տասը բաժին ունեմ, եւ ես աւելի մօտ եմ Դաւիթին քան թէ դու. եւ ի՞նչու համար ինձ անարգեցիր եւ առաջ իմ խօսքը չ’եղաւ իմ թագաւորին անց կացնելում, եւ յետոյ Յուդայանի խօսքը Իսրայէլացիի խօսքիցը աւելի խիստ էր լինում։
