2 Տարեգրություն 28։1-27
28 Աքազը քսան տարեկան էր, երբոր թագաւոր եղաւ, եւ տասնեւվեց տարի թագաւորեց Երուսաղէմումը. եւ ուղղութիւն չ’արաւ Տիրոջ աչքի առաջին ինչպէս իր հայր Դաւիթը։
2 Եւ գնաց Իսրայէլի թագաւորների ճանապարհներովը, եւ Բահաղիմների համար ձուլածոյ կուռքեր էլ շինեց։
3 Եւ Ենովմի որդիի ձորումը խունկ էր ծխում, եւ իր որդիներին կրակով այրեց այն ազգերի գարշութիւնների պէս, որոնց Տէրը Իսրայէլի որդկանց առաջից քշել էր։
4 Եւ զոհ էր մատուցում եւ խունկ ծխում բարձրաւանդակների վերայ եւ բլուրների վերայ եւ ամեն կանաչ ծառի տակ։
5 Եւ նորա Տէր Աստուածը նորան մատնեց Ասորիների թագաւորի ձեռքը. եւ նորանք զարկեցին նորան, եւ նորանից շատ գերիներ առան, եւ տարին Դամասկոս. նաեւ Իսրայէլի թագաւորի ձեռքն ընկաւ, եւ նա սորան մեծ հարուածով զարկեց։
6 Եւ Ռովմելայի որդի Փակէէն մէկ օրուան մէջ Յուդայում հարիւր քսան հազար մարդ սպանեց՝ ամենքն էլ քաջ զօրաւորներ, որովհետեւ թողեցին իրանց հայրերի Տէր Աստուծուն։
7 Եւ Եփրեմի զօրաւորը Զեքրին սպանեց թագաւորի որդի Մաասիային, եւ պալատի հազարապետ Եզրիկամին, եւ թագաւորի փոխանորդ Եղկանային։
8 Եւ Իսրայէլի որդիքն իրանց եղբայրներից երկու հարիւր հազար կին, տղայ եւ աղջիկ գերի արին, նաեւ շատ աւար յափշտակեցին նորանցից, եւ աւարը բերին Սամարիա։
9 Եւ այնտեղ Տիրոջ մէկ մարգարէն կար Ովդեդ անունով, որ դուրս եկաւ Սամարիա մտնող զօրքի առաջը եւ նորանց ասեց. Ահա ձեր հայրերի Տէր Աստուածը Յուդայի վերայ բարկանալով նորանց ձեր ձեռքը մատնեց, եւ դուք նորանց սպանեցիք մի բարկութիւնով, որ մինչեւ երկինքը հասաւ։
10 Եւ հիմա մտածում էք որ Յուդայի եւ Երուսաղէմի որդկանցը ձեզ համար ծառաներ եւ աղախիններ անէք։ Մի՞թէ հենց միայն ձեզ վերայ յանցանքներ չ’կան Տէր Աստուծոյ առաջին։
11 Եւ հիմա ինձ լսեցէք եւ ետ դարձրէք այդ գերիներին, որոնց դուք գերի էք արել ձեր եղբայրներից, որովհետեւ Տիրոջ սաստիկ բարկութիւնը ձեզ վերայ է։
12 Եւ Եփրեմի որդկանց իշխաններից վեր կացան այս մարդիկը՝ Յօհանանի որդի Ազարիան, Մեսեղամօթի որդի Բարաքիան, Սեղղումի որդի Եզեկիան եւ Ադղիայի որդի Ամեսային պատերազմից եկողների դէմ.
13 Եւ ասեցին նորանց. Այդ գերիներին այստեղ մի բերէք. որովհետեւ դուք մտածում էք, որ Տիրոջ առաջին մենք յանցաւոր լինելով, մեր մեղքերի եւ յանցանքների վերայ աւելացնէք, որովհետեւ մեր յանցանքը շատ է եւ սաստիկ բարկութիւն կայ Իսրայէլի վերայ։
14 Այն ժամանակ զինուորականները գերիներին եւ աւարկ բաց թողեցին իշխանների եւ բոլոր ժողովքի առաջին։
15 Եւ այն մարդիկը վեր կացան որոնք անունով յիշուած էին, եւ առան գերիներին եւ նորանց բոլոր մերկերին հագցրին աւարիցը, եւ նորանց հանդերձներ եւ կօշիկներ հագցրին, եւ նորանց կերակրեցին եւ խմեցրին եւ իւղով օծեցին նորանց, եւ նորանց բոլոր տկարներին հեծցրին էշերի վերայ եւ տարին Երիքով Արմաւենեաց քաղաքը նորանց եղբայրների մօտ. եւ ետ դառան Սամարիա։
16 Այն ժամանակ Աքազ թագաւորը պատգամ ուղարկեց Ասորեստանի թագաւորներին, որ իրան օգնեն։
17 Որովհետեւ Եդովմացիք դարձեալ եկել էին, եւ Յուդային զարկել եւ գերիներ էին արել։
18 Եւ Փղշտացիներ էլ յարձակուեցան դաշտի եւ Յուդայի հարաւակողմի քաղաքների վերայ եւ առաւ Բեթսամիւսը, Այեղոնը, Գադերօթը, Սոքովը, եւ նորա գիւղերը, եւ Գամզովը եւ նորա գիւղերը, եւ բնակվում էին այնտեղ։
19 Որովհետեւ Տէրը նկուն արաւ Յուդային Իսրայէլի թագաւոր Աքազի պատճառով, որովհետեւ նա անօրէնացաւ Յուդայի մէջ եւ ապստամբուեց Տիրոջ դէմ։
20 Եւ նորա վերայ եկաւ Ասորեստանի Թագղաթ – փաղասար թագաւորը, եւ նորան նեղեց եւ ոչ թէ օգնութիւն արաւ։
21 Որովհետեւ թէեւ Աքազը կողոպտեց Տիրոջ տունը եւ թագաւորի տունը եւ իշխաններին եւ տուաւ Ասորեստանի թագաւորին, բայց նա նորան օգնութիւն չ’արաւ։
22 Եւ այն ժամանակ էլ որ նեղութեան մէջ էր, շարունակ մեղք էր գործում Տիրոջ դէմ դա՝ այդ Աքազ թագաւորը։
23 Եւ զոհեր էր մատուցանում Դամասկոսի աստուածներին որ իրան ջարդել էին, եւ ասում էր թէ Ասորիների թագաւորների աստուածներն օգնում են իրանց. ես նորանց զոհեր մատուցանեմ որ ինձ օգնեն. բայց նորանք իրան եւ բոլոր Իսրայէլին անկման պատճառ եղան։
24 Եւ Աքազը ժողովեց Աստուծոյ տան անօթները, եւ կոտրատեց Աստուծոյ տան անօթները, եւ գոցեց Տիրոջ տան դուռը. եւ Երուսաղէմի բոլոր անկիւններումը սեղաններ շինեց։
25 Եւ Յուդայի ամեն մէկ քաղաքի մէջ բարձրաւանդակներ շինեց ուրիշ աստուածների խունկ ծխելու համար. եւ բարկացրեց իրան հայրերի Տէր Աստուծուն։
26 Եւ նորա մնացորդ գործերը եւ նորա բոլոր ճանապարհները՝ առաջինները եւ վերջինները, ահա նորանք գրուած են Յուդայի եւ Իսրայէլի թագաւորների գրքումը։
27 Եւ Աքազը ննջեց իր հայրերի հետ, եւ նորան թաղեցին Երուսաղէմ քաղաքումը. բայց նորան չ’տարին Իսրայէլի թագաւորների գերեզմանները. եւ նորա որդի Եզեկիան թագաւոր եղաւ նորա տեղ։
