Ամոս 7։1-17
7 Ահա թե ինչ ցույց տվեց ինձ Գերիշխան Տեր Եհովան. նա մորեխի երամ ուղարկեց, երբ ուշ ցանքը* սկսել էր ծլել+։ Դա այն ցանքն էր, որն արվում էր թագավորի խոտը հնձելուց հետո։
2 Երբ այն ամբողջությամբ կերավ երկրի բուսականությունը, ես ասացի. «Ո՜վ Գերիշխան Տեր Եհովա, խնդրում եմ, ների՛ր նրանց+։ Ինչպե՞ս որևէ մեկը կանգուն կմնա Հակոբից։ Չէ՞ որ նա փոքր է»+։
3 Եվ Եհովան ափսոսաց դրա համար+։ «Դա չի պատահի»,– ասաց Եհովան։
4 Ահա թե ինչ ցույց տվեց ինձ Գերիշխան Տեր Եհովան. Գերիշխան Տեր Եհովան իր ժողովրդի հետ վեճ սկսեց, որը կրակով էր լուծվելու+։ Եվ կրակը լափեց ջրերի հսկայական անդունդը ու խժռեց մի հողակտոր։
5 Ես ասացի. «Ո՜վ Գերիշխան Տեր Եհովա, խնդրում եմ, մի՛ արա+։ Ինչպե՞ս որևէ մեկը կանգուն կմնա Հակոբից։ Չէ՞ որ նա փոքր է»+։
6 Եվ Եհովան ափսոսաց դրա համար+։ «Սա էլ չի պատահի»,– ասաց Գերիշխան Տեր Եհովան։
7 Ահա թե ինչ ցույց տվեց նա ինձ. Եհովան կանգնած էր պարսպի վրա, որն ուղղալարով+ էր շինված, և նրա ձեռքին ուղղալար կար։
8 Հետո Եհովան հարցրեց ինձ. «Ի՞նչ ես տեսնում, Ամո՛ս»։ Ես էլ պատասխանեցի՝ ուղղալար։ Եվ Եհովան շարունակեց. «Ահա ես ուղղալար եմ կախում իմ Իսրայել ժողովրդի մեջ+։ Ես այլևս չեմ ներելու նրանց+։
9 Իսահակի բարձունքները+ կամայանան, Իսրայելի սրբարանները+ կավերվեն+, և ես սրով դուրս կգամ Հերոբովամի* տան դեմ»+։
10 Բեթելի քահանա+ Ամասիան Իսրայելի թագավոր Հերոբովամի+ մոտ մարդ ուղարկեց՝ ասելով. «Ամոսը քո դեմ դավադրություն է կազմակերպել հենց Իսրայելի տան մեջ+։ Երկիրը չի կարող հանդուրժել նրա բոլոր խոսքերը+,
11 որովհետև Ամոսն այսպես է ասում. «Հերոբովամը սրով կմեռնի, իսկ Իսրայելը իր երկրից անպատճառ կաքսորվի»»+։
12 Ամասիան ասաց Ամոսին. «Ո՛վ տեսանող+, գնա՛, փախի՛ր Հուդայի երկիր։ Այնտե՛ղ հաց կեր և այնտե՛ղ մարգարեացիր։
13 Իսկ Բեթելում այլևս չմարգարեանա՛ս+, որովհետև այն թագավորի սրբարանն է+ ու թագավորության տունը»։
14 Ի պատասխան՝ Ամոսն ասաց Ամասիային. «Ես մարգարե չեմ եղել, ոչ էլ մարգարեի որդի+, այլ հովիվ+ ու ժանտաթուզ ծակող եմ եղել։
15 Եհովան վերցրեց ինձ հոտից, և Եհովան ասաց ինձ. «Գնա՛, մարգարեացի՛ր իմ Իսրայել ժողովրդին»+։
16 Իսկ այժմ լսի՛ր Եհովայի խոսքը. «Քանի որ դու ասում ես՝ «չմարգարեանա՛ս Իսրայելի դեմ+ ու Իսահակի տան դեմ ոչ մի բան չխոսե՛ս»+,
17 դրա համար այսպես է ասում Եհովան. «Կինդ քաղաքում մարմնավաճառ կդառնա+, որդիներդ ու աղջիկներդ սրով կընկնեն, երկիրդ չափման լարով կբաժանվի, դու անմաքուր երկրում կմեռնես+, իսկ Իսրայելը իր երկրից անպատճառ կաքսորվի»»»+։
Ծանոթագրություններ
^ Տեղի էր ունենում հունվար և փետրվար ամիսներին։ Տե՛ս հավելված 18։
^ Այսինքն՝ Հովասի որդի Հերոբովամ II-ի։ Տե՛ս 1։1-ը։
