Եզեկիել 25։1-17
25 Եվ Եհովայի խոսքը եղավ ինձ.
2 «Մարդո՛ւ որդի, երեսդ ուղղիր դեպի Ամմոնի որդիները և մարգարեացիր նրանց դեմ+։
3 Ամմոնի որդիների վերաբերյալ ասա. «Լսեցեք Գերիշխան Տեր Եհովայի խոսքը։ Այսպես է ասում Գերիշխան Տեր Եհովան. «Քանի որ իմ սրբարանի համար դու ասացիր՝ «քեզ տեղն է», որովհետև այն պղծվել է, ինչպես նաև նույնն ասացիր Իսրայելի երկրի համար, որովհետև այն ամայի է դարձել, և Հուդայի տան համար, որովհետև նա աքսորվել է+,
4 դրա համար էլ ես քեզ արևելցիների ձեռքն եմ տալիս որպես սեփականություն+։ Նրանք քո մեջ կկանգնեցնեն իրենց պարսպապատ ճամբարները և կդնեն իրենց վրանները։ Նրանք կուտեն քո պտուղը և կխմեն քո կաթը+։
5 Ռաբան+ ուղտերի արոտավայր կդարձնեմ և Ամմոնի որդիների բնակատեղերը՝ հոտերի համար մակաղատեղի+։ Եվ դուք պիտի իմանաք, որ ես Եհովան եմ»»»+։
6 «Այսպես է ասում Գերիշխան Տեր Եհովան. «Քանի որ դու ծափ տվեցիր+, ոտքերովդ դոփեցիր և ուրախացար՝ ամբողջ հոգովդ արհամարհելով Իսրայելի երկիրը+,
7 դրա համար էլ ես մեկնել եմ ձեռքս քո դեմ+ ու քեզ կմատնեմ ազգերին, որ կողոպտվես։ Քեզ կվերացնեմ ժողովուրդների միջից ու կոչնչացնեմ երկրների միջից+, կկործանեմ քեզ+, և դու պիտի իմանաս, որ ես Եհովան եմ»։
8 Այսպես է ասում Գերիշխան Տեր Եհովան. «Քանի որ Մովաբն+ ու Սեիրն+ ասացին՝ «Հուդայի տունը նման է մյուս բոլոր ազգերին»+,
9 դրա համար ես կմերկացնեմ Մովաբի լանջը նրա քաղաքների՝ սահմանամերձ քաղաքների հետ մեկտեղ, որոնք երկրի զարդարանքն են՝ Բեթ-Եսիմոթը+, Բաալ-Մեոնը+, նույնիսկ մինչև Կարիաթեմ+,
10 և կտամ արևելցիներին+։ Մովաբն ու Ամմոնի+ որդիներին որպես սեփականություն կտամ նրանց, որպեսզի ազգերի մեջ Ամմոնի որդիներն այլևս չհիշվեն+։
11 Ես դատաստան կանեմ Մովաբում+։ Եվ նրանք պիտի իմանան, որ ես Եհովան եմ»+։
12 Այսպես է ասում Գերիշխան Տեր Եհովան. «Քանի որ Եդոմը Հուդայի տնից վրեժ լուծեց, անչափ շատ չարիք գործեց ու վրեժխնդիր եղավ+,
13 դրա համար այսպես է ասում Գերիշխան Տեր Եհովան. «Իմ ձեռքը կմեկնեմ Եդոմի դեմ+ ու կվերացնեմ թե՛ մարդուն, թե՛ ընտանի կենդանուն+։ Թեմանից+ մինչև Դեդան+ այն ավերակ կդարձնեմ։ Նրանք սրով կընկնեն։
14 «Եդոմից վրեժ կառնեմ իմ Իսրայել ժողովրդի ձեռքով+։ Նա Եդոմում կգործի իմ բարկության ու ցասման համեմատ։ Եվ նրանք կիմանան, թե ինչ է իմ վրեժը»+,– ասում է Գերիշխան Տեր Եհովան»»։
15 Այսպես է ասում Գերիշխան Տեր Եհովան. «Քանի որ փղշտացիները, իրենց հոգում արհամարհանք ու դարավոր թշնամություն ունենալով+, վրեժ լուծեցին+ ու վրեժխնդիր եղան, որ ավերում բերեն+,
16 ուստի այսպես է ասում Գերիշխան Տեր Եհովան. «Ես կմեկնեմ իմ ձեռքը փղշտացիների դեմ+, կվերացնեմ քերեթցիներին+ ու կորստյան կմատնեմ ծովեզերքի բնակիչների մնացորդին+։
17 Ընդդեմ նրանց կատաղի հանդիմանություններով վրեժխնդրության մեծ գործեր կանեմ+։ Եվ երբ նրանց վրա բերեմ իմ վրեժխնդրությունը, նրանք պիտի իմանան, որ ես Եհովան եմ»»»+։
