Եզեկիել 38։1-23
38 Եհովայի խոսքը եղավ ինձ.
2 «Մարդո՛ւ որդի+, երեսդ ուղղիր դեպի Մեսեքի+ ու Թոբելի+ գլխավոր իշխան Գոգը, որը Մագոգ երկրից է+, ու մարգարեացիր նրա դեմ.
3 «Այսպես է ասում Գերիշխան Տեր Եհովան. «Ես քո դեմ եմ, ո՛վ Գոգ՝ Մեսեքի ու Թոբելի գլխավոր իշխան։
4 Ես հետ կդարձնեմ քեզ, կարթ կանցկացնեմ քո ծնոտին+, ողջ զորքովդ դուրս կբերեմ քեզ+՝ ձիերով ու ձիավորներով, որոնք բոլորն էլ նրբաճաշակորեն են հագնված+, մեծ բազմություն են՝ մեծ վահաններով ու ասպարներով, բոլորն էլ սուր բռնել գիտեն+։
5 Պարսկաստանը+, Եթովպիան+ և Փութը+ նրանց հետ են, բոլորը ասպարով ու սաղավարտով են,
6 նաև Գոմերն+ ու նրա բոլոր զորախմբերը, Թորգոմայի տունը+ հյուսիսի ամենահեռավոր վայրերից ու նրա բոլոր զորախմբերը. շատ ժողովուրդներ են քեզ հետ+։
7 Պատրա՛ստ եղիր, պատրաստվի՛ր դու և քո ողջ բազմությունը+, որոնք հավաքվել են քեզ հետ։ Դու նրանց առաջնորդը կլինես։
8 Շատ օրեր անց քեզ ուշադրություն կդարձվի։ Վերջին տարիներին կգաս սրից ազատված ժողովրդի երկիրը+՝ այն ժողովրդի, որը հավաքվել է շատ ժողովուրդներից+ և բերվել է Իսրայելի լեռների վրա, որոնք շարունակ ամայի են եղել։ Այս երկրի ժողովուրդը ուրիշ ժողովուրդներից է հավաքվել։ Նրանք բոլորը ապահով են բնակվում+։
9 Դու անպայման դուրս կգաս, փոթորկի պես վրա կհասնես+, երկիրը ծածկող ամպերի պես կլինես դու+, քո բոլոր զորախմբերն ու քեզ հետ շատ ժողովուրդներ»»։
10 Այսպես է ասում Գերիշխան Տեր Եհովան. «Այդ օրը քո սրտում մտքեր կծագեն+, դու դավ կնյութես+
11 ու կասես. «Ես կբարձրանամ այդ երկրի՝ պարիսպ չունեցող գյուղական վայրերի վրա+, կգնամ հանգիստ ու ապահով բնակվողների վրա։ Նրանք բոլորը առանց պարսպի են բնակվում+, չունեն ո՛չ նիգեր, ո՛չ էլ դռներ»։
12 Դու նպատակ կունենաս շատ ավար վերցնելու+, մեծ թալան անելու և ձեռքդ բարձրացնելու վերաբնակեցված վայրերի վրա, որոնք ավերված են եղել+, ու ազգերից հավաքված ժողովրդի վրա+, որը հարստություն և ունեցվածք է դիզում+ և ապրում է երկրի կենտրոնում+։
13 Սաբան+, Դեդանը+, Թարսիսի վաճառականները+ և նրա բոլոր առյուծները+ կասեն քեզ. «Գալիս ես, որ շատ ավա՞ր վերցնես։ Մեծ թալան անելու համա՞ր ես հավաքել քո բազմությունը, որ ոսկի ու արծաթ տանես, հարստություն և ունեցվածք հափշտակես, մեծ ավար վերցնես»»։
14 Ուստի մարգարեացիր, ո՛վ մարդու որդի, և ասա Գոգին. «Այսպես է ասում Գերիշխան Տեր Եհովան. «Այն օրը, երբ իմ Իսրայել ժողովուրդը ապահով բնակվի, դու անպատճառ կնկատես դա+։
15 Դու կգաս քո տեղից՝ հյուսիսի ամենահեռավոր վայրերից+, դու և շատ ժողովուրդներ քեզ հետ. բոլորը ձիեր հեծած կգան՝ մի մեծ բազմություն, բազմաթիվ զորք+։
16 Դու անպայման դուրս կգաս իմ Իսրայել ժողովրդի դեմ ինչպես ամպ, որ ծածկում է երկիրը+։ Դա կլինի վերջին օրերում։ Ես կբերեմ քեզ իմ երկրի դեմ+, որպեսզի ազգերը ճանաչեն ինձ, երբ նրանց աչքի առաջ քեզնով սրբացվեմ, ո՛վ Գոգ»»+։
17 Այսպես է ասում Գերիշխան Տեր Եհովան. «Մի՞թե դու+ նա չես, ում մասին ես նախկին օրերում խոսում էի իմ ծառաների՝ Իսրայելի մարգարեների միջոցով, ովքեր այդ օրերին տարիներ շարունակ մարգարեանում էին, որ դու բերվելու ես նրանց դեմ»+։
18 «Այն օրը, երբ Գոգը գա Իսրայելի երկրի վրա,– ասում է Գերիշխան Տեր Եհովան,– այդ օրը քթիցս մուխ դուրս կգա+։
19 Ես կխոսեմ մոլեգնած+ ու իմ կատաղության կրակով+։ Այդ օրը մեծ երկրաշարժ կլինի Իսրայելի երկրում+։
20 Իմ պատճառով կսարսռան ծովի ձկները, երկնքի թռչունները, դաշտի գազանները, երկրի վրայի բոլոր սողուններն ու երկրի երեսին ապրող բոլոր մարդիկ+։ Լեռները կտապալվեն+, ուղղաձիգ ժայռերը ցած կգլորվեն, և ամեն մի պարիսպ գետին կընկնի»։
21 «Իմ լեռնային շրջանով մեկ ես սուր կկանչեմ նրա դեմ,– ասում է Գերիշխան Տեր Եհովան+։– Յուրաքանչյուրի սուրն իր եղբոր դեմ կլինի+։
22 Նրա դատաստանը համաճարակով+ և արյունահեղությամբ+ կտեսնեմ+։ Հորդառատ անձրև, կարկուտ+, կրակ+ ու ծծումբ կտեղամ նրա, նրա զորախմբերի ու շատ ժողովուրդների վրա, որոնք նրա հետ կլինեն+։
23 Ես կմեծարվեմ, կսրբացվեմ+ ու կճանաչվեմ շատ ազգերի աչքի առաջ։ Եվ նրանք պիտի իմանան, որ ես Եհովան եմ»»+։
