Երեմիա 1։1-19
1 Քեղկիայի որդի Երեմիայի խոսքերը+, որը Բենիամինի երկրում+՝ Անաթոթում+ ապրող քահանաներից էր։
2 Եհովայի խոսքը նրան եղավ Ամոնի+ որդու՝ Հուդայի թագավոր Հովսիայի+ օրերում՝ նրա թագավորության տասներեքերորդ տարում+։
3 Այն եղավ նաև Հուդայի թագավոր՝ Հովսիայի որդի Հովակիմի+ օրերում մինչև Հովսիայի որդի Հուդայի թագավոր Սեդեկիայի+ տասնմեկերորդ տարվա վերջը, մինչև հինգերորդ ամսում Երուսաղեմի գերության գնալը+։
4 Եհովայի խոսքը եղավ ինձ.
5 «Դեռ որովայնում քեզ չստեղծած+՝ ես գիտեի քեզ+, և դու դեռ արգանդից դուրս չեկած՝ ես սրբացրի քեզ+։ Ազգերի մարգարե քեզ նշանակեցի»։
6 Բայց ես ասացի. «Ավա՜ղ, ո՛վ Գերիշխան Տեր Եհովա, ես խոսել չգիտեմ+, որովհետև դեռ պատանի եմ»+։
7 Սակայն Եհովան ասաց ինձ. «Մի՛ ասա՝ դեռ պատանի եմ։ Այլ ում մոտ որ ուղարկեմ քեզ, կգնաս, և ինչ որ պատվիրեմ, կխոսես+։
8 Չվախենաս նրանցից+, որովհետև Եհովան ասում է. «Ես քեզ հետ եմ, որ ազատեմ քեզ»»+։
9 Ապա Եհովան մեկնեց իր ձեռքը և դիպավ իմ բերանին+։ Եվ Եհովան ասաց ինձ. «Ահա իմ խոսքերը քո բերանում դրեցի+։
10 Տե՛ս, այսօր քեզ ազգերի և թագավորությունների վրա եմ նշանակել+, որպեսզի արմատախիլ անես ու քանդես, կործանես ու ավերես+, կառուցես ու տնկես»+։
11 Եվ դարձյալ Եհովայի խոսքը եղավ ինձ. «Ի՞նչ ես տեսնում, Երե՛միա»։
Ես ասացի. «Նշենու* ճյուղ եմ տեսնում»։
12 Եհովան ասաց. «Ճիշտ ես տեսնում, որովհետև ես արթուն* եմ մնում, որ իմ խոսքը կատարեմ»+։
13 Եվ Եհովայի խոսքը երկրորդ անգամ եղավ ինձ. «Ի՞նչ ես տեսնում»։
Ես ասացի. «Լայն բերանով մի կաթսա եմ տեսնում՝ կրակի վրա դրված, և կաթսայի բերանը հյուսիսի կողմից դեպի հարավ է թեքված»։
14 Եհովան ասաց ինձ. «Հյուսիսից աղետ է գալու երկրի բոլոր բնակիչների վրա+։
15 «Ես կանչում եմ հյուսիսի թագավորությունների բոլոր ցեղերին,– ասում է Եհովան+,– նրանք կգան, ու ամեն մեկն իր գահը կդնի Երուսաղեմի դարպասների մուտքի մոտ+, նրա բոլոր պարիսպների շուրջը և Հուդայի բոլոր քաղաքների մոտ+։
16 Եվ ես կհայտնեմ նրանց իմ դատաստանները իրենց բոլոր չարությունների համար+, քանի որ թողել են ինձ+ և զոհերի ծուխը ուրիշ աստվածների են մատուցում+ ու իրենց ձեռքի գործերի առջև են խոնարհվում»+։
17 Բայց դու մեջքդ գոտեպնդի՛ր+, վե՛ր կաց ու ասա՛ նրանց այն ամենը, ինչ որ պատվիրում եմ քեզ։ Մի՛ վախեցիր նրանցից+, որպեսզի նրանց առաջ քեզ սարսափի մեջ չգցեմ։
18 Այսօր ես քեզ ամբողջ երկրի դեմ, Հուդայի թագավորների դեմ, նրա իշխանների, նրա քահանաների ու երկրի ժողովրդի դեմ+ բերդաքաղաք, երկաթե սյուն և պղնձե պարիսպ+ եմ դարձրել+։
19 Նրանք կպատերազմեն քո դեմ, բայց քեզ չեն հաղթի+, որովհետև «ես քեզ հետ եմ+,– ասում է Եհովան,– որ ազատեմ քեզ»»+։
Ծանոթագրություններ
^ Եբր.՝ շաքեդ, նշ. է «արթնացող»։ Գարնանը առաջինը ծաղկող ծառերից մեկն է։
^ Եբր.՝ շոքեդ, համահունչ է 11-րդ համարի շաքեդ բառին։
