2 Օրենք 17։1-20
17 «Քո Աստված Եհովայի համար արատ ունեցող՝ որևիցե վնասվածք ունեցող ցուլ կամ ոչխար չզոհես, որովհետև դա գարշելի է քո Աստծու՝ Եհովայի համար+։
2 Եթե քո մեջ՝ քո քաղաքներից որևէ մեկում, որ քո Աստված Եհովան տալիս է քեզ, լինի որևէ տղամարդ կամ կին, որը քո Աստված Եհովայի աչքին չարիք գործի՝ դրժելով նրա ուխտը+,
3 և գնա ու երկրպագի ուրիշ աստվածների, խոնարհվի դրանց կամ արեգակի, լուսնի և երկնքի ամբողջ զորքի առաջ+, ինչը ես չեմ պատվիրել+,
4 ու քեզ պատմեն այդ մասին, և լսելուց հետո մանրակրկիտ քննես այն ու պարզվի, որ դա իրոք ճիշտ է+ և որ այդ գարշելի բանը կատարվել է Իսրայելում,
5 ապա այդ տղամարդուն կամ կնոջը, որը գործել է այդ չարիքը, հանիր դարպասներիդ մոտ ու քարկոծիր այդ տղամարդուն կամ կնոջը և մահվան մատնիր նրան+։
6 Մահապարտին հարկավոր է մահվան մատնել երկու կամ երեք վկաների ցուցմունքի* հիման վրա+։ Մեկ վկայի ցուցմունքով նա չպետք է մահվան մատնվի+։
7 Նրան մահվան մատնելու համար նախևառաջ վկաների ձեռքը պետք է լինի նրա վրա և հետո ամբողջ ժողովրդի ձեռքը+։ Հեռացրու չարիքը քո միջից+։
8 Եթե քո քաղաքում որևէ գործի համար դատավճիռ կայացնելը չափազանց դժվար լինի քեզ համար+՝ լինի արյուն թափելու+, բողոքի+, բռնարարքի կամ վեճի գործ+, ապա վեր կաց ու գնա այն վայրը, որը քո Աստված Եհովան կընտրի+,
9 գնա ղևտացի քահանաների+ ու դատավորի+ մոտ, որն այդ օրերին դատավորություն անելիս կլինի, հարցրու նրան, ու նրանք կհայտարարեն քեզ դատավճիռը+։
10 Դրանից հետո վարվիր այն դատավճռի համաձայն, որը նրանք կհայտարարեն Եհովայի ընտրած վայրում։ Ամեն ինչ, որ նրանք քեզ կասեն, մանրամասնորեն կատարիր։
11 Վարվիր ըստ այն օրենքի, որը նրանք ցույց կտան քեզ, և ըստ այն դատավճռի, որը նրանք կհայտնեն քեզ+։ Նրանց հայտարարած դատավճռից աջ կամ ձախ չշեղվես+։
12 Իսկ եթե մի մարդ հանդգնորեն վարվի ու չլսի քահանային, որը կանգնած է այնտեղ՝ քո Աստված Եհովային ծառայելու, կամ չլսի դատավորին+, ապա այդ մարդը պետք է մեռնի+։ Հեռացրու չարիքը Իսրայելից+։
13 Ամբողջ ժողովուրդը կլսի ու կվախենա+ և այլևս հանդգնորեն չի վարվի։
14 Երբ գաս այն երկիրը, որը քո Աստված Եհովան տալիս է քեզ, տիրես նրան, բնակվես նրանում+ ու ասես՝ «թագավոր դնեմ ինձ վրա, ինչպես որ ընդունված է ինձ շրջապատող մյուս բոլոր ազգերի մոտ»+,
15 անպատճառ դիր այն թագավորին, ում քո Աստված Եհովան կընտրի+։ Քեզ վրա քո եղբայրների միջից թագավոր դիր։ Դու չես կարող օտարականի նշանակել քեզ վրա, որը քո եղբայրը չէ։
16 Միայն թե նա չպետք է իր ձիերը շատացնի+ ու չպետք է ժողովրդին ստիպի վերադառնալ Եգիպտոս՝ իր ձիերը շատացնելու համար+, քանի որ Եհովան ասել է ձեզ. «Այս ճանապարհով երբեք չվերադառնաք»։
17 Նա նաև իր կանանց թիվը չպետք է շատացնի, որպեսզի նրա սիրտը չապականվի+, և ոչ էլ պետք է չափից շատ արծաթ ու ոսկի կուտակի իր համար+։
18 Երբ նա նստի իր թագավորության գահին, մի գրքում իր համար այս օրենքը պետք է արտագրի այն օրինակից, որը պահվում է ղևտացի քահանաների մոտ+։
19 Այն իր մոտ պետք է մնա, և նա պետք է կարդա այն իր կյանքի բոլոր օրերում+, որպեսզի սովորի վախենալ իր Աստված Եհովայից, պահի և կատարի այս օրենքի բոլոր խոսքերն ու այս կանոնները+,
20 որպեսզի նրա սիրտը չհպարտանա իր եղբայրների նկատմամբ+, այս պատվիրաններից աջ կամ ձախ չշեղվի+ և որպեսզի իր թագավորությունում նա երկար օրեր իշխի+, ինչպես նա, այնպես էլ իր որդիները Իսրայելում»։
Ծանոթագրություններ
^ Բառացի՝ «բերանով»։
