Առակներ 26։1-28
26 Ինչպես ձյունը տեղին չէ ամռանը, և անձրևը՝ բերքահավաքի ժամանակ,Այնպես էլ պատիվը սազական չէ հիմարին:+
2 Ինչպես թռչունը առանց պատճառի չի փախչում, և ծիծեռնակը՝ թռչում,Այնպես էլ անեծքը առանց հիմնավոր պատճառի չի գալիս:*
3 Մտրակը ձիու համար է, և սանձը՝ էշի,+Իսկ գավազանը հիմար մարդկանց մեջքի համար է:+
4 Հիմարին մի՛ պատասխանիր նրա հիմարության համաձայն,Որ նրան չհավասարվես:
5 Հիմարին նրա հիմարության համաձայն պատասխանիր,Որ չկարծի, թե իմաստուն է:+
6 Գործը հիմարի ձեռքը հանձնողը նման է նրան,Ով խեղում է իր ոտքերը և վնասում ինքն իրեն:
7 Ինչպես կաղ մարդու տկար ոտքերն են,Այնպես էլ առակն է հիմարների բերանում:+
8 Հիմարին փառք տալը նույնն է,+Ինչ քարը պարսատիկին կապելը:
9 Ինչպես փշոտ ճյուղն է հարբեցողի ձեռքում,Այնպես էլ առակն է հիմարների բերանում:
10 Նա, ով վարձում է հիմարի կամ պատահական անցորդի,Նման է մի աղեղնավորի, ով նետեր է արձակում ուր պատահի:*
11 Ինչպես շունն է վերադառնում իր փսխածին,Այնպես էլ հիմարն է կրկնում իր հիմարությունը:+
12 Տեսե՞լ ես մի մարդու, ով կարծում է, թե իմաստուն է:+
Հիմարից ավելի շատ հույս կա, քան նրանից:
13 Ծույլն ասում է. «Ճանապարհին առյո՜ւծ կա,Առյո՜ւծ կա հրապարակում»:+
14 Դուռը ճոճվում է ծխնիների վրա,Իսկ ծույլը շուռումուռ է գալիս իր անկողնում:+
15 Ծույլն իր ձեռքը ամանի մեջ է մտցնում,Բայց այնքան հոգնած է, որ չի կարողանում այն իր բերանը տանել:+
16 Հիմարին թվում է, թե ինքն ավելի իմաստուն է,Քան այն յոթ հոգին, որ խելացի պատասխան են տալիս:
17 Այն անցորդը, որը խիստ զայրանում է իրեն չվերաբերող վեճի պատճառով,*+Նման է շան ականջներից բռնած մարդու:
18 Ինչպես որ խելագարն է կրակոտ տեգեր* ու մահացու նետեր արձակում,
19 Այնպես էլ այն մարդն է, ով իր դրացու գլխին խաղ է խաղում* ու ասում՝ կատակ էի անում:+
20 Փայտ չլինելիս կրակը հանգչում է,Եվ եթե զրպարտող չկա, կռիվը դադարում է:+
21 Ինչպես փայտածուխն է թեժացնում խարույկը, և փայտը՝ կրակը,Այնպես էլ կռվարար մարդն է վեճեր բորբոքում:+
22 Զրպարտողի խոսքերը նման են համեղ պատառների,Որոնք մարդիկ ագահորեն կուլ են տալիս, և դրանք ստամոքսն են իջնում:+
23 Ինչպես արծաթապատումն է կավե անոթի բեկորի վրա,Այնպես էլ քաղցր խոսքերն են,* որ բխում են չար սրտից:+
24 Ուրիշներին ատողը խոսքերով թաքցնում է իր ատելությունը,Բայց իր սրտում նենգ մտադրություն ունի:
25 Թեև նա սիրալիր է խոսում, մի՛ վստահիր նրան,Որովհետև նրա սրտում յոթ գարշելի բան կա:*
26 Թեպետ նա խաբեությամբ քողարկում է իր ատելությունը,Բայց նրա չարությունը կբացահայտվի բոլորի առաջ:
27 Փոս փորողը իր փորած փոսը կընկնի,Եվ նա, ով քար է գլորում, այն հենց իրեն էլ կճխլի:+
28 Ստախոս լեզուն ատում է նրանց, ում ցավ է պատճառել,Եվ շողոքորթող բերանը վնաս է հասցնում:+
Ծանոթագրություններ
^ Կամ հնարավոր է՝ «Ինչպես թռչունն է փախչում, և ծիծեռնակը՝ թռչում, այնպես էլ անտեղի ասված անեծքն է կողքով անցնում»:
^ Կամ՝ «վիրավորում է բոլորին»:
^ Կամ հնարավոր է՝ «որը ներքաշվում է ուրիշի կռվի մեջ»:
^ Կարճ նիզակ:
^ Կամ՝ «խաբում է»:
^ Բռց.՝ «կրակոտ շուրթերն են»:
^ Կամ՝ «նրա սիրտն ամբողջովին գարշելի է»: