Գաղատացիներ 5։1-26
5 Քրիստոսը ազատեց մեզ, որ հենց այսպիսի ազատություն վայելենք: Ուստի ամուր բռնեք այն+ և թույլ մի՛ տվեք, որ ձեզ կրկին ստրկության լծի տակ մտցնեն:+
2 Տեսեք՝ ինչ եմ ասում ես՝ Պողոսս. եթե թլփատվեք, Քրիստոսի արածը ոչ մի օգուտ չի բերի ձեզ:+
3 Ուզում եմ հիշեցնել, որ նա, ով թլփատվում է, պարտավոր է պահել ամբողջ Օրենքը:+
4 Եթե փորձում եք արդար հայտարարվել Օրենքի միջոցով,+ հեռանում եք Քրիստոսից և զրկվում նրա անզուգական բարությունից:
5 Իսկ մենք, որ ոգով ենք առաջնորդվում, հույսով ու փափագով սպասում ենք, որ արդար հայտարարվենք հավատի հիման վրա:
6 Քրիստոս Հիսուսի հետ միավորվելուց հետո թլփատված լինել-չլինելը ոչ մի նշանակություն չունի.+ կարևորը հավատ ունենալն է, որն արտահայտվում է սեր դրսևորելով:
7 Լավ էիք վազում:+ Ո՞վ խանգարեց ձեզ, որ շարունակեք մնալ ճշմարտության ճանապարհին:*
8 Ձեզ տարհամոզողների գաղափարները Նրանից չեն, ով կանչեց ձեզ:
9 Հիշեք. մի փոքր թթխմորը խմորում է ողջ զանգվածը:+
10 Բայց ես վստահ եմ, որ դուք՝ Տիրոջ հետ միաբանվածներդ,+ չեք տարհամոզվի, իսկ ձեր միտքը պղտորող ցանկացած մեկը,+ ով էլ որ լինի, կստանա իր արժանի դատաստանը:
11 Եղբայրնե՛ր, եթե ես դեռ թլփատություն քարոզեի, մի՞թե մինչև հիմա կհալածվեի: Չէ՞ որ այդ դեպքում տանջանքի սյան* մասին ուսմունքը, որը գայթակղության քար է մարդկանց համար,+ ճանապարհից կհեռացվեր:
12 Իսկ այն մարդիկ, ովքեր փորձում են ձեր միտքը պղտորել, թող թեկուզ ամորձատվեն:*
13 Եղբայրնե՛ր, դուք կանչվել եք, որ ազատություն վայելեք, միայն թե այդ ազատությունից մի՛ օգտվեք ձեր մարմնական ցանկություններն անելու համար,+ այլ սիրուց մղված՝ ծառայեք միմյանց,+
14 որովհետև ամբողջ Օրենքը ամփոփված է մեկ պատվիրանի մեջ. «Սիրեք ձեր դրացուն ձեր անձի պես»:+
15 Մինչդեռ եթե շարունակ իրար կծեք ու հոշոտեք,+ ի վերջո իրար կոչնչացնեք:+
16 Ասում եմ ձեզ. շարունակեք ընթանալ ոգու առաջնորդության համաձայն+ և մարմնական ոչ մի ցանկություն չեք անի:+
17 Մարմինն իր ցանկություններով դեմ է ոգուն, ոգին էլ դեմ է մարմնին: Եվ քանի որ դրանք հակառակվում են իրար, դուք չեք անում այն, ինչ ուզում եք անել:+
18 Եթե ոգով եք առաջնորդվում, ուրեմն Օրենքի տակ չեք:
19 Մարմնական ցանկություններից բխող գործերն ակնհայտ են. դրանք են՝ անբարոյականություն,*+ անմաքրություն, լկտի վարք,*+
20 կռապաշտություն, ոգեհարցություն,*+ թշնամանք, գժտություն, խանդ, զայրույթի պոռթկումներ, անհաշտություն, պառակտումներ, աղանդավորություն,
21 նախանձ, հարբեցողություն,+ սանձարձակ խրախճանքներ և նման բաներ:+ Ես արդեն նախազգուշացրել եմ ձեզ և կրկին նախազգուշացնում եմ, որ այսպիսի բաներ անողները Աստծու թագավորությունը չեն ժառանգի:+
22 Սակայն ոգու առաջ բերած պտուղն է՝ սեր, ուրախություն, խաղաղություն, համբերություն, բարություն, բարեսիրություն,*+ հավատ,
23 հեզություն,* ինքնատիրապետում:+ Չկա մի օրենք, որ դատապարտի այսպիսի բաները:
24 Նրանք, ովքեր Քրիստոս Հիսուսինն են, մարմինն իր կրքերով ու ցանկություններով հանդերձ սյանն են գամել:+
25 Եթե ոգին է առաջնորդում մեր կյանքը, ուրեմն եկեք շարունակենք վարվել ոգու առաջնորդության համաձայն:+
26 Եկեք չլինենք ինքնահավան,+ իրար մրցակցության չհրահրենք+ և իրար չնախանձենք:
Ծանոթագրություններ
^ Բռց.՝ «հնազանդվել ճշմարտությանը»:
^ Բառարանում տես «Տանջանքի սյուն»:
^ Կամ՝ «ներքինի դառնան»: Այդպիսով նրանք համապատասխան չէին լինի կատարելու հենց այն օրենքը, որի ջատագովն էին:
^ Հուն.՝ պոռնեյա: Բառարանում տես «Անբարոյականություն»:
^ Կամ՝ «անամոթ վարք»: Հուն.՝ ասելգեյա: Բառարանում տես «Լկտի վարք»:
^ Կամ՝ «կախարդություն»: Հուն. բառը կարող է վերաբերել նաև թմրադեղերի գործածությանը:
^ Բառարանում տես «Բարեսիրություն»:
^ Կամ՝ «մեղմություն»:
