Եզեկիել 36։1-38
36 «Մարդո՛ւ որդի, մարգարեացիր Իսրայելի լեռների մասին ու ասա. «Ո՛վ Իսրայելի լեռներ, լսե՛ք Եհովայի խոսքը:
2 Գերիշխան Տեր Եհովան ասում է. «Թշնամին ծաղրանքով ձեզ ասել է. «Ո՜ւխ, նույնիսկ վաղեմի բարձունքներն են մերը դարձել»»»:+
3 Ուստի մարգարեացիր և ասա. «Գերիշխան Տեր Եհովան ասում է. «Թշնամիները բոլոր կողմերից հարձակվեցին ձեզ վրա ու ամայացրին: Հարևան ազգերից նրանք, ովքեր փրկվել են, ուզում են ձեզ իրենց սեփականությունը դարձնել, և մարդիկ շարունակ խոսում են ձեր մասին ու զրպարտում:+
4 Ուստի լսեք Գերիշխան Տեր Եհովայի խոսքը, ո՛վ Իսրայելի լեռներ: Ահա սա է ասում Գերիշխան Տեր Եհովան լեռներին ու բլուրներին, գետերին ու հովիտներին, ավերված ու ամայացած վայրերին,+ լքված քաղաքներին, որոնք հարևան ազգերի միջից փրկվածների կողմից թալանվել ու ծաղրուծանակի են ենթարկվել.+
5 «Իմ բորբոքված ցասումով+ կդատապարտեմ հարևան ազգերի միջից փրկվածներին, ինչպես նաև ողջ Եդոմին՝ նրանց, ովքեր հրճվանքով և խիստ հեգնանքով+ հայտարարեցին, որ իմ երկիրը իրենց սեփականությունն է, որպեսզի տիրանան արոտավայրերին և թալանեն այն»,– ասում է Գերիշխան Տեր Եհովան»»:+
6 Ուստի մարգարեացիր Իսրայելի մասին և լեռներին ու բլուրներին, գետերին ու հովիտներին ասա. «Ահա թե ինչ է ասում Գերիշխան Տեր Եհովան. «Ես իմ նախանձախնդրությամբ ու ցասումով կխոսեմ, որովհետև ուրիշ ազգերը նվաստացրին ձեզ»»:+
7 Գերիշխան Տեր Եհովան ասում է. «Ձեռքս բարձրացնում եմ ու երդվում, որ շրջակա ազգերն իրենք են նվաստանալու:+
8 Բայց դուք, ո՛վ Իսրայելի լեռներ, ճյուղեր կարձակեք ու պտուղ կտաք իմ ժողովրդի՝ իսրայելացիների համար,+ քանի որ նրանք շուտով վերադառնալու են:
9 Ես ձեզ հետ եմ և բարեհաճ կլինեմ ձեր հանդեպ: Դուք կմշակվեք ու կսերմանվեք:
10 Ձեզ վրա կբնակեցնեմ շատ մարդկանց՝ ողջ Իսրայելը: Քաղաքները կբնակեցվեն,+ և ավերակ դարձած վայրերը կվերակառուցվեն:+
11 Այո՛, կշատացնեմ թե՛ ժողովրդին, թե՛ կենդանիներին:+ Նրանք կբազմանան ու պտղաբեր կլինեն: Ես ձեզ առաջվա պես բնակեցված կդարձնեմ+ և այնպես կանեմ, որ նախկինից ավելի բարգավաճ լինեք:+ Եվ դուք կիմանաք, որ ես Եհովան եմ:+
12 Այնպես կանեմ, որ մարդիկ՝ իմ ժողովուրդը՝ իսրայելացիները, քայլեն ձեր վրայով, և նրանք կտիրեն ձեզ:+ Դուք նրանց ժառանգությունը կդառնաք ու այլևս չեք խլի նրանց երեխաներին»:+
13 Ահա թե ինչ է ասում Գերիշխան Տեր Եհովան. «Քեզ ասում են. «Դու մի երկիր ես, որը խժռում է մարդկանց ու իր ժողովուրդներից խլում է երեխաներին»:
14 Ուստի դու այլևս չես խժռի մարդկանց և քո ժողովուրդներից չես խլի երեխաներին,– ասում է Գերիշխան Տեր Եհովան:–
15 Ես այլևս թույլ չեմ տա, որ ուրիշ ազգերը վիրավորեն քեզ, և մարդիկ ծաղրեն:+ Դու այլևս աղետ չես բերի քո ժողովուրդների վրա»,– ասում է Գերիշխան Տեր Եհովան»:
16 Եհովան դարձյալ խոսեց ինձ հետ՝ ասելով.
17 «Մարդո՛ւ որդի, երբ իսրայելացիներն ապրում էին իրենց երկրում, նրանք իրենց վարքով ու գործերով պղծեցին այն:+ Նրանց արարքներն ինձ համար անմաքուր էին, ինչպես կնոջ անմաքրությունը դաշտանի ժամանակ:+
18 Ուստի ես իմ ցասումը թափեցի նրանց վրա այն պատճառով, որ նրանք արյուն էին թափել երկրում+ և որ պղծել էին երկիրը իրենց գարշելի կուռքերով:+
19 Նրանց ցիրուցան արեցի ազգերի մեջ, ցրեցի տարբեր երկրներ+ և դատեցի իրենց վարքի ու գործերի համեմատ:
20 Բայց երբ նրանք գնացին այդ ազգերի մոտ, վերջիններս պղծեցին իմ սուրբ անունը՝+ նրանց մասին ասելով. «Նրանք Եհովայի ժողովուրդն են, բայց ստիպված են եղել հեռանալ նրա երկրից»:
21 Ես կգործեմ հանուն իմ սուրբ անվան, որն Իսրայելը պղծել է այն ազգերի մեջ, որոնց մոտ գնացել է:+
22 Ուստի Իսրայելին ասա. «Ահա թե ինչ է ասում Գերիշխան Տեր Եհովան. «Ո՛վ Իսրայել, ոչ թե հանուն ձեզ եմ գործելու, այլ հանուն իմ սուրբ անվան, որը դուք պղծել եք այն ազգերի մեջ, որոնց մոտ գնացել եք:+
23 Ես կսրբացնեմ իմ մեծ անունը,+ որը պղծվել է ազգերի մեջ, որը դուք պղծեցիք նրանց մեջ: Եվ ազգերը կիմանան, որ ես Եհովան եմ,+ երբ ձեզնով սրբացվեմ նրանց աչքի առաջ,– ասում է Գերիշխան Տեր Եհովան:–
24 Ես ձեզ կհանեմ ազգերի միջից, կհավաքեմ բոլոր երկրներից ու կբերեմ ձեր երկիր:+
25 Ձեզ վրա մաքուր ջուր կցողեմ, և դուք կմաքրվեք:+ Ձեր բոլոր պղծություններից կմաքրեմ ձեզ+ ու կվերացնեմ ձեր բոլոր գարշելի կուռքերը:+
26 Նոր սիրտ կտամ ձեզ+ ու նոր ոգի կդնեմ ձեր մեջ:*+ Ձեր քարե սիրտը կհանեմ+ և մարմնեղեն* սիրտ կտամ ձեզ:
27 Իմ ոգին կդնեմ ձեր մեջ և այնպես կանեմ, որ հնազանդվեք իմ կանոններին,+ պահեք ու կատարեք իմ օրենքները:*
28 Այդ ժամանակ դուք կբնակվեք այն երկրում, որը տվել եմ ձեր նախահայրերին, և կլինեք իմ ժողովուրդը, իսկ ես ձեր Աստվածը կլինեմ:+
29 Ես կազատեմ ձեզ բոլոր անմաքուր բաներից, հացահատիկին կհրամայեմ, որ առատորեն բերք տա, ու ձեզ սովի չեմ մատնի:+
30 Ծառի պտուղն ու դաշտի բերքը առատ կդարձնեմ, որպեսզի ազգերի մեջ երբեք սովի պատճառով անպատվություն չկրեք:+
31 Դուք կհիշեք ձեր վատ վարքն ու չար գործերը և կզզվեք ինքներդ ձեզնից ձեր մեղքերի ու գարշելի արարքների պատճառով:+
32 Լա՛վ իմացեք, ես դա չեմ անելու հանուն ձեզ,+– ասում է Գերիշխան Տեր Եհովան:– Ամաչեք ու ձեզ նվաստացած զգացեք ձեր արարքների պատճառով, ո՛վ իսրայելացիներ»»:
33 Գերիշխան Տեր Եհովան ասում է. «Այն օրը, երբ ձեզ մաքրեմ ձեր բոլոր մեղքերից, քաղաքները կվերաբնակեցնեմ+ և ավերված վայրերը կվերակառուցեմ:+
34 Ամայի երկիրը, որի ամայությունը տեսել է ամեն մի անցորդ, կմշակվի:
35 Մարդիկ կասեն. «Այս երկիրը, որն ամայացած էր, Եդեմի+ պարտեզի պես է դարձել, իսկ քաղաքները, որոնք ավերվել էին, անբնակ դարձել ու քարուքանդ եղել, հիմա ամրակուռ ու մարդաբնակ են դարձել»:+
36 Ձեր շրջակայքում մնացած ազգերը կիմանան, որ ես՝ Եհովաս եմ վերականգնել քարուքանդ եղածը և ծաղկեցրել ամայացածը: Ես՝ Եհովաս եմ ասել ու արել դա»:+
37 Գերիշխան Տեր Եհովան ասում է. «Ես նաև թույլ կտամ, որ իսրայելացիները խնդրեն ինձ ոչխարների հոտի չափ շատացնել իրենց թիվը, ու ես կկատարեմ նրանց խնդրանքը:
38 Ինչպես որ Երուսաղեմը տոների ժամանակ+ լիքն էր մարդկանցով՝* սուրբ մարդկանց բազմությամբ, այնպես էլ ավերված քաղաքները կլցվեն մարդկանցով:+ Եվ նրանք կիմանան, որ ես Եհովան եմ»»:
Ծանոթագրություններ
^ Կամ՝ «ու ձեզ կօգնեմ նոր մտածելակերպ ունենալ»:
^ Այսինքն՝ Աստծու առաջնորդությունը ընդունող:
^ Բռց.՝ «դատավճիռները»:
^ Կամ հնարավոր է՝ «զոհաբերվելիք ոչխարների հոտերով»: